Tulongamishe mudimo wetu wa bulungudi—Kutamisha kyubishi kya kwikala na bantu ba kulekyelanga ma jurnale

Bwakinyi bi na muulo: Bantu bebungi abasangelaa kubadika ma jurnale eetu t’abakuminaa kulonga netu Bible nya. Pangi mbafule Lulangwilo lwabo, sunga dingi shi ta be na nsaa bwa kulonga. Byabya, bu byabakwete kubadika ma jurnale eetu nsaa yooso, mbalombeene kwikala na lukalo lw’Eyi dy’Efile Mukulu. (1 Mp. 2:2) Ungi mwisambo ngulombeene kumukuma kwishimba, sunga shi nshalelo aaye mmulombeene kwaluluka. Kumutembela kushii kukooka munda wa nsaa ipeela akumukwasha bwashi etubiile na akwitukwasha bwa kuuka kyasangelaa na myanda imutale. Dingi efuku, mmulombeene kubanga kulonga Bible.

Mushindo wa kwibikita:

Mweshi ooso ata nsaa ya kupa muntu ooso kyakya Kitenta kya Mulami na Revéillez-vous! bibakatuka mu kutuuka. Pangi we mulombeene kwenda mu nkamutala dingi efuku munkatshi mwa mweshi bwa kwibwesha nsala yaaye pabitale mwisambo umune wa mu ma jurnale oodi mulekye sunga kumupa mukanda autungu kupa bantu mu wawa mweshi. Ikala ofundu pa kasaki.—Tala Mudimo wetu wa Bufumu wa 1/2014, mu esk. 3.
Elumbuule bwa musango ooso wende mu kutala muntu. Pamutwe pa kuleka ma jurnale nka bisumanga, ikala w’esamba na yawa muntu na tompa bwa kudya naye kipwano, byabya okyebe kwibwesha lukalo mwadi.
Ikala mupasukye bwa kumona pa kutwelela bwa kubanga kulonga naye Bible. Su muntu olekyelaa ma jurnale akwipusha akyakula Bible pabitale mwanda kampanda, mupe mukanda wa kulonga awaluula ku lwalwa lukonko na nwiutalule pamune. Kumpala kwa kukatuka, ebweshe lukonko alwisambila myanda ibanukatuka mu kwakula bwashi nwilutaluule mususa aufiki. Su okwete kwisambanga naaye nsaa yooso, ofubisha Bible sunga umune wa ku mikanda yeetu ya kulonga bwa kutentekyesha naye sunga munda mwa minite ipeela, okwete kulonga naaye Bible. We mumutwadile broshire a Mukandu wibuwa na omulesha bya kulonga Bible mu minite ipeela su? We mumuleshe video a Bwakinyi abitungu kulonga Bible? na Kulonga kwa Bible akukitshikaa naminyi? Sunga byekala shi baadi mupele kulonga kumpala, nshaleelo mmulombeene kushintuluka. We mulombeene kutompa dingi?

Ebitompeyi munda mwa wawa mweshi:

Kita liste a baaba bokumiina kwikala olekyelanga ma jurnale. Ebape jurnale ooso batuuku, na webalungule shi nenutwadila ingi ayituuku.