We kuteka naminyi bwa’shi Efile Mukulu akupushe?
Yehowa nyi Efile Mukulu “apushaa nteko.” (Misambo 65:2) Twi balombene kumuteka mbalo yoso na nsaa yoso, n’eyi dikata sunga mundamunda. Yehowa akumina’shi tumutekye bu “Nshetu,” binyibinyi aye ngi Nshetu mukile buwa atudi balombene kwikala naye. (Mateo 6:9) Na kifulo kyoso Yehowa etulongyesha mushindo watudya kumuteka bwa’shi etutemeshe.
TEKA YEHOWA EFILE MWISHINA DYA YESU
“Bintu byoso byanukateka kwi Yaaya mwishina dyande, akenupa byanka.”—Yowano 16:23, Kilombeno kipya 2014.
Mayi a Yesu aalesha kalolo’shi Yehowa akumina tumukye nka aye nabene, kushi ku bukwashi bwa binfwanyi, bwa bansantu bwa ba mikeyilu sunga bwa bankambwa batababafwile, kadi nka penda mwishina dya Yesu Kidishitu. Nsaa yatutekye Efile Mukulu mwishina dya Yesu, atulesha’shi twi na lutumbu mu byoso byabadi betukitshine kwi Yesu. Yesu bakwile’shi: “Muntu su ngumune takwenda kwi Yaaya kushii kukiila kwandji.”—Yowano 14:6.
AKULA MYANDA AYIKATUKILA MWISHIMBA
“Mufungwileyi mashimba eenu.”—Misambo 62:8.
Nsaa yatutekye Yehowa, abitungu twisambe naye bu Nshetu sha kifulo. Pa mutwe pa kubadika luteko alukatukila mu mukanda sunga kwambuula luteko lwatudi balamiine, abitungu tumutekye, tumulungule myanda ayikatukila mwishimba.
TEKA MU KWIPUSHENA NA KIKYEBE KY’ESHIMBA DY’EFILE MUKULU
“Su twamuteka kintu muyile kukumina kwaye, aye eetuteemesha.”—1 Yowano 5:14.
Mu Bible, Yehowa etulungula kyakyebe kwitukitshina na kyakumina’shi tumukitshine. Bwa’shi Efile Mukulu akumine nteko yetu, abitungu tumutekye “muyile kukumina kwaye.” Bwatudya kuka bya kwibikita, abitungu tulongye Bible bwatudya kumwiuka kalolo. Su tubakitshi byabya Yehowa akateemesha nteko yetu.
TWI BALOMBENE KUTEKA BINTU KINYI?
Teka bwa bintu byodi nabyo lukalo. Twi balombene kuteka Efile Mukulu bintu byatudi nabyo lukalo kwifuku n’efuku bu bilamba, bidibwa na mbalo ya kushala. Twi balombene kuteka binangu bwatudya kwata bitshibilo bibuwa na bukome bwatudi balombe kunyingila bitompwanga. Twi kuteka Efile Mukulu bwa’shi etupe lukumino, etufwile lusa na etukwashe.—Luka 11:3, 4, 13; Shake 1:5, 17.
Teka bwa bangi. Nshe bana sha kifulo asangalaa nsaa yamono bana baye mbefulene. Nka bu baledi, Yehowa namu akuminaa shi bana baye be pa nsenga bekale befulene. Twi kuteka bwa mwina dibaka netu, bwa kifuko kyetu, bwa bana betu sunga bwa ba kuuku betu. Shake mulongi a Yesu bafundjile’shi: “Muntu oso atekyele mwinaye.”—Shake 5:16.
Tumbula Efile Mukulu mu luteko. Bible akula pabitale Mupangi eetu’shi: “Etukitshinaa bibuwa pa kunokyesha mpeshi na kwinupa byumbulwa pa kipindji kyabo, enupeyaa byakudya na kuusha mashimba eenu na muloo.” (Bikitshino 14:17) Nsaa yatunangushena pabitale byoso byabadi betukitshine kwi Efile Mukulu, abitutakula bwa kumulesha lutumbu mu luteko. Twi balombene dingi kulesha Efile Mukulu lutumbu pa’twe kumukokyela mu nshalelo etu.—Bena-Kolose 3:15.
