Ikala mushinkamisheʼshi Yehowa mukufule

1. Buakinyi bodi muilambule kui Yehowa? (Tala dingi kifuatulo.)

OTENTEKIESHA efuku dibodi muilambule kui Yehowa su? Buatshile kiakia kitshibilo muanda bodi mulongie bua kuuka Yehowa na kumufula. Bodi mumuleeʼshi otuulu mudimo waye pa mbalo ya kumpala mu muwa oobe, naʼshi otungunuka na kumufula n’eshimba diobe dioso, anyima oobe oso, binangu biobe bioso, na bukome bobe boso. (Mak. 12:30) Kubanga nka paapa, bodi munyishe kumufula. Biabia su muntu akuipushaʼshi: “We mufule binyibinyi Yehowa su,” we kumualuula naminyi? Kushi kunyengakana, omualuulaʼshi: “Nemumufule kukila bantu boso na kukila kintu kioso kiakia!”

2-3. Yehowa akumiinaʼshi tushinkamishe kinyi, na nkinyi kiʼatulongo mu uno muisambo? (Yeelemiya 31:3)

² Anka, we kualuula naminyi su muntu akuipushaʼshi: “We mushinkamisheʼshi Yehowa mukufule su?” We kunyengakana bua kualuula, muanda opuandikisha pangiʼshi tue mulombene kufudibua na Yehowa su? Ungi mukuetu mukashi abashibadi bafule kubanga ku bukinga ambaʼshi: “Ne mufule Yehowa nʼeshimba diande dioso, nemuibishinkamishe. Anka ke bungi neyipushaa su Yehowa munfule.” Biabia we kuuka naminyiʼshi Yehowa mukufule?

³ Yehowa akumiinaʼshi wekale mushinkamisheʼshi mukufule. (Badika Yeelemiya 31:3.) Bia binyibinyi biʼshi Yehowa mukukakie kuadi. Na nsaa ibodi muilambule kuadi na kubatshishibua, baadi mukupe kia buntu ki na muulo ukata, kifulo kiaye kia lulamato. Bino abileshaʼshi mukufule ngofu na ta n’akusumbushene efuku su ndimune. Kino kifulo akimutakulaa bua kumona balanguidi baye basha lulamato, mpa nʼobe, bu bintu bi na muulo. (Mal. 3:17) Yehowa akumiinaʼshi wepushe nka bu bibaadi bipushe Mpoolo mutumibua. Baadi mushinkamishe nʼeshimba diosoʼshi Yehowa mumufule pabafundileʼshi: “Muanda ne mushinkamishe’shi, sunga ndufu, sunga mmuwa, sunga mikeyilu, sunga mbulamatadi, sunga mianda ya binobino, sunga mianda ayikafiki, sunga makome, sunga mbula bua muiyilu, sunga mbula bua muushi, sunga kingi kipangua kioso, tankilombene kuituabuula ku kifulo ki’Efile Mukulu.” (Lom. 8:38, 39) Mu uno muisambo atulongo buakinyi bi na muulo tushinkamisheʼshi Yehowa muitufule na akitunguʼshi tukite bua kunyisha kushinkamishaʼshi Yehowa muitufule.

BUAKINYI BI NA MUULO OSHINKAMISHEʼSHI YEHOWA MUKUFULE?

4. Satana akiebeʼshi tukumiine kinyi, na mbikunyi biatudia kumukambila?

⁴ Su tuibashinkamisheʼshi Yehowa muitufule, tui kukambila “mayele e bubi” a Satana. (Ef. 6:11) Satana akiebeʼshi tulekie kufubila Yehowa. Akitshi muaye moso buaʼshi alombashe kano kepatshila. Amune a ku mayele a kuete kufubisha, nyi kuitutakula mu kunangushenaʼshi Yehowa ta muitufule. Anka ano nyi madimi. Bible apuandikisha Satana bu ntambue. (1 Mp. 5:8, 9) Ntambue akuminaa kutee nyema nsaa yayidi ikookie, yayishi ilombene kuikaluila. Mu mushindo umune, Satana etutompaa nsaa yatudi babofule, bakookie sunga nsaa yatudi benyongole pa muanda wa mianda i bubi ibaadi itukitshikile kala, nkalakashi yatudi nayo binobino, sunga nsaa yatuiyipusha akikakitshika mu mafuku aafiki. (Nki. 24:10) Satana akumiina kuitubofusha ngofu mu mushindo waʼshi tulekie kufubila Yehowa. Anka tui “kukambila Diabulu” na miteo yaye i bubi pa kukita kioso akitungu bua kushinkamishaʼshi Yehowa muitufule.​—Yak. 4:7.

