Ba nsongua: Tungunukayi na kuenda kumpala kunyima kua lubatshisho

1. Mianda kinyi i buwa yabadi bakite kui ba nsongua be bungi?

KU KIPUA kioso, binunu bia ba nsongua bena Kidishitu bakuete kubatshishibua. Obe namu we muele dino etabula su? Su nyi biodi mukite, bakuenu balume na bakashi ba mu kikudi be na muloo pa muanda oobe, na Yehowa namu e na muloo! (Nki. 27:11) Banda kunangushena kapindi, pabitale mianda i buwa yodi mukite. We mulongie Bible pangi munda mua bipua. Kulonga koobe kukushinkamishe’shi Bible nyi Eyi di’Efile Mukulu. Kukatusha biabia, we mufikie mu kuuka na kufula Nsulo a uno mukanda wa kishila. Kifulo kiobe bua Yehowa nkitame mu mushindo ubuata kitshibilo binobino, kia kuilambula na kubatshishibua bu mufubi aaye. We muate kitshibilo ki buwa bukile!

2. Nkinyi ki’atukesambila mu uno muisambo?

² Kushi mpaka lukumiino lobe ndutompibue mu misuusa i bungi, kumpala k’obe kubatshishibua. Anka bu biende na kukula, okapete bingi bitompuanga. Satana akatompo kubofusha kifulo kiobe bua Yehowa na kukutakula bua’shi olekie Kumufubila. (Ef. 4:14) Totadilanga’shi bino bikukitshikile. Nkinyi kilombene nkukuasha bua kulama lulamato kui Yehowa, na kulombasha mutshipo oobe wa kuilambula? Abitungu otungunukie na kufuba ngofu bua kuikala muina Kidishitu munyingie mu kikudi. (Eb. 6:1) We kukita bino mushindo kinyi?

NKINYI KIODIA KUKITA BUA KUIKALA MUINA KIDISHITU MUNYINGIE MU KIKUDI?

3. Abitungu bena Kidishitu booso bakite kinyi kunyima kua lubatshisho?

³ Kunyima kua lubatshisho, atue booso atuikalaa na lukalo lua kulonda elango dia Mpoolo mutumibua di bapeele bena Kidishitu neetu ba mu Efeso. Baadi muibanyingishe buabadia kufika bena Kidishitu “balombanyinyîne.” (Ef. 4:13, EEM) Uno nyi ungi mushindo ubebalunguile, bua ‘kutungunuka na kuenda kumpala.’ Tui balombene kupusha kibaadi Mpoolo akiebe kuamba, nsaa ibaadi mupuandikishe kukula kua mu kikudi, na abikulaa muana ku mbidi. Muana p’atandikua, baledi baye abekalaa na muloo na nnfiedi pa muanda waye. Anka abauku’shi t’ashaala nka bu muana mukinga bua looso. P’ende na kukula, ‘alekie kukita byooso bya bu mwana mukinga.’ (1 Kod. 13:11) Bi mumune nyi bua bena Kidishitu. Kunyima kua kubatshishibua, abitungu tutungunukie na kuenda kumpala mu kikudi. Tutaleyi ingi mianda ilombene kuitukuasha buatudia kuibikita.

4. Eyikashi kinyi dilombene kuitukuasha bua kuenda kumpala mu kikudi? Patuula. (Bena-Fidipe 1:9)

⁴ Tamisha kifulo kiobe bua Yehowa. We mupue kubadiila kufula Yehowa ngofu. Anka abitungu kifulo kiobe kinyishe kutama kuadi. Mushindo kinyi? Mpoolo mutumibua baadi muakule mushindo umune, w’atupete mu Bena-Fidipe 1:9. (Badika.) Mpoolo baadi mutekiele bena Kidishitu ba mu Fidipe’shi, “kifulo kyeenu kitame anka kutama.” Biabia kifulo kietu nkilombene kutama. Tui balombene kukita bino pa kukimba “kiukilo na mu kapatupatu kooso.” P’atunyisha kuuka Yehowa, atunyisha kumufula na kusankila bumuntu buaye, na mushindo w’akita mianda. Nsaa ayitama lukalo luetu lua kumusankisha, t’atukumiina kukita kintu su nkimune akimuinyongosha. Atuikitshisha bua kuuka ki’akiebe’shi tukite, na mushindo wa kuikikita.

