MUISAMBO WA KULONGA 5
LOONO 108 Kifulo kya Yehowa ki na lumato
Bintu bi buwa bi’atupete kukiila ku kifulo kia Yehowa
“Nkidishitu Yesu bafikile pa nsenga bua kupaasha ba sha miluisho.”—1TI. 1:15.
KI’ATUISAMBILA
Atuisambila bukuashi bu’atupete ku nkuulo na biatudia kulesha Yehowa lutumbu.
1. Tui kukita kinyi bua kusankisha Yehowa?
PUANDIKISHA’SHI bopa muntu kia buntu ki buwa na akimukuasha. Bi nkukalakasha ngofu su yawa muntu asumbushena kiakia kia buntu na akekituula mbalo yashelela su binangu! Ku lungi lupese, wekala na muloo wi bungi su yawa muntu ekala afubisha kiakia kia buntu mu mushindo wi buwa na akutumbula. Kino kileshesho nkipushene na kia buntu kia Yehowa kia nkuulo naminyi? Yehowa baadi mutuushe Muana aaye bua’shi etufuile. Yehowa ekalaa na muloo nsaa y’amono atulesha lutumbu bua kia buntu kiaye ki buwa na bua kifulo kiaye, kifulo kibaadi kimutakule bua kutuusha nkuulo!—Yo. 3:16; Lom. 5:7, 8.
2. Nkinyi ki’atuisambila mu uno muisambo?
2 Anka muenda mafuku, tui balombene kuleka kulesha lutumbu bua nkuulo. Abikala nka bu’shi tubasumbushena kia buntu ki’Efile Mukulu, tubekituulu mbalo yatush’atuelela sunga binangu. Bua kupela’shi bino tabikitshikanga, abitungu tuikale atunangushena pabitale bioso bitukitshine Efile Mukulu na Nkidishitu. Uno muisambo awitukuasha bua kukita nka biabia. Atuisambila miabi yatupetala ku nkuulo lelo uno na yatukapete mu mafuku aafiki. Atuisambila dingi kiatudia kukita bua kulesha lutumbu bua kifulo kia Yehowa, bikishekishe mu kipungo kia Kitentekiesho.
MIABI YATUPETE BINOBINO
3. Mushindo kinyi watukuete kupeta miabi ya mulambu wa nkuulo lelo uno?
3 Tui bapue kubanga kupetela miabi ya mulambu wa nkuulo wa Nkidishitu. Bu kileshesho, ku buakuashi bua nkuulo, Yehowa etufuila lusa ku miluisho yetu. Te mu kitungo kia kuibikita. Anka akumiina kuibikita. Ungi mufundi a misambo baadi muleshe lutumbu bua lusa lua Yehowa, bambile’shi: “Obe Yehowa, we na kalolo na lusa.”—Mis. 86:5; 103:3, 10-13.
4. Mba nanyi babadi batushishe nkuulo kui Yehowa? (Luka 5:32; 1 Timote 1:15)
4 Bangi abepushaa bu bashi balombene lusa lua Yehowa. Bua kuakula kalolo, atue boso tatuibelulombene. Mpoolo baadi amba’shi “ta mulombene kuitaminyibua bu mutumibua.” Anka bakuile dingi’shi: “Ne bino biandi ku bukuashi bua kalolo k’Efile Mukulu.” (1 Ko. 15:9, 10) Su tubelanga ku miluisho yetu, Yehowa etufuila lusa. Buakinyi? Ta pa muanda wa’shi tui balombene lusa luaye, kadi pa muanda wa’shi muitufule. Su okuete kuinyongola pa muanda wa’shi tue mulombene lusa lua Yehowa, tentekiesha’shi Yehowa mutuushe nkuulo, kushi bua bantu bash’abakitaa miluisho, kadi bua ba nkitshishi ba miluisho abelanga.—Badika Luka 5:32; 1 Timote 1:15.
