MUISAMBO WA KULONGA 26
LOONO 123 Tulamateyi bukunkushi bwa teokrasi
Ikala na kuiyisha nsaa yosh’ouku ingi mianda
“Kalolo, kinangu na kiukilo bi’Efile Mukulu, mbikile bukata! Kiimu ki’Efile Mukulu ki bukopo kupusha na mashinda aye ngakata!”—LOM 11:33, 34.
KI’ATUISAMBILA
Sunga t’atuuku mianda yoso ayikakitshika, tui kunyingiila nkalakashi nsaa y’atunangushena ku mianda y’atuuku na kukulupila Yehowa.
1. Yehowa baadi muitupangie na ngobesha kinyi, na buakinyi?
YEHOWA baadi muitupangie na ngobesha ya kunangushena, kulonga mianda ipia, na kuuka mushindo wa kutumikila mianda ibatulongo. Buakinyi baadi muitupangie mu uno mushindo? Akumiina’shi ‘tushinguule . . . Efile Mukulu’ na tumufubile pa kufubisha ngielelo eetu a binangu.—Nki. 2:1-5; Lom. 12:1.
2. (a) Nkinyi akitungu’shi tuukie pabitutale? (Yobo 37:23, 24) (Tala dingi kifuatulo.) (b) Buakinyi bi na muulo tuukie’shi kui ingi mianda yatush’atuuku?
2 Sunga biatudi na ngobesha ya kulonga mianda ipia, kui mianda i bungi yatush’atuuku. (Badika Bena Loma 11:33, 34.) Tubandeyi kutala kileshesho kia Yobo. Yehowa baadi muele Yobo nkonko i bungi ibaadi imukuashe bua kupusha’shi kui mianda i bungi yashibaadi auku. Uno muisambo ubaadi ukuashe Yobo bua kuiyisha na kulumbuula ngielelo aaye a binangu. (Yob. 42:3-6) Mpa n’atue namu, su tubeyisha atushinguula’shi kui mianda yatush’atuiuku. Nsaa y’atutentekiesha bino, abitukuasha bua kuikala beyishe na kukulupila’shi Yehowa ekala’nka etulungula mianda i buwa ayitukuasha bua kuata bitshibilo bi buwa.—Nki. 2:6.
Kuuka’shi t’atuuku mianda yoso akuitukuasha nka bu Yobo (Tala kikoso 2)
3. Nkinyi ki’atuisambila mu uno muisambo?
3 Mu uno muisambo, atuisambila ingi mianda yatush’atuuku na nkalakashi yatupete. Atutaluula dingi buakinyi bi buwa kukutua kuuka ingi mianda. Kutaluula ino mianda akunyingisha lukulupilo luetu’shi, Yehowa ‘sha kiukilo kipuidikie’ etulungulaa mianda yatudi nayo lukalo.
T’ATUUKU APAKAFIKI NFUDIILO
4. Muyile Mateo 24:36, nkinyi kiatush’atuuku?
4 Badika Mateo 24:36. T’atuuku apakafiki nfudiilo a uno ndumbuluilo a mianda. Sunga pabaadi Yesu pa nsenga, tabaadi auku “efuku na nsaa.”a Balunguile batumibua baye’shi, Yehowa nyi atshibaa nsaa ya kukitshika mianda. (Bik. 1:6, 7) Biabia, Yehowa mupue kutshiba nsaa ayikafudiila uno ndumbuluilo, anka t’atuuku nsaa y’abikakitshika.
5. Pa muanda wa’shi t’atuuku efuku adifiki nfudilo, bi kuikala na bukitshishi kinyi kuatudi?
5 Muyile bibaadi biakule Yesu, t’atuuku bungi bua mafuku abutungu’shi tutengiele kumpala kua’shi nfudiilo ifikie. Nyi buakinyi tui kubofula kuishimba, bikishekishe su tubapu kutengiela efuku dia Yehowa takudi bipua bi bungi. Pangi abituelela bukopo bua kunyingiila pa muanda wa kuitusenga kua bena kifuko sunga bangi bantu. (2 Mp. 3:3, 4) Tui kunangushena’shi, su atuuku efuku adifiki nfudiilo, atuikala na luishinko na abitubofuila bua kunyingiila kusengibua.