5-6. Mmushindo kinyi watudi balombene kutamisha kifulo kietu bua Yehowa? Patuula.

⁵ Yesu baadi muambule bumuntu bua Yehowa mu mushindo upuidikie? Biabia nsaa y’atuuku Yesu kalolo, atunyisha kufula Yehowa ngofu. (Eb. 1:3) Biabia mushindo wi buwa wa kuuka Yesu kalolo, mpa kulonga ma Evanjile ananka, pabitale nshalelo aaye. Su tuena kiubishi kia kuibadikilanga Bible efuku dioso, buakinyi tue mulombene kubanga binobino? Nsaa y’obadika pabitale nshalelo a Yesu, shimika kasele pa ngikashi yaye. Bantu babaadi abakumiina kushaala naye na kuakula naye, na baadi asemuna bana bakinga mu maboko aaye. (Mak. 10:13-16) Yesu baadi na kalolo, na baadi dingi kuuku balongi baaye, na balongi baaye tababaadi na moo wa kumulungula bi’abepusha. (Mat. 16:22) Pabitale uno muanda, Yesu baadi muambule Nshaye e muiyilu. Na Yehowa namu bantu abepushaa bulungantu bua kumulungula mianda. Tui balombene ku mulungula mianda mu luteko. Nsaa y’atutekie, tui balombene kumufunguila eshimba dietu. Tui bashinkamishe’shi t’etutopekaa. Muitufule na etupasukilaa.​—1 Mp. 5:7.

⁶ Yesu baadi apusha bantu lusa. Mateo mutumibua balesheshe’shi: “Pa kumona kibumbu kya bantu, aye nkupusha lusa, mwanda babaadi bakookye, na bafwambukye buu mikooko ishii na mulami.” (Mat. 9:36) Na Yehowa epushaa naminyi? Yesu bambile’shi: ‘Biabia, tankikyebe ki’eshimba dia Nshami e mwiulu, bwa’shi umune a ku bano bakinga ashimine.’ (Mat. 18:14, Kilombeeno Kipya 2014) Ano mayi aetuikasha na muloo, muanda aetulesha’shi Yehowa muitufule ngofu! P’atunyisha kuuka Yesu kalolo, kifulo kietu bua Yehowa akitama.

7. Kukisha nsaa na bakuetu bena Kidishitu banyingie mu kikudi nkulombene nkukuasha naminyi?

⁷ We mulombene dingi kulonga bia kuikala na kifulo na kuenda kumpala mu kikudi, pa kukisha nsaa na bakuetu balume na bakashi banyingie mu kikudi ba mu kakongie keenu. Tala mushindo wabadi na muloo. T’abenyongolaa pabitale kitshibilo kiabo kia kufubila Yehowa nya. Ebayipushe bakulungule pabitale, ingi mianda yabadi bamone mu mudimo wa Yehowa. Nsaa yokiebe kuata kitshibilo kikata, ebatekie binangu. Na kunyima a bioso, “mianda ayiyiyaa kalolo, su kui bantu be bungi abatuusha malango.”​—Nki. 11:14, NWT.

8. We mulombene kukita kinyi su bosangana’shi, we na mpaka pabitale abiakula Bible?

⁸ Katusha mpaka yoobe. Nka bu biabadi bebileshe mu kikoso kia 2, Satana atompo bua’shi akukutshishe kuenda koobe kua kumpala mu kikudi. Mushindo umune wadi mulombene kui bikita, mpa kukuikasha na mpaka pabitale angi malongiesha a mu Bible. Bu kileshesho, lelo uno sunga ku kala bangi bantu balombene nkukuminyisha’shi Efile Mukulu ta muitupangie, tui kuanka muanda tui betuukile. Nsaa iboodi muana mukinga, pangi toboodi onangusheena pabitale uno muanda, anka puende na kukula okuete kuibimuena p’abebilongiesha ku kalasa. Abiakula balongieshi boobe bua kukuatshishena uno muanda wa bintu bitukile, we kuibimona’shi nyi biabidi, mbia binyibinyi. Anka tabaatshile namu nsaa ya kutaluula, bua kuuka su kui Mupangi. Tentekiesha eyi dia kulonda di mu Nkindji 18:17 adiamba’shi: “Ku kilumbu, muntu asamba kumpala amwekaa buu mululame; apakafiki aasamba naaya, abanga kumwelesha mpaka.” Pamutue pakuikadika bu mpofu akumiina binangu bioso bibapusha ku kalasa, abitungu tutaluule kalolo bia binyibinyi biatupete mu’Eyi di’Efile Mukulu, Bible. Kimbuula mu mikanda y’eetu. Esambe na bakuetu balume na bakashi babaadi abakumiina mu mianda ya bintu bitukile kala. Ebayipushe kibaadi kibashinkamishe’shi, kui Mupangi muitufule. Nsaa y’atuisamba naabo, mbilombene kuitukuasha bua kupeta kishinkamiisho akilesha’shi kui Mupangi.