5. Buakinyi abitungu tushinkamisheʼshi Yehowa muitufule na etuata na muulo?

⁵ Su tuibashinkamisheʼshi Yehowa muitufule, atunyisha kuifubuila pepi naye. Tala buakinyi atuakula biabia. Yehowa baadi muitupangie na lukalo lua kufula na kufudibua na bangi. Su muntu muitufule natue namu atumufulu. Su atumonoʼshi Yehowa muitufule na etuata na muulo, natue namu atunyisha kumufula. (1 Yo. 4:19) Patunyisha kumufula, naye namu anyisha kuitufula. Bible ambaʼshi: “Efubuileyi pepi n’Efile Mukulu, n’aye namu akefubuila pepi nenu.” (Yak. 4:8) Biabia, mbikunyi biatudia kushinkamishaʼshi Yehowa muitufule?

NKINYI KI KUITUKUASHA BUA KUSHINKAMISHAʼSHI YEHOWA MUITUFULE?

6. Su tuemushinkamisheʼshi Yehowa mukufule, we kukita kinyi?

⁶ Tungunuka na kuteka Yehowa bua’shi akukuashe oukie buakinyi mukufule. (Luk. 18:1; Lom. 12:12) Teka Yehowa misango i bungi kuifuku su kui mushindo, bua kuuka su mukufule. Ingi nsaa tui kuinyongola ngofu, mu mushindo wabituelela bukopo bua kukumiinaʼshi Yehowa muitufule. Anka tentekieshaʼshi, Yehowa mmukata kukila eshimba diobe. (1 Yo. 3:19, 20) Akuuku nkukila mpa na obe nabene; amono nyikashi i buwa i modi yoshomono mpa na obe nabene. (1 Sa. 16:7; 2 Mi. 6:30) Biabia, mulungule biepusha na mutekie akukuashe bua kushinkamishaʼshi mukufule. (Mis. 62:8) Kunyima kita mianda mu kuipushena na nteko yobe pa kukita ino mianda ayilondo.

7-8. Mukanda wa Misambo awitushinkamisha naminyiʼshi Yehowa muitufule?

⁷ Kumiina abiamba Yehowa muiyi diaye. Yehowa baadi muyokiele banfundi ba Bible buabadia kuakula mianda pabimutale nka biayidi. Tala mushindo wi buwa wabalesha Yehowa kui Davide, bafundileʼshi: “Yehowa ee peepi naa bee na mashimba eenyongole, dingi apaasha bee mu mpombo. (Mis. 34:18) Nsaa yodi muinyongole, we kunangushenaʼshi we bupenka, ta kui muntu apusha biepusha. Anka Yehowa muleeʼshi mu yaya nsaa e pepi nobe muanda amonoʼshi we naye lukalo lukile. Mu ungi musambo, Davide bafundile’shi: “Kingiila mpolo yande muilondo diobe.” (Mis. 56:8) Yehowa akumono podi muinyongole. Akupasukila na apusha bi bubi pakumono we muinyongole. Mu ungi ngakuilo, e nka bu akongola mpolo yobo, ku meso kuaye i na muulo anka bu abikalaa mema e mu mulangi na muulo kui muntu e mu luendo mu kabaaka. Mu Misambo 139:3, Bible ambaʼshi: ‘Obe [Yehowa] we mushinguule mashinda ande oso.’ Yehowa amonaa mashinda oobe oso, kadi atulaa binangu ku mianda i buwa yokitaa. (Eb. 6:10) Buakinyi? Muanda ataa na muulo bioso biokitshi bua kumusankisha.a

⁸ Ku bukuashi bua bifundue bu bino bi muiyi diaye diyokielue, Yehowa e nka bu ambaʼshi: “Nakumiina oukie’shi ne mukufule na nakupasukila.” Nka bubitatupuile kuibimona, Satana akiebe okumiineʼshi Yehowa ta mukufule. Biabia, su ingi nsaa wekala na mpaka’shi Yehowa ta mukufule, ata kapindi bua kunangushena na weyipusheʼshi, ‘Nakumiina abiakula nnanyi? abiakula Satana “nshaye na madimi” su nakumiina abiakula “Efile Mukulu a binyibinyi”?’​—Yo. 8:44; Mis. 31:5.

