MUISAMBO WA KULONGA 15
LOONO 30 Nshami, Efile ande na kuuku ande
Kuikala “peepi n’Efile Mukulu” nkukile buwa!
“Anka ami kuikala peepi nobe [obe Efile Mukulu] nyi nkukile buwa.”—MIS. 73:28.
KI’ATUISAMBILA
Atulongo mushindo wa kuifubuila pepi na Yehowa na miabi yatupete pa kuibikita.
1-2. (a) Nkinyi akitungu kukita bua kuikuateena bu kuuku na muntu? (b) Nkinyi ki’atulongo mu uno muisambo?
WE NA kuuku a p’eshimba su? Mbikunyi bibanudi babangie bu kuuku buenu? Pangi bobangile kukisha naye nsaa pamune, kuuka nkalakashi yaye, kuuka mianda yadi mukumiine na yashi mukumiine. Akupu obe nkumona’shi e na nyikashi i buwa i bungi yodi mulombene kuambula. Bino nkukutakula bua kufula kuuku oobe.
2 Kuikuatena bu kuuku na muntu akutekie nsaa na kuikitshisha kui bungi. Bino nyi abitungu kukita bua kuikala kuuku a Yehowa Efile Mukulu. Mu uno muisambo, atulongo mushindo wa kuifubuila pepi na Yehowa na miabi yatupete pa kuibikita. Kia kumpala, tutaleyi buakinyi bi buwa kuifubuila pepi na kuuku eetu e buwa, Yehowa.
3. Buakinyi abitungu tunangushene ku miabi y’atupete pa kuifubuila pepi na Yehowa? Tuusha kileshesho.
3 Kushi mpaka okumiina’shi kuifubuila pepi na Yehowa kui buwa. Anka, kunangushena biabidi buwa, kui kuitutakula bua kutungunuka na kunyisha kuifubuila pepi naye. (Mis. 63:6-8) Bu kileshesho, atuuku’shi, kudia kalolo, kukita kalashishi ka mbidi, kulaala kalolo, na kutoma mema e bungi kui buwa bua muntu oso. Anka bantu be bungi, t’abakitaa bino bioso, na t’abebiataa na muulo. Anka su tuanangushena bukitshishi bui buwa buabidi nabio ku mbidi yetu, atuikala na kiubishi kia kukita ino mianda. Mu mushindo umune, tui kuuka’shi kuifubuila pepi na Yehowa kui buwa, anka su tuanangushena ku miabi y’atupete pa kukita bino abitutakula bua kunyisha kuifubuila pepi na Kuuku eetu.—Mis. 119:27-30.
4. Mufundi a Misambo 73:28 baadi muakule kinyi?
4 Badika Misambo 73:28. Mufundi a Misambo 73 baadi muina Levi ababadi batuule bu kayimba mu ntempelo a Yehowa. Abimueka’shi baadi mulanguile Yehowa na lulamato munda mua bipua bi bungi. Anka baadi auku’shi bi na muulo kutentekiesha’shi “kuifubuila pepi n’Efile Mukulu” kui buwa buaye na bua bangi. Miabi kinyi yatupete pa kuibikita?
“KUIFUBUILA PEPI N’EFILE MUKULU” AKUITUPA MULOO
5. (a) Buakinyi kuifubuila pepi na Yehowa akuitupa muloo? (b) Muyile Nkindji 2:6-16, tusha bileshesho abilesha bilombene binangu bia Yehowa nkukuasha na nkukaluila?
5 P’atunyisha kuifubuila pepi na Yehowa, atunyisha kuikala na muloo. (Mis. 65:4) Kui tubingilo tui bungi atuitutakula mu kuakula bino. Bu kileshesho, atupete miabi pa kukookiela binangu biaye bi muiyi diaye, Bible. Bino binangu abitukaluila ku mianda i bubi na kuitukuasha bua kupela kukita miluisho ikata. (Badika Nkindji 2:6-16.) Nyi buakinyi, Bible amba’shi: “Yawa [apete] binangu na lushinguluilo, e na mulô.”—Nki. 3:13, EEM.