IKALA NA LWISHINKO NA OTUNGUNUKYE NA KUTEKA
Ingi nsaa twi balombene kutshoboloka nsaa yatukutwa kupeta ngalulo ya ku nteko yetu ayikatukila mwishimba. Twi balombene kwakula’shi Efile Mukulu tetupasukilaa su? Nya! Tala ino myanda ayilondo ayishinkamisha’shi twi na lukalo lwa kutungunuka na kuteka.
Steve atudi batemune ku mwisambo wa kumbangilo akula’shi: “Panalekyele kutunguka na kuteka, nadi mushimishe lukumino lwande loso lwa kwikala dingi na muloo.” Nkinyi kibadi kimukwashe bwa kushintuluka? Babangile kulonga Bible, aye nkulonga bya kwikala na kyubishi kya kuteka na batungunukile na kwibikita. Steve amba’shi: “Nelaa luteko bwa kutumbula Efile Mukulu bwa bukwashi boso bwandji mupete abutukila kwi ba kuku bande ba kifulo. Bwa binobino ne na muloo washangikalanga nao kumpala.”
Twi kwamba naminyi bwa Jenny badi epusha’shi Efile Mukulu nta mulombene kuteemesha nteko yaye? Akula’shi: “Panadi nepusha mutshobolokye, nadi nesendeela Efile Mukulu bwa’shi ankwashe mpushe bwakinyi nkwete kwimona bu’shi na muulo.” Bino bibadi bimukwashe naminyi? Akumbasha’shi: “Kuteka Efile Mukulu kubadi kunkwashe bwandya kwimona bu abimmonaa Efile Mukulu, na kumona’shi su eshimba dyande adintopeka, Efile Mukulu takwete kumona byabya nya. Bino bibankwashishe bwadya kuleka kukooka na bwandya kutungunuka na kwikitshisha.” Mbitushe bipeta kinyi? Akumbasha dingi’shi: “Luteko ndukwashe bwadya kumona Yehowa bu Efile Mukulu a binyibinyi, Efile sha kifulo, ampasukila, Nshami na Kuuku ekala kwanka bwande efuku dyoso pantungunuka na kwikitshisha bwa kukita kikyebe ky’eshimba dyaye.”
Isabel akula’shi: “Pankwete kumona mwana ande e na muloo mu nshalelo aye sunga mbyadi na kilema, ne mushinkamishe’shi nyi ndwalulo lukile buwa lwa ku nteko yande”
Tala dingi myanda ifumankane nayo Isabel. Pabadi n’eyimi, ba doktere baye abamulungwile’shi, mwana akatanda atuku na kilema. Bibadi bimukalakashe ngofu. Bangi abadi mpa na bamulungule’shi akatushe eyimi. Amba’shi: “Nadi napusha nka bu’mi a kufwa mwanda wa kinyongwa kibadi mwishimba.” Bakitshine kinyi? Amba dingi’shi: “Natekyele Efile Mukulu misango na misango bwa’shi ankwashe. Kunyima kwa mafuku apela natandile mwana mulume badi nka na kilema, twamudika bu Gerard.” Isabel apusha’shi Yehowa badi mwalule ku nteko yaye su? Oolo ngi byakwete kupusha! Mu mushindo kinyi? Akula’shi: “Pankwete kumona mwana ande tadi na bipwa 14, na e nka na muloo sunga byadi na kilema, ne mushinkamishe’shi uno mwana ande nyi ndwalulo lukile buwa lwa ku nteko yande, na nyi mwabi ukata ufikye kwi Yehowa Efile Mukulu.”
Bino bishima abikumu ku mashimba abitutakula mu kunangushena ku mayi a Kayimba ka misambo aamba’shi: “Yehowa oteemeshaa lukalo lwa beyishe. Opoosha eshimba dyabo, webateemesha.” (Misambo 10:17) Kano nyi nkabingilo kakile buwa aketutakula bwa kunyingila mu nteko!
Atupete nteko ya Yesu ibungi mu Bible. Na lukambe kukiibwa nduno lubadi mulongyeshe balongi baye. Twi balombene kulongyela kinyi ku lwanka?