9. Yehowa mulee baaba boso bamufule kinyi? (Efilu 20:5, 6)

⁹ Nangushena ku abipushaa Yehowa pabitale baaba bamufule. Tala bibaadi Yehowa mulungule Moyise na bena Isalele. (Badika Efilu 20:5, 6.) Yehowa baadi muleeʼshi atungunuka na kulesha baaba bamufule kifulo kia lulamato. Pa muanda wa’shi e na lulamato, tushinkamishe’shi ta mulombene kupela kufula muntu mumufule. (Ne. 1:5) Biabia, su okumiina kushinkamisha su Yehowa mukufule, banda kuiyipushaʼshi, ‘Ami nemufule Yehowa su? Su we mumufule na okuete kukita mobe moso bua kumusankisha, ikala mushinkamisheʼshi mukufule ngofu. (Nda. 9:4; 1 Ko. 8:3) Mu ungi ngakuilo, su we mushinkamisheʼshi we mufule Yehowa, buakinyi wealashena su’ye namu mukufule? Shinkamishaʼshi mukufule na ta n’akusumbushene.

10-11. Yehowa akiebeʼshi omone nkuulo naminyi? (Bena Ngalateya 2:20)

¹⁰ Nangushena pabitale nkuulo. Mulambu wa nkuulo wa Yesu Nkidishitu nyi kia buntu kikile bukata kiabadi bape bantu kui Yehowa. (Yo. 3:16) Biabia, Yehowa batumine Muana aaye buaʼshi akufuile namu nobe su? Oolo! Tala kileshesho kia Mpoolo mutumibua. Tentekieshaʼshi baadi mukite miluisho ikata kumpala kuaʼshi afikie muina Nkidishitu, na kunyima kua biabia, batungunukile na kulua bua kukambila kubofula kuaye. (Lom. 7:24, 25; 1 Ti. 1:12-14) Anka bamuene nkuulo bu kia buntu kiabadi bamupe kui Yehowa pa bupenka. (Badika Bena Ngalateya 2:20.) Tentekieshaʼshi Yehowa baadi muyokiele Mpoolo bua kufunda ano mayi. Biabia Yehowa akumiinaʼshi tulongiele ku ano mayi. (Lom. 15:4) Yehowa akiebe oshinkamisheʼshi, mulambu wa Yesu nyi kia buntu kiadi mukupe pa bupenka. Su omona nkuulo mu uno mushindo, paapa oshinkamishaʼshi Yehowa mukufule pa bupenka bobe.

¹¹ Atutumbula Yehowa pʼaye kutuma Yesu pa nsenga bua kuitufuila. Kadi kangi kabingilo kabadi katakule Yesu bua kufika pa nsenga nyi ka kulongiesha bangi bia binyibinyi pabitale Efile Mukulu. (Yo. 18:37) Yesu muitulongieshe dingi mushindo witufule Yehowa.

YESU MUITULONGIESHEʼSHI YEHOWA MUITUFULE NGOFU

12. Buakinyi atukumiina bibaadi Yesu muakule pabitale Yehowa?

¹² Pabaadi pa nsenga, Yesu baadi mulongieshe bangi pabitale bu muntu bua Yehowa. (Luk. 10:22) Tui na kabingilo ka kukumiina bibaadi Yesu muakule pabitale Yehowa. Buakinyi? Muanda Yesu mushale mafuku e bungi muiyilu pamune na Yehowa kumpala kuaʼshi afikie pa nsenga. (Kol. 1:15) Yesu baadi aukuʼshi Nshaye mumufule ngofu. Na baadi mumone bibaadi mufule bamikeyilu basha lulamato mpa na bafubi baye ba sha lulamato be pa nsenga. Mushindo kinyi ubaadi Yesu mukuashe bangi bua kukuminaʼshi Yehowa muibafule?