6. Buakinyi mufundi a misambo baadi mushimishe muloo waye?
6 Mpa na ba kuuku ba Yehowa abenyongolaa ingi nsaa. Mufundi a Misambo 73 baadi mushimishe muloo waye pa kunangushena ku mianda i baadi amono’shi tayibuwa. Babangile kuikalakasha na kuikala na luabi, muanda baadi apuandikisha’shi bantu bash’abakookiela Efile Mukulu na miiya yaye be na nshalelo e buwa. Baadi amono’shi ba ntomboshi na basha kuitatula be nka ba mpeta, be na mbidi bukome, na’shi t’abakiengaa. (Mis. 73:3-7, 12) Mufundi a misambo baadi muikalakashe ngofu mu mushindo ubaadi mpa na amba’shi kufubila Yehowa ta kui na muulo. Mu kinyongua kiaye, bakuile’shi: ‘Eyendo, mbisumanga biandi mulame eshimba diande ditookie, naasuula maasa ande buu kitunduilo kia’shi ntshi musoole muanda.’—Mis. 73:13.
7. Nsaa yatudi benyongole, nkinyi akitungu’shi tukite? (Tala kia ku kipusu.)
7 Sunga bibaadi mufundi a misambo muinyongole ngofu, baadi mukite kintu kampanda bua kushintuula binangu biaye. Bayile ‘akatuela mu nshibo y’Efile Mukulu,’ mubaadi Yehowa muludikie binangu biaye. (Mis. 73:17-19) Nsaa yatudi benyongole, kuuku eetu Yehowa ebiukaa. Su tuamuteka bukunkushi na kukumiina bukuashi bui muiyi diaye na buatupete kui bakuetu bena Nkidishitu, atupete bukome bua kunyingiila kinyongua kietu. Sunga tuepusha’shi mianda ibetukidi, Yehowa etukuasha bua kupusha kalolo.—Mis. 94:19.a
Muina Levi baadi mufunde Misambo 73 mmuimane mu “nshibo y’Efile Mukulu” (Tala kikoso 7)
“KUIFUBUILA PEPI N’EFILE MUKULU” AKUITUIKASHA NA NSHALELO E BUWA NA KUITUPA LUKULUPILO BUA MAFUKU AAFIKI
8. Kuifubuila pepi na Yehowa kui buwa bua ingi mishindo kinyi?
8 Kuifubuila pepi n’Efile Mukulu kui buwa mu ingi mishindo ibidi i na muulo. Kia kumpala, akuituikasha na nshalelo e buwa. Kia kabidi, akuitupa lukulupilo bua mafuku aafiki. (Yel. 29:11) Tutaluuleyi kalolo ino yoso miabi.
9. Kuifubuila pepi na Yehowa akuikasha nshalelo eetu buwa naminyi?
9 Kuifubuila pepi na Yehowa akuituikasha na nshalelo e buwa. Bantu be bungi lelo uno abamba’shi Yehowa te kuanka, nyi buakinyi tabauku buakinyi bantu be pa nsenga na abakumiina’shi mu mafuku e kumpala, bantu t’abakekala dingi kuanka. Anka, mu kuilongiela kuetu ku’Eyi di’Efile Mukulu, tuibafikie mu kushinkamisha’shi Efile Mukulu “e kuanka n’ashi afutaa baaba boso abamukimbi n’eshimba dimune.” (Eb. 11:6) Mpa na lelo uno, tui na muloo muanda tukuete kukita kiakia kibabadi betupangie’shi tukite, kuamba’shi kufubila Nshetu e muiyilu, Yehowa.—Det. 10:12, 13.
10. Yehowa mmulee baaba boso bamukulupile kinyi? (Misambo 37:29)
10 Bantu be bungi lelo uno, ta be na lukulupilo bua mafuku aafiki. Bakuete nka penda kufuba, kutanda bana na kulumbuula biabakekala nsaa yabanunupa. T’abauku bilee Efile Mukulu bua mafuku aafiki. Anka bafubi ba Yehowa mbatuule lukulupilo luabo muadi. (Mis. 25:3-5; 1 Ti. 6:17) Tuibakulupile Efile Mukulu kuuku eetu, na tuibakulupile mianda yadi muitulee. Lukulupilo luatudi nalo bua mafuku aafiki, nyi nkamulanguila bua loso mu mpaladiso.—Badika Misambo 37:29.