6. Buakinyi kukutua kuuka efuku adifiki nfudiilo kui buwa?
6 Anka, pa muanda t’atuuku efuku adifiki nfudiilo, Yehowa muitupe mushindo wa kulesha’shi atumufubila pa muanda tuibamufule na atumukulupila. Atukumiina kufubila Yehowa bua loso, kushi pamuanda washi atutengiela’shi nfudiilo ifikie. Pamutue pa kutuula binangu ku nsaa ayikafiki “efuku dia Yehowa,” bi buwa tunangushene ku mianda i buwa ayikakitshika apafiki diadia efuku. Su tubakitshi bino, atutungunuka na kuifubuila pepi na Yehowa, na kukita mianda ayimusankisha.—2 Mp. 3:11, 12.
7. Nkinyi ki’atuuku?
7 Bi na muulo tunangushene ku mianda yatuuku. Atuuku’shi mafuku a ku nfudiilo ababangile mu 1914. Mu Bible, Yehowa muitupe matemuki aashinkamisha’shi, kipua kia 1914 nyi mbangilo a mafuku a nfudiilo. Mmuitulungule dingi mianda i bungi ayikakitshika kunyima kua kino kipua. Bu kipeta, tuibashinkamishe’shi, “efuku dikata dia Yehowa,” tadidi pepi. (Sef. 1:14) Atuuku dingi mudimo aukiebe Yehowa’shi tukite, kuamba’shi kulungula bantu be bungi “mukandu wibuwa wa Bufumu.” (Mat. 24:14) Uno mukandu ukuete kulungulua mu maumbo 240 na mu ndimi ikile pa 1 000. Ta tui na lukalo lua kuuka “efuku na nsaa” bua kuikala na kisumi mu uno mudimo wi na muulo.
T’ATUUKU MUSHINDO AUKAKITSHI YEHOWA MIANDA
8. Kishima “mufubo w’Efile Mukulu” akilesha kinyi? (Mulungudi 11:5)
8 Misango yoso, t’atuukaa bi “mufubo w’Efile Mukulu.” (Badika Mulungudi 11:5.) Kino kishima akilesha mushindo ulombene Yehowa kukumiina’shi mianda ikitshikie bua kulombasha kikiebe ki’eshimba diaye. T’atuuku buakinyi Yehowa mutadiile’shi mianda kampanda ikitshikie sunga mushindo waketukuasha. (Mis. 37:5) Kiukilo ki bino ki bukopo buetu kupusha, nka bu biabidi bukopo kuuka mushindo aukulaa muana e munda, mpa na lelo bena siyanse tabakuete kupusha uno muanda kalolo.
9. Pa muanda t’atuuku mushindo auketukuasha Yehowa, nkalakashi kinyi yatudia kupeta?
9 Pa muanda t’atuuku mushindo auketukuasha Yehowa, tui kuikoka bua kuata bingi bitshibilo. Tui kuikoka bua kuipaana mu mudimo wa bulungudi, bu kupelepesha nshalelo eetu sunga kuenda mbalo i lukalo lua balungudi ba Bufumu. Sunga nsaa yatushi balombashe bipatshila bietu, tui kuiyipusha su tuki bakumiinyibue na Yehowa. Sunga’shi tui kufuba ngofu mu mudimo wa bulungudi, kadi tuakutua bantu ba kulonga nabo Bible, sunga kupeta nkalakashi i bungi, aku atufubu mudimo wa teokrasi.
10. Eyikashi kinyi di’atudimi pakukutua kuuka abikakitshi Yehowa?
10 Pa muanda t’atuuku abikakitshi Yehowa, abitukuasha bua kudima eyikashi dia kuiyisha. Bino abitukuasha bua kupusha’shi, binangu bia Yehowa bi kula na bietu. (Yesh. 55:8, 9) Na dingi, atulongo bia kunyisha kukulupila Yehowa’shi, etupasukila mu mianda yoso. Nsaa y’atupete bipeta bi buwa mu bulungudi, sunga mu ingi midimo ya teokrasi, atutumbisha Yehowa. (Mis. 127:1; 1 Ko. 3:7) Su muanda taukitshikie biatukiebanga, tutentekieshe’shi Yehowa kuete kumona. (Yesh. 26:12) Tukite wetu mudimo, na tutungunukie na kukulupila’shi Yehowa akitshi waye. Tuibashinkamishe’shi etukunkusha, sunga biekala’shi t’ebikitshi mu kilengieleshi bu bibaadi akitshi kala.—Bik. 16:6-10.
