Nkonko ya bantu ababadikaa
Yesu pa bakitshine kidibua kia Muanana, balongi 70 babatumine mu kulungula mukandu wi buwa kumpala babaadi kunyi? Babaadi bamusumbushene su?
Ta tui bia kunangushena’shi bu bishi bipetekielue bano balongi 70, nsaa ibaadi Yesu mukite kidibua kia Muanana, babaadi bamusumbushene sunga’shi ta babaadi bakuminyibue naaye nya. Yesu baadi akiebe penda kuikala na balongi baye mu yaaya nsaa.
Yesu baadi mukumiine bisaka bioso bididi, kia balongi 12 na kia balongi 70. Ku mbangilo, Yesu basanguile penda balongi 12, babaadi muitanyine bu batumibua, munkatshi mua balongi baye be bungi. (Luk. 6:12-16) Yesu pa baadi ku Ngalileya “bayitanyine batumibua Ekumi na babidi” na “aye nkuibatuma mu kulungula mukandu wa Bufumu bu’Efile Mukulu na kupaasha baaba abakumbu.” (Luk. 9:1-6) Kunyima, pa baadi Yesu ku Yundeya, baadi “musangule bangi balongi 70 na ebatuma babidi babidi.” (Luk. 9:51; 10:1) Yesu baadi na balongi mu ma mbalo elekeenelekeene babaadi abalungula mukandu waye.
Bena Yunda babafikile balongi ba Yesu, babatungunukile na kuibunga pamune na bifuko biabo bua kukita musangeelo wa Pasaka ku kipua kioso. (Efi. 12:6-11, 17-20) Bu bibaadi abifubuila nsaa ya lufu luaye, Yesu na batumibua baye babayile ku Yelusalema. Anka, ta baadi muitanyine balongi baye babaadi ku Yunda, mu Ngalileya, na ku Peré bua’shi bafikie bua kukita musangeelo wa Pasaka pamune nya. Abipushika kalolo’shi, Yesu baadi mukumiine kuikala na penda batumibua 12, mu diadia efuku. Bebalunguile’shi: “Nekalanga na lukalo lukata lua kudia nenu uno Pasaka kumpala kua’shi nkiengie.”—Luk. 22:15.
Kubaadi kabingilo ke buwa ka kukita biabia. Yesu baadi peepi na kufua bu “Muana a mukooko a Efile Mukulu yawa akatusha miluisho ya bantu ba pa nsenga.” (Yo. 1:29) Bino bibaadi bikitshikile ku Yelusalema, ku baabadi abalambuila Efile Mukulu milambu kubanga kala. Kukita musangeelo wa Pasaka bua kudia muana a mukooko, kubaadi kulombene kutentekiesha bena Isalele’shi Yehowa baadi muibafungushe mu bupika mu’Ejipitu. Anka kukiila ku mulambu waye wa nkuulo, Yesu mmukite bi bungi kukila kudia muana a mukooko. Baadi mufungushe bantu booso ku bupika bua muluisho na lufu. (1 Ko. 5:7, 8) Kiakia kibakitshine Yesu, kibakuashishe batumibua buabadia kuikala bu bena Nkidishitu ba kumpala mu kakongie ka bena Nkidishitu. (Ef. 2:20-22) Abitungu tuwukie’shi, Yelusalema kibundi kiselele kibaadi na “mabue a kitako 12” na babaadi bekufunde “mashina 12 a batumibua 12 ba Muana a mukooko.” (Kbf. 21:10-14) Mu binyibinyi, batumibua ba sha lulamato, be na mudimo ukata mu kulombasha kua mpango y’Efile Mukulu. Abipushika kalolo buakinyi Yesu baadi mukumiine kukita musangeelo wa nfudiilo wa Pasaka na balongi baye, na akupu nka paapa, aye nkukita Kidibua kia Muanana.
Balongi 70, na bangi balongi ta babaadi bakite kino Kidibua pamune na Yesu nya. Su booso babadia kushaala na lulamato, babadia kupeta muabi autuukila ku Kidibua kia Muanana kibabakitshine kui Yesu. Baaba booso babadia kuedibua muimu mu kukila kua mafuku, babaadi balombene kutuela mu kilombeno kia Bufumu kibabalunguile batumibua kui Yesu buabua bufuku.—Luk. 22:29, 30.