5. Abitungu tupuandikishe’shi Yehowa e mu kitungo kia kuitufuila lusa su? Patuula.
5 T’abitungu muntu su ngumune a kuatudi apuandikishe’shi Yehowa amufuila lusa penda pa muanda wa’shi bapu kumufubila munda mua bipua bi bungi. Eyendo, Yehowa tayilua bioso biatudi bamukitshine nya. (Eb. 6:10) Mutuushe Muana aaye bu kia buntu, kushi bu efuto dia mudimo watudi bamukitshine. Biabia, bi bubi kunangushena’shi pa muanda tuibafubile Yehowa munda mua bipua bi bungi, abitungu etufuile lusa. Su tuanangushena biabia, bi nka bu’tue abamba’shi ta tui na lukalo lua nkuulo, Yesu baadi mufue bua bisumanga.—Tala Bena Ngalateya 2:21.
6. Buakinyi Mpoolo baadi muipaane mu mufubo wa Yehowa?
6 Mpoolo baadi auku’shi sunga akita naminyi, ta mulombene lusa lu’Efile Mukulu. Biabia, buakinyi baadi muipaane ngofu mu mudimo wa Yehowa? Baadi mukite bino bua kulesha lutumbu bua kalolo ka Yehowa. (Ef. 3:7) Nka bu Mpoolo, atutungunuka na kufubila Yehowa na kisumi, kushi bua’shi etufuile lusa, kadi bua kumulesha lutumbu.
7. Ungi mushindo kinyi wa tukuete kupetela miabi ya nkuulo lelo uno? (Bena Loma 5:1; Yakobo 2:23)
7 Ungi mushindo wa tukuete kupetela miabi ku nkuulo lelo uno ngua’shi, tui mu kipuano ki bukopo na Yehowa.a Nka bu biatuibimuene mu muisambo ushale, nsaa y’atutandikua, tatuikalaa mu kipuano na Yehowa nya. Anka pa muanda wa nkuulo, tui mu “butaale n’Efile Mukulu” na tuikuifubuila pepi naye.—Badika Bena Loma 5:1; Yakobo 2:23.
8. Buakinyi abitungu tuleshe Yehowa lutumbu bua kinemo kiadi muitupe kia ku muteka?
8 Kuteka Yehowa nyi mushindo wi pabuao aulesha’shi tui mu kipuano naye. Yehowa t’apushaa penda nteko ya muilo waye nsaa yaudi wi bungie pamune nya, kadi mpa na nteko ya muntu pa bupenka. Luteko aluitukuasha bua kupela kukamba kuinyongola, anka kui bingi bipeta bi buwa abitukila ku luteko. Lui kunyingisha kipuano kietu n’Efile Mukulu. (Mis. 65:2; Yak. 4:8; 1 Yo. 5:14) Pa baadi pa nsenga, Yesu baadi atekie misuusa yoso muanda baadi auku’shi Yehowa baadi amuteemesha, na’shi luteko alulama kipuano kiaye na Nshaye kinyingie. (Luk. 5:16) Tui na lutumbu lukata, muanda ku bukuashi bua nkuulo tui kuikala ba kuuku ba Yehowa, na tui kuisamba mpa na naye mu luteko!
MIABI YATUKAPETE MU MAFUKU AAFIKI
9. Ku bukuashi bua nkuulo, bafubi basha lulamato ba Yehowa abakapete muabi kinyi?
9 Balanguidi ba Yehowa ba sha lulamato, abakapete miabi kinyi mu mafuku aafiki ku bukuashi bua nkuulo? Abakapete muwa wa ikalayika. Bantu be bungi abamba’shi bino ta mbilombene kukitshika, muanda bantu bakuete nka kufua takudi bipua bi bungi. Anka mpango ya Yehowa ya ku kibangilo ibaadi’shi bantu bekale na muwa wa ikalayika. Su Adama ta baadi mukite muluisho, muntu su ngumune ta badia kunangushena’shi bi bukopo kuikala na muwa wa ikalayika. Sunga tuanangushena’shi bi bukopo kuikala na muwa wa ikalaika, tuikale bashinkamishe’shi abikakitshika, muanda Yehowa mutuushe Muana aaye bua’shi bino bikitshikie.—Lom. 8:32.