11. Nkinyi ki’atuuku kilombene kuitukuasha?
11 Atuuku’shi Yehowa ekalaa’nka na kifulo, kululama, na binangu. Ataa na muulo biabia biatumukitshina na biatukitshina bena Nkidishitu netu. Na atuuku’shi Yehowa afutaa boso be na lulamato kuadi.—Eb. 11:6.
T’ATUUKU AKIKAKITSHIKA MALOBA
12. Muyile Yakobo 4:13, 14, nkinyi kiatush’atuuku?
12 Badika Yakobo 4:13, 14. Bua kuakula kalolo, t’atuuku abikekala nshalelo eetu maloba nya. Mianda ya mu kimpulunkamba ikuitukitshikila. (Mul. 9:11) Nyi buakinyi ta tui balombene kuuka su mpango yoso yatudi bate ayilombana sunga’shi atuikala na muwa bua kumona kuayilombana.
13. Ingi nsaa tui kupusha naminyi pabitale mianda ayikakitshika mu mafuku aafiki?
13 Mbilombene kuikala bukopo bua kunyingiila, muanda t’atuuku abikakitshika mu mafuku aafiki. Mushindo kinyi? Tui kutshina pabitale bilombene nkakitshika, na bino bikushimisha muloo wetu. Nshalelo eetu ekushintuluka mu kimpulunkamba, sunga’shi mianda i bubi ikuitufikila mu mushindo watushatutengielanga, na bino bikuituinyongosha. Na nsaa ayikitshika mianda mu mushindo watushatutengielanga, bi kuitubofusha kuishimba.—Nki. 13:12.
14. Nkinyi akitungu’shi tukite na tuukie bua kuikala na muloo? (Tala dingi kifuatulo.)
14 Nsaa yatunyingiila nkalakashi, atulesha patooka’shi atufubila Yehowa pa muanda tuibamufule. Bible alesha’shi, t’abitungu tukulupile’shi Yehowa etukaluila ku nkalakashi yoso ilombene kuitufikila, na’shi ta baadi mupue kulumbuula kumpala’shi mianda i bubi itukitshikile nya. Auku’shi, tui kuikala na muloo sunga t’atuuku mianda yoso ayikakitshika mu mafuku aafiki. Anka, tui kuikala na muloo su atumutekie bukunkushi na kumukookiela. (Yel. 10:23) Pa kukimba bukunkushi buaye kumpala kua kuata bitshibilo, tui’nka bu abamba’shi: “Su Yehowa akumiina, atukekala na muwa, na atukitshi’ki sunga akiaa.”—Yak. 4:15.
Kukimba bukunkushi bua Yehowa na kumukookiela akuitukaluila (Tala kikoso 14-15)b
15. Nkinyi kiatuuku pabitale mafuku aafiki?
15 Sunga t’atuuku abikakitshika maloba, atuuku’shi Yehowa mulee muwa wa ikalayika, biabikala muiyilu sunga pa nsenga. Atuuku’shi, te bia kudimba na’shi ta kui kintu su nkimune ki kumukutshisha kulombasha milayilo yaye yoso. (Tit. 1:2) Nka penda’ye nyi mulombene ‘kuukisha abikakitshika, na kuukisha myanda ishabandjile kukitshibwa.’ Bino bibaadi bia binyi mafuku akala, na abikekala bia binyi mafuku aafiki. (Yesh. 46:10) Tuibashinkamishe’shi, ta kui kintu kilombene kukutshishua Yehowa kuitufula. (Lom. 8:35-39) Etupa kinangu, kuitusamba, na bukome abuitukuasha bua kunyingiila. Tushinkamishe’shi Yehowa etukuasha na kuituelela miabi.—Yel. 17:7, 8.
TA TUI KUPUSHA KALOLO MUSHINDO AWITUUKU YEHOWA
16. Nka bu abibilesha Misambo 139:1-6, nkiukilo kinyi kinakio Yehowa kiatushi bia kupusha kalolo?
16 Badika Misambo 139:1-6. Yehowa auku biadi muitupangie, mushindo watunangushena na mushinto watuipusha. Auku mianda yatuakula na mianda i muishimba dietu. Nka bu bibakuile Nfumu Davide, Yehowa e pepi bua kuitukuasha. Abikanyisha pa kumona’shi, Muanana Nfumu a nsenga ishima, Sha bukome boso Mupangi a eyilu na nsenga etupasukila! Davide amba’shi: “Kyakya kyuukilo nkitambukile, ki kula kukile kwanshi mulombeene kufika.”—Mis. 139:6.