11. Miabi kinyi y’atupete pa kuikala ba kuuku b’Efile Mukulu, na apusha naminyi?
11 Kuifubuila pepi n’Efile Mukulu kui buwa mu ingi mishindo i bungi. Bu kileshesho, mulee kufuila ba nkitshishi ba miluisho abelanga lusa. (Yesh. 1:18) Bu kipeta, tatuibatuale dingi kiita kia miluisho yetu ya kala. (Mis. 32:1-5) Na tui na muloo wa kusankisha Yehowa. (Nki. 23:15) Kushi mpaka, kui ingi miabi i bungi yatukuete kupeta pa muanda wa’shi tui bakuuku b’Efile Mukulu. Biabia, mushindo kinyi odia kutungunuka na kuifubuila pepi n’Efile Mukulu?
KIA KUKITA BUA KUTUNGUNUKA NA “KUIFUBUILA PEPI N’EFILE MUKULU”
12. Nkinyi kiodi mupue kukita bua kuifubuila pepi ngofu n’Efile Mukulu?
12 Su we muina Nkidishitu mupue kubatshishibua, we mupue kuifubuila pepi ngofu na Yehowa. We mulongie bia binyibinyi bi bungi pabitale Yehowa Efile Mukulu, Yesu Nkidishitu, we muilangie ku miluisho yobe, we muleshe lukumiino lui bukopo mui Efile Mukulu, na kukita mobe moso bua kukita mianda ipushene na kikiebe ki’eshimba diaye. Anka bua kunyisha kuifubuila pepi n’Efile mukulu, abitungu otungunukie na kukita ino mianda.—Kol. 2:6.
13. Mianda kinyi isatu ayitukuasha bua kutungunuka na kuifubuila pepi na Yehowa?
13 Nkinyi akitukuasha bua kutungunuka na kuifubuila pepi na Yehowa? (1) Abitungu tutungunukie na kubadika na kuilongiela Bible. Nsaa yatukitshi bino, kabingilo ketu takekalanga nka penda ka kulonga mianda pabitale Efile Mukulu. Anka, abitungu tutompe kupusha bi mueneno a Yehowa, ki’akumiina’shi tukite, na kukita mianda mu mushindo wakumiina’shi tukite. (Ef. 5:15-17) (2) Tui kunyingisha lukumiino luetu pa kunangushena ku mushindo wetuleshaa kifulo. (3) Abitungu tutungunukie na kushikua bintu abifitshishaa Yehowa munda na kupela kuikala na ba kuuku abakitshi yaya mianda.—Mis. 1:1; 101:3.
14. Muyile 1 Bena Kodinda 10:31, mianda kinyi yatudia kukita bua kusankisha Yehowa? (Tala dingi bifuatulo.)
14 Badika 1 Bena Kodinda 10:31. Bi na muulo bua’shi tuikale atukitshi mianda ayisankisha Yehowa. T’abitungu tuimeene nka penda pa kuenda mu bulungudi na kutuela bisangilo nya. Mianda yoso y’atukitshi efuku dioso abitungu isankishe Yehowa. Bu kileshesho, nsaa yatudi na kululama mu mianda yoso na kukuasha bangi, atusankisha Yehowa. (2 Ko. 8:21; 9:7) Yehowa akumiina dingi’shi tuate muwa na muulo ngofu. Biabia, atuikala na nkatshi-nkatshi pabitale bintu bi’atudi na kutoma, na kukita ingi mianda ayitukuasha bua kuikala nka na mbidi bukome. Nsaa ayimono Yehowa’shi atuikitshisha mpa na mu tu mianda tupeela, anyisha kuitufula.—Luk. 16:10.
Kutambusha motoka na budimu, kuipasukila pa kukita kalashishi, kudia kalolo, na kuikala na kalolo nyi mishindo ya kusankisha Yehowa (Tala kikoso 14)
15. Yehowa akumiina’shi tukitshine bantu mianda mu mushindo kinyi?
15 Yehowa aleshaa bantu boso kalolo, abamufubilaa na bash’abamufubilaa. (Mat. 5:45) Akumiina’shi natue namu tuikale atulesha bangi kalolo. Bu kileshesho, ‘tatuakulanga muntu su ngumune bibubi, tatuikalanga basha kutontoola, . . . anka tuleshe kupopeela kui bantu boso.’ (Tt. 3:2) Na uno muanda mu binangu, ta tuikalanga atubepuula bangi bantu pa muanda wa’shi tabakumiina mui Yehowa. (2 Ti. 2:23-25) Atunyisha kuifubuila pepi na Yehowa pa kulesha bantu boso kalolo.