9. Nkinyi ki bolongiela ku muanda umone Melissa?

⁹ Mukuetu mukashi abetanyinaa bu Melissa, mupete bukuashi bukata mu kukimbuula kuaye pabitale bipangua.b Amba’shi: “Mu kalasa balongieshi abapatuula muanda wa bintu bitukile mu mushindo autakulaa bantu mu kunangushena’shi mbia binyibinyi. Kumpala, naadi na moo wa kukatusha mpaka yande. Kala, ntshinaadi akumiina kukimbuula nya. Muanda naadi na moo’shi tala nakapeta’shi muanda wa bintu bituukile ngua binyibinyi. Anka naadi munangushene’shi Yehowa t’akumiina’shi tumufubile bu ba mpofu. Biabia, naadi mukambile mpaka yande. Nabangile kubadika mukanda wa Y a-t-il un Créateur qui se soucie de vous ? na broshire a La vie a-t-elle été créée ? na a Cinq questions à se poser sur l’origine de la vie. Bino nyi binaadi nabio lukalo. Nadia kuikala muibikite kubanga kala.”

10-11. Nkinyi kilombene nkukuasha bodia kushaala na muikeelo wi buwa? (1 Bena-Tesalonika 4:3, 4)

¹⁰ Leka muikeelo wi bubi. Nsaa y’oki nsongua, malaka a kukita lusandi, ngalombene kuikala e bukopo, na ingi nsaa bangi mbalombene nkutakula bua kuilukita. Satana nyi akumiina’shi we bikite. Nkinyi kilombene nkukuasha bua kulama muikeelo wi selele? (Badika 1 Bena-Tesalonika 4:3, 4.) Mu nteko y’oobe ya bupenka lungula Yehowa biepusha, na mutekie akupe bukome bua kukambila bianka. (Mat. 6:13) Tentekiesha’shi Yehowa akumiina nkukuasha, na t’akutopeka nya. (Mis. 103:13, 14) Bible mmulombene dingi nkukuasha. Melissa atatupuile kutemuna kunundu, baadi muikitshishe bua kukambila binangu bi bubi. Amba’shi: “Kubadika Bible efuku dioso nkukuashe bua kukambila malaka e bubi. Na mbi tentekieshe’shi ne ku lupese lua Yehowa, na’shi nakumiina kumufubila.”​—Mis. 119:9.

¹¹ Tokimbanga bia kupudisha mianda obe nabene. Esambe na baledi boobe pabitale lukalakashi loobe. T’abikalaa bi bofule bua kuisamba na muntu pabitale mianda yoobe nya, sunga mbiabia bi na muulo kuibikita. Melissa amba dingi’shi: “Natekiele bua kuikala n’eshimba dinyingie, na dingi kuisamba na papa pabitale muanda wande. Kunyima kua paapa nepushiishe bi buwa ngofu. Na naadi muiwukie’shi Yehowa e na nfiedi pa muanda wande.”