17. Buakinyi bi kuituikeela bukopo bua kukumiina’shi Yehowa etuuku kalolo?
17 Pangi, pa muanda wa biabadi betukushe mu kifuko, bipikua bietu, sunga pa muanda wa kipuilo kibatudi atutuele kumpala, bi kuituelela bukopo bua kumona Yehowa bu Nshe-bana sha kifulo etupasukila. Tui kumona’shi miluisho yetu ya kala ibaadi bubi bukile mu mushindo ushi ulombene Yehowa kuituuka, kuamba’shi, ekula netu. Mpa na Davide baadi muipushe nka bino. (Mis. 38:18, 21) Sunga muntu akitshi muaye moso bua kushintuula muikelo na kuikala na nshalelo asankisha Efile Mukulu e kunangushena’shi: ‘Su Efile Mukulu anguuku, buakinyi akumiina’shi nshintule nshalelo andi mupue kuubila?’
18. Buakinyi bi buwa tukumiine’shi Yehowa etuuku kalolo kuitukila atue banabene? (Tala dingi bifuatulo.)
18 Abitungu tukumiine’shi Yehowa etuuku kalolo kuitukila mpa n’atue banabene, na’shi amonaa nyikashi yetu i buwa kuitukila. Amonaa bilubilo bietu, anka auku’shi atukumiina kuikala bantu be buwa, na muitufule. (Lom. 7:15) Su tuatundula’shi Yehowa amonaa nyikashi yetu i buwa, abitunyingisha bua kumufubila na lulamato na muloo.
Yehowa etukuasha bua kunyingiila mianda ya bimpulunkamba pa kunyingisha lukumiino luetu mu milayilo yaye yatutengiela mu Nsenga ipia (Tala kikoso 18-19)c
19. Nkinyi kiatuuku na kushinkamisha pabitale Yehowa?
19 Atuuku’shi Yehowa nkifulo. Na bino mbia binyi. (1 Yo. 4:8) Na miiya yaye ya kululama ayilesha kifulo kiaye buetu, na’shi akumiinaa nka buwa buetu. Yehowa akumiina’shi tupete muwa wa ikalayika. Baadi mutushe nkuulo bua’shi bino bikitshikie. Kia buntu kia nkuulo akitushinkamisha’shi tui kobesha sunga biatudi bakutue kupuidika. (Lom. 7:24, 25) Na atuuku dingi’shi “Efile Mukulu mmukata kukila mashimba etu, na auku mianda yoso.” (1 Yo. 3:19, 20) Yehowa auku mianda yoso itutale, na mushinkamishe’shi su tubakitshi kikiebe ki’eshimba diaye, atoobesha.
20. Nkinyi ki kuitukuasha bua kupela kuikalakasha pabitale mianda yatush’atuuku?
20 Yehowa ta muitufie muanda su ngumune autunganga’shi tuukie. Nsaa yatukumiina na kuiyisha uno muanda, abitukuasha bua kupela kuikalakasha pabitale mianda yatush’atuuku, anka atutulu binangu bietu ku mianda i na muulo. Patukitshi bino, atulesha’shi tuibatuule lukulupilo luetu loso mui Yehowa, ‘sha kiukilo kipuidikie.’ (Yob. 36:4) Sunga biatush’atuuku ingi mianda lelo uno, atutengiela n’eshimba kuiyilu, bua nkalonga mianda ipia pabitale Efile eetu Mukata bua ikalayika.—Mul. 3:11.
LOONO 104 Kikudi ki selele, nkya buntu ky’Efile Mukulu
b BI MU BIFUATULO: Nshe-bana na muana aaye mulume abalongo bintu mu kibuta kia kusuuka nakio bua’shi kifuko kioso kikale kilumbuule su kuatuuka muanda wa mu kimpulunkamba.
c BI MU KIFUATULO: Mukuetu mulume e na nkalakashi anangushena ku nshalelo e buwa akekala naye mu Nsenga ipia.