TUI “KUIFUBUILA PEPI N’EFILE MUKULU” SUNGA TUAKITA BILUBILO
16. Mufundi a Misambo 73 babangile kuipusha naminyi kunyima kua mafuku?
16 Anka, we kukita kinyi su kunyima kua mafuku, obanga kuipusha’shi tue mulombene kifulo kia Yehowa? Anka bu bibatupu kuibimona, uno muanda ubaadi ukitshikile mufundi a Misambo 73. Bambile’shi: “Kubashêle’nka kapêla’mi kuselemuka mwishinda, nàdi pepi kupona.” (Mis. 73:2, EEM) Aye nabene amba’shi, “eshimba diaye dibaadi “dimutapikie” na aye nkufika nka bu “nyema shina binangu” Kumpala kua Yehowa. (Mis. 73:21, 22) Baadi muambe’shi pa muanda wa bilubilo biaye, ta baadi mulombene kifulo kia Yehowa na kufuidibua lusa su?
17. (a) Sunga bibaadi mubofule kuishimba ngofu, nkinyi kibaadi mufundi a misambo mukite? (b) Kileshesho kiaye akitulongiesha kinyi? (Tala dingi bifuatulo.)
17 Su mufundi a misambo baadi munangushene’shi Yehowa bamusumbushena, baadi muibipushe munda mua kapindi kapela. Nka bu abibilesha mayi aaye, abimueka’shi mu yaya nsaa baadi mutundule muulo wa kuifubuila pepi n’Efile Mukulu, amba’shi: ‘Anka binobino, nenka nobe [Yehowa] nsaa yoso, we munkuate ku mboko. Ondudika n’elango diobe, ku nfudiilo okantambula mu ntumbo.’ (Mis. 73:23, 24) Natue namu abitungu tutekie Yehowa bukome nsaa y’atuipusha’shi lukumiino luetu lubabofula sunga nsaa yatudi babofule kuishimba bua bilubilo bietu. (Mis. 73:26; 94:18) Sunga tuakita muluisho ukata, tui kualukiila kui Yehowa, bashinkamishe’shi e na bukidi bua “kuitufuila lusa.” (Mis. 86:5) Bikishekishe nsaa yatudi babofule kuishimba ngofu, abitungu tuifubuile pepi n’Efile Mukulu eetu.—Mis. 103:13, 14.
Nsaa y’atupusha’shi tubanyisha kubofula mu kikudi, abitungu tunyishe kuifubuila pepi na Yehowa pa kunyisha kukita mianda ya mu kikudi (Tala kikoso 17)
‘EFUBUILE PEPI N’EFILE MUKULU’ BUA LOSO
18. Buakinyi atutungunuka na kuifubuila pepi na Yehowa bua loso?
18 Tui kutungunuka na kuifubuila pepi na Yehowa bua loso, na atutungunuka nka na kulonga mianda i bungi pabimutale. Bible amba’shi mashinda a Yehowa, kinangu kiaye na kiukilo kiaye bi “bukopo kupusha.”—Lom. 11:33.
19. Nkinyi akitushinkamiisha mufundi a misambo?
19 Misambo 79:13 ayamba’shi: “Atwe, mwilo ôbe, lombe lobe lwa mikôko, atukakusâmuna mpa na ku ikalayika.” P’otungunuka na kuifubuila pepi n’Efile Mukulu, nobe namu we kushinkamisha’shi akakuelela miabi bua loso na wakula na kushinkamisha koso’shi: “Kyeemeno kyande, bupyaanyi bwande, nyi Efile Mukulu bua looso.”—Mis. 73:26.
LOONO 32 Fika kui Yehowa!
a Baaba be na kenyongoshi ke bukopo takudi mafuku e bungi, mbalombene nkamona doktere. Bua kuuka mianda i bungi, tala Kitenta kia Mulami, No. 1 2023.