13. Yesu akumiinaʼshi tumone Yehowa naminyi?

¹³ Yesu akumiinaʼshi tumone Yehowa nka bu biamumonaa. Mu ma Evanjile, Yesu muitamine Yehowa bu “Yaya” misuusa ifikie ku 160. Na pabaadi esamba na balongi baye, baadi afubisha kishima “Nshenu” sunga “Nshenu e muiyilu.” (Mat. 5:16; 6:26) Kumpala kuaʼshi Yesu afikie pa nsenga, bafubi ba Yehowa basha lulamato abaadi abetamina Yehowa bu ‘Sha bukome boso,’ ‘Sha kuiyilu kula,’ ‘Mupangi’ sunga mu ingi miasu. Anka Yesu baadi akamba kuitamina Yehowa bu “Nshetu.” Bino abileshaʼshi Yehowa akumiinaʼshi bafubi baye befubuile pepi naye nka bu bana abefubuila pepi na nshabo sha kifulo. Tutaleyi misusa ibidi ibaadi Yesu muitamine Yehowaʼshi “Yaya.”

14. Mushindo kinyi ubaadi Yesu muleshe’shi oso a kuatudi e na muulo ku meso kua Nshetu e muiyilu? (Mateo 10:29-31) (Tala dingi kifuatulo.)

¹⁴ Kia kumpala, tutaleyi mayi a Yesu e mu Mateo 10:29-31. (Badika.) Bimusodia nyi tonyi tupela tushi bia kufula sunga kufubila Yehowa. Anka, Nshetu e muiyilu ataa kimusodia kioso kiakia na muulo, auku mpa na pakipono mu nsenga. Su Yehowa apasukilaa tuno tonyi tupela, kushi mpaka anyisha kuitupasukila muanda tuibamufule na atumulanguilaa! Yesu bakuile dingi’shi Yehowa auku mpa na bungi bua nyene i ku mutue kuetu. Bu biabidiʼshi Yehowa auku mpa na tu mianda tupela pabitutale, tushinkamisheyi’shi etupasukilaa ngofu. Kushi mpaka, Yesu akiebe tukumiineʼshi oso a kuatudi e na muulo ku meso kua Nshetu e muiyilu.

15. Mayi a Yesu e mu Yowano 6:44 aetulongiesha kinyi pabitale Nshetu e muiyilu?

¹⁵ Tala kileshesho kia kabidi kia pabaadi Yesu mufubishe kishima “Yaya.” (Badika Yowano 6:44.) Nshetu e muiyilu mukukakie mu bia binyibinyi. Buakinyi baadi mukite bino? Muanda baadi mumone nyikashi yobe i buwa (Bik. 13:48) Pabaadi Yesu muakule mayi e mu Yowano 6:44, baadi pangi akuila mayi a Yehowa e mu Yeelemiya 31:3. Muanka Yehowa ambaʼshi: “Nakukakile kwandi na kifulo kiande kia lulamato.” (Yel. 31:3; tala Oseya 11:4.) Nangushena bi’abipushisha. Nshetu sha kifulo e muiyilu kiatungunuka na kumona nyikashi i buwa i modi, yoshomono sunga nobe nabene.

16. (a) Nkinyi akitulungula Yesu, na buakinyi abitungu tukumiine biakula? (b) Nkinyi ki nkukuasha bua kushinkamishaʼshi Yehowa nyi Nshobe e buwa? (Tala kashibo akambaʼshi: “Aye ndjo Nshetu atudi naaye lukalo.”)

¹⁶ Pa kuitamina Yehowa bu Nshetu, Yesu e nka bu etulungulaʼshi: “Yehowa ta Nshami bupenka; Nshenu mpa nʼanue. Na nenushinkamisha’shi, mmufule oso a kuanudi na amuataa na muulo.” Biabia, su ingi nsaa weyipusha su Yehowa mukufule, tentekiesha mayi a Yesu na weakumiine, muanda Yesu akulaa nka mianda ya binyibinyi, na auku Nshetu kalolo.’​—1 Mp. 2:22.

IKALA MUSHINKAMISHEʼSHI YEHOWA MUKUFULE

17. Buakinyi abitungu tutungunukie na kushinkamishaʼshi Yehowa muitufule?

¹⁷ Abitungu tutungunukie na kushinkamishaʼshi Yehowa muitufule. Nka bu bibatupu kuibimona, Satana atungunuka na kukita muaye moso buaʼshi tulