Mweshi wa Mwanda awikala mweshi ukata wa mudimo!

1. Bu byatwifubwila pepi na musangeelo wa 100 wa kutandjikwa kwa Bufumu bw’Efile Mukulu, nkampanye kinyi ke pabwako akakyebe kukitshika mu nsenga ishima?

¹ Musangeelo wa 100 wa kutandjikwa kwa Bufumu bw’Efile Mukulu taudi peepi. Twi na muloo wikashaa wa kutumbisha Yehowa ku bukwashi bwa kano kanpanye ke pa bwako! Mu mweshi wa Mwanda atukyebe kwabila trakte mupya mu nsenga ishima e na mutwe wa mwanda awamba shi: Nkunyi kwatudi balombeene kupeta myalulo ku nkonko ikata ya mu nshalelo? Uno trakte atakula bantu bwa kukimba myalulo mu Bible na apatuula dingi mushindo ulombeene kwibakwasha jw.org.

2. Mushindo kinyi watudi balombeene kukwatshisheena mu “kwela misase ya muloo bwa kusaamuna Yehowa” akukyebe kukitshika mu mweshi wa Mwanda?

² Kwela misase ya muloo bwa kusaamuna: Bwa kukwasha balungudi ba mukandu wibuwa bwabadya kutamisha mudimo wabo, mpàngo i pa bwayo ngyakibwe bwa kukwasha yawa ooso e na lukalo lwa kukita mudimo wa bu mbala-mashinda mukwashi mu mweshi wa Mwanda. Mu wawa mweshi, balungudi ba mukandu wibuwa babatshishibwe mbalombeene kwikala ba mbaala-mashinda ba nsaa 30. Mweshi wa mwanda wi na ma dya Kasatu atano, dya Mpooso itano, na ma dya Lubingo atano, balungudi ba mukandu wibuwa abafubu ingi midimo sunga abende ku tulasa munkatshi mwa lubingo abekala na mushindo wa kukita mudimo wa bu mbaala-mashinda mukwashi. Su we na mulongi a Bible kwete kwenda kumpala sunga mwana akumiina kwikala mulungudi a mukandu wibuwa, esambe na mukunkushi a kasaka ka bakulu. Abikala mwanda wa muloo wi kasha pa mwanda wa baaba abekumbasha kwatudi bwa mu uno mweshi wi pa bwawo! Sunga ba mbaala-mashinda ba myeshi yooso bebungi abayikishaa mu mweshi wa Mwanda kunyima kwabo kulombasha kipatshila kyabo kya nsaa itekibwa ku kipwa, mbilombeene kwikala mushindo washi bataluule programe aabo kalolo bwa kukwatshisheena ngofu kano kampanye ke pa bwako. Ino ndjo nsaa ilombeene bifuko kwisamba pamune mushindo wabadi balombeene kukwatshisheena mu “kwela misase ya muloo bwa kusaamuna Yehowa” akukyebe kukitshika mu mweshi wa Mwanda.​—Esd. 3:11, NWT; Mye. 15:22.

3. Ndukulupilo kinyi lwatudi nalo lutale kano kampanye ke pa bwako?

³ Sunga mbyabidi shi tatubakitshiine angi ma kanpanye e byabya, atukulupila shi kampanye ka uno musango, akashaala mu binangu byetu bwa looso. Kwi mushindo washi twapeta bungi bupya bwa nsaa, balungudi, na ba mbaala-mashinda bakwashi mu mweshi wa Mwanda su? Bu bitatudi ku mpwilo kwa kipwa kya mudimo kya 2014, Yehowa eelele mwilo waye wi mu nsenga ishima mwabi bwabadya kwikasha uno mweshi wa Mwanda bu mweshi wa bulungudi bukata busha kitshikile kashaa!​—Mat. 24:14.