10. Nkinyi akitengiela bedibue muimu na ingi mikooko?
10 Sunga biekala’shi muwa wa ikalayika nyi kia buntu ki’atukapete mu mafuku aafiki, Yehowa akumiina’shi tubangie kunangushena ku yanka kubanga binobino. Bena Nkidishitu bedibue muimu abatengiela n’eshimba kuyilu nkekala na muwa muiyilu bua kukunkusha nsenga pamune na Yesu. (Kbf. 20:6) Ingi mikooko ayikashala mu Mpaladiso, mbalo ish’ayikekala mitanyo sunga kinyongua. (Kbf. 21:3, 4) We umune a ku bantu bena lukulupilo lua kuikala na muwa wa ikalayika pa nsenga su? Dino efuto ta ndishadile pe dia kuenda muiyilu! Yehowa baadi muitupangie bua’shi tuikale na muwa pa nsenga, biabia kuikala na muwa wa ikalayika pa nsenga akuketuikasha na muloo wi bungi ngofu.
11-12. Miabi kinyi ya mu Mpaladiso yatukuete kutentengiela? (Tala dingi kifuatulo.)
11 Puandikisha abikekala muwa mu Mpaladiso pa nsenga. Tokekalakasha dingi bua maladi sunga lufu. (Yesh. 25:8; 33:24) Yehowa akakupa bintu bioso bi buwa bi’okekala nabio lukalo. Obe okumiina nkalonga kinyi? Nkalonga pabitale nyema, sunga toonyi? Kulonga bia komba? Sunga bia kusola? Mu Mpaladiso atukekala na lukalo lua bantu abebakaa mashibo. Kushi mpaka, akukekala dingi na lukalo lua bidime na bantu ba kuteeka, kupua bintu, kukuna mitshi na kuiyipasukila. (Yesh. 35:1; 65:21) P’okekala na muwa wa ikalayika, okekala na nsaa ibungi ya kukita ino yoso mianda, na ingi i bungi.
12 Atukekala na muloo wi bungi nsaa yatukakukila bantu abasanguka! (Bik. 24:15) Nangushena dingi muloo okekala nao pa nkalonga bintu bi bungi bipangie Yehowa. (Mis. 104:24; Yesh. 11:9) Na muanda wi buwa bukile, t’okakitshi dingi muluisho, biabia okekala na mushindo wa kufubila Yehowa na t’okekala na lukalo lua kufuidiibua lusa . Okumiina kukutua ino yoso miabi bua “muloo wa kapindi kapele autukila ku muluisho” su? (Eb. 11:25) Nya! Ino miabi i na muulo kukila kintu kioso kiatudi balombene kuikala nakio lelo uno. Tentekiesha’shi, Mpaladiso ta mpenda mbalo yatukulupila nya. Nyi mbalo yatukashala. Bino abikakitshika muanda Yehowa muitufule ngofu mu mushindo ubaadi mutuushe Muana aaye bua kuitufuila!
Nkinyi kiokiebe nkakita mu Mpaladiso? (Tala kikoso 11-12)
LESHA LUTUMBU BUA KIFULO KIA YEHOWA
13. Tui kulesha Yehowa lutumbu bua nkuulo mushindo kinyi? (2 Bena Kodinda 6:1)
13 Tui kulesha Yehowa lutumbu bua nkuulo mushindo kinyi? Nyi pa kutuula mudimo waye pa mbalo ya kumpala mu nshalelo eetu. (Mat. 6:33) Na dingi, Yesu bafuile “bua’shi baaba be na muwa tabekalanga nao dingi buabo’bo banabene, anka bekale nao buaye’ye baadi muibafuile.” (2 Ko. 5:15) Yehowa muituleshe kalolo na kuitufuila lusa. P’atukitshi muetu moso bua kumufubila, atulesha’shi tui na lutumbu bua bioso biadi muitukitshine.—Badika 2 Bena Kodinda 6:1.