12. Mushindo kinyi oodi mulombene kuata bitshibilo bi buwa?

¹² Ikala okunkushibua na mayi a kulonda a mu Bible. Nsaa yw’ende na kukula baledi boobe abakulekela bulungantu bua kuiatshila bitshibilo. Anka kui mianda i bungi yoshobandile kuuka. Mmushindo kinyi oodi mulombene kuleka kukita bilubilo, bilombene kuikala na bukitshishi ku kipuano kiobe na Yehowa? (Nki. 22:3) Mukuetu mukashi abetanyinaa bu Kari, apatuula kibaadi kumukuashe bua kuata bitshibilo bi buwa. Mmufikie mu kumona’shi muina Kidishitu munyingie mu kikudi, te na lukalo lua muiya wa kumukunkusha pabitale muanda ooso nya. Amba’shi: “Naadi na lukalo lua kupusha mayi a kulonda a mu Bible, pamutue pa kupusha penda miiya.” Nsaa y’obadika Bible eyipushe’shi: ‘Kino kifundue akindongiesha kinyi pabitale abinangushena Yehowa? Mui angi mayi a kulonda andi mulombene kufubisha, bua adia kukunkusha bua kukita mianda i buwa mu muikeelo wande? Nsaa yankitshi abidongiesha Bible abikuansha naminyi?’ (Mis. 19:7; Yesh. 48:17, 18) Nsaa y’obadika Bible na kunangushena ku mayi a kulonda e muanka, osangana’shi mbibofule bua kuata bitshibilo abisankisha Yehowa. Nsaa y’otungunuka na kuenda kumpala mu kikudi, osangana’shi t’okekala na lukalo na muiya aukukunkusha pa muanda ooso, muanda okauuku abinangusheena Yehowa pa muanda ooso.

13. Ba kuuku be buwa mbalombene kuikala na bukitshishi kinyi koodi? (Nkindji 13:20)

¹³ Sangula ba kuuku bafule Yehowa. Nka bu biatudi bebimone kunundu, kusangula koobe kua ba kuuku kui na bukitshishi bukata mu kutama koobe kua mu kikudi, bu biodi muina Kidishitu. (Badika Nkindji 13:20.) Mukuetu mukashi abetanyinaa bu Sara baadi mushimishe muloo waye. Anka kui kingi kintu kibakitshikile kibaadi kimukuashe bua kupetuula muloo waye. Sara etulondela’shi: “Naadi mupete ba kuuku be buwa, mu kipindi kilombane. Ami na ungi mukuetu mukashi ki nsongua, tu babangile kulonga Kitenta kia Mulami kia kulonga pamune lubingo looso. Ungi kuuku ande baadi mukuashe bua kubanga kutusha ngaluulo mu bisangilo. Pa muanda wa bukitshishi bua ba kuuku bande, nabangile kuata kuilongiela na kuteka na muulo ukata. Nabangile kutamisha na kunyingisha kipuano kiande na Yehowa, na ami nkupetuula dingi muloo wande.”

14. Mushindo kinyi ubaadi Julien musangule ba kuuku be buwa?

¹⁴ Kuikala mu bu kuuku na bantu, nkulombene kuikala na bukitshishi kinyi bui buwa koodi? Julien kuete kufuba bu mukulu lelo uno, amba’shi: “Nsaa inaadi nsongua naadi musangule ba kuuku be buwa, banaadi nandungula naabo mukandu wi buwa. Bano ba kuuku basha kisumi babaadi bankuashe, bua kumona mushindo wa kusankila mudimo wa bulungudi. Nabangile kuikala na kepatshila kande ka kulungula mukandu wi buwa nsaa yoso. Naadi mumone’shi, ne mushimishe ba kuuku be buwa penda muanda wa’shi, naadi nakimbi penda ba kuuku ba mulongo wande. Kunyima, naadi mupete dingi ba kuuku be buwa ku Betele. Bileshesho biabo mbikuashe, bua kulumbuula mushindo wande wa kukisha kapapi, na mbikuashe bua kuifubuila peepi na Yehowa.”

15. Mpoolo baadi mudimushe Timote pabitale ba kuuku naminyi? (2 Timote 2:20-22)

¹⁵ We mulombene kukita kinyi su bomono’shi, kukisha nsaa na ungi muntu a mu kakongie, nkulombene kuluisha kipuano kiobe na Yehowa? Mpoolo baadi auku’shi bangi bantu ba mu kakongie ka mu siekele a kumpala, ta babaadi na mueneno e buwa a mianda ya mu kikudi, nyi buakinyi balunguile Timote bua kuikala naabo kula. (Badika 2 Timote 2:20-22.) Kipuano kietu na Yehowa ki na muulo. Tukuete kuikitshisha ngofu bua kuifubuila peepi na Yehowa, biabia t’abitungu’shi ba kuuku beetu baluishe ki no kipuano nya.​—Mis. 26:4.