14. Mushindo kinyi watudia kulesha lukumiino mu bukunkushi bua Yehowa?
14 Tui kulesha dingi Yehowa lutumbu bua nkuulo pa ku mukulupila na kulonda bukunkushi buaye. Mushindo kinyi? Nsaa yatukiebe kuata kitshibilo pabitale bungi bua tulasa tua kulonga sunga mudimo wa kufuba, abitungu tukimbe bi mueneno a Yehowa. (1 Ko. 10:31; 2 Ko. 5:7) Nsaa yatuata bitshibilo bimene mu lukumiino luetu mui Yehowa, paapa lukumiino na kipuano kietu naye abinyisha kunyinga. Na lukulupilo luetu lua kuikala na muwa wa ikalayika alufiki lua binyibinyi.—Lom. 5:3-5; Yak. 2:21, 22.
15. Mbikunyi biatudia kulesha lutumbu mu kipungo kia Kitentekiesho?
15 Ku ki ungi mushindo watudia kulesha Yehowa lutumbu bua kifulo kiaye. Nyi pa kufubisha kino kipungo kia Kitentekiesho bua kulesha Yehowa’shi tui na lutumbu bua nkuulo. Kukatusha kuilumbuula atue bananbene bua kutuela ku Kitentekiesho, tui kuitamina bangi bantu. (1 Ti. 2:4) Patuluila boso boyitamina akikakitshika ku Kitentekiesho. We kuibalesha video amba’shi: Bwakinyi Yesu bafwile? na Tentekyesha lufu lwa Yesu i mu jw.org. Abitungu bakulu betamina balungudi balekie kutuela bisangilo na kulungula mukandu wi buwa. Puandikisha muloo awikala muiyilu na pa nsenga nsaa i umune wa ku mikooko ishimine wa Yehowa ubalukiila mu lombe! (Luk. 15:4-7) Ku Kitentekiesho, tatuikukishenanga nka penda atue banabe, kadi tukukile bikishekishe benyi sunga batababatuelele takudi bipua bi bungi. Atukumiina’shi bepushe kalolo p’abafiki!—Lom. 12:13.
16. Buakinyi tui kufuimisha kukita mianda ya mu kikudi mu kipungo kia Kitentekiesho?
16 We kufuimisha kukita mianda ya mu kikudi mu kipungo kia Kitentekiesho su? Uno nyi mushindo wi buwa wa kulesha Yehowa na Yesu lutumbu bua biabadi bakukitshine. P’atuipaana mu kufubila Yehowa, atunyisha kumona bukuashi buaye, bu kipeta, lukulupilo luetu muadi alunyisha kunyinga. (1 Ko. 3:9) Na dingi, ikala obadika efuku dioso programe a ku badika Bible bua Kitentekiesho e mu broshire a Tutaluleyi Bifundue efuku dioso sunga e mu programe a bisangilo bia buina Nkidishitu na mudimo wetu. We kuifundila mpa na kepatshila ka kuilongiela ano ma verse.
17. Nkinyi akisankishaa Yehowa? (Tala dingi kashibo akamba’shi “Mishindo ya kulesha Yehowa lutumbu.”)
17 Pa muanda wa nkalakashi yodi nayo, tue mulombene kukita bi bungi mu mudimo wa Yehowa. Anka tentekiesha’shi, Yehowa tapuandikishaa mudimo oobe na wa bangi bafubi baye; aye amonaa bi muishimba. Ekalaa na muloo nsaa yamono lutumbu lobe bua kia buntu kia nkuulo.—1 Sa. 16:7; Mak. 12:41-44.
18. Buakinyi atulesha Yehowa na Yesu lutumbu?
18 Nka penda ku bukuashi bua nkuulo nyi kuatufuidibua lusa ku miluisho yetu, kuikala mu kipuano ki bukopo na Yehowa, na tui na lukulupilo lua kuikala muwa wa ikalayika. Tuikaleyi nka atulesha Yehowa lutumbu bua kifulo kiaye, kifulo kibaadi kimutakule bua kuitupa bino bintu bioso bi buwa. (1 Yo. 4:19) Dingi, tulesheyi Yesu lutumbu, baadi muitufule pa kuitufuila!—Yo. 15:13.
LOONO 154 Kifulo kya loso