MUSHINDO KINYI ODIA KUATA BIPATSHILA ABIKUKUASHA BODIA KUENDA KUMPALA MU KIKUDI?

16. Mbipatshila bia mushindo kinyi abitungu’shi osangule?

¹⁶ Ata bipatshila abikukuasha. Sangula bipatshila bilombene nkuakuasha bua kunyingisha lukumiino loobe, na kuikadika muina Kidishitu munyingie mu kikudi ngofu. (Ef. 3:16) Bu kileshesho, pangi we mulombene kuata kitshibilo kia kulumbuula kiubishi kiobe kia kulonga na kuibadikila Bible pa bupenka. (Mis. 1:2, 3) Sunga’shi we mulombene kutompa kuteka misuusa i bungi, na nteko yoobe ayitukila muishimba. Abitungu odimukie ngofu pabitale kukisha kua kapapi kosangula, sunga mushindo ofubisha nsaa yoobe. (Ef. 5:15, 16) Nsaa ayimono Yehowa biokuete kuikitshisha ngofu bua kutama mu kikudi, abimusankisha.

17. Mmiloo kinyi ayifikaa mu kukuasha kua bangi?

¹⁷ Onyinsha kuikala muina Kidishitu munyingie mu kikudi, nsaa y’okuasha bangi. Yesu bambile’shi: “Muloo wa kupaana ngukile wa kupeebwa.” (Bik. 20:35, Kilombeeno Kipya 2014) Abikakuikasha na muloo wi bungi, su bofubisha nsaa yoobe na bukome boobe bua ku bunsongua bua kukuasha bangi. Bu kileshesho, we kuiatshila kano kepatshila ka kukuasha bakuetu babaapu kukula na balemane ba mu kakongie keenu. Pangi we mulombene kuibakuasha pa kuenda mu kisalue mu nkebaudila bintu, na kuibakuasha buabadia kufubisha tuamo tuabo. Su we muana mulume, ata kepatshila ka kufika mufubi a midimo, na kinangu kia kukuashanga bakuenu balume na bakashi. (Fid. 2:4) We kulesha dingi kifulo kushi penda bantu ba mu kakongie keenu, pa kuibalungula mukandu wi buwa wa Bufumu. (Mat. 9:36, 37) Su bino bioso bi kukitshika, we mulombene kuibikasha bu kepatshila koobe ka kufubila Yehowa mu mudimo wa nsaa yooso.

18. Kufuba mu mudimo wa nsaa yooso nkulombene nkukuasha naminyi bua kuifubuila kui Yehowa?

¹⁸ Mudimo wa nsaa yooso, ngulombene nkupa ingi mishindo ya kuifubuila peepi na Yehowa. Kufuba bu mbala-mashinda nkulombene nkufunguila kibelo kia kutuela mu Kalasa ka Balungudi ba Bufumu. We kupeta mushindo wa kufuba ku Betele, sunga mu mudimo wa luibako lua mashibo a Bufumu. Mukuetu mukashi ki nsongua mbala-mashinda abetanyina bu Kaitlyn amba’shi: “Kukisha nsaa mu bulungudi na bakuetu balume na bakashi bamone mone mianda, ubaadi muanda ukata unkuashe bua kutama mu kikudi kunyima kua lubatshisho luande. Bileshesho biabo, mbintakule bua kutamisha kiukilo kiande kia Bible, na kulumbuula mayele ande a kulongiesha.”

19. Mmiabi kinyi y’atupete su tubatungunuka na kutama mu kikudi?

¹⁹ Su botungunuka na kutama mu kikudi, Yehowa akakupa bintu bi bungi bia mu kikudi. Tue mulombene kushimisha bu nsongua boobe, mu kulonga bipatshila bishi na muulo. (1 Yo. 2:17) Abikukaluila ku nkalakashi yoodi mulombene kupeta, su buata bitshibilo bi bubi. Kukatusha biabia, okekala na nshalelo a binyibinyi, na muloo. (Nki. 16:3) Kileshesho kiobe ki buwa akikanyingisha bena Kidishitu noobe, bakinga na bakulu. (1 Tim. 4:12) Na ki na muulo ukata, okekala na butaale na muloo autuukila, mu kusankisha Yehowa na kuikala naaye mu kipuano.​—Nki. 23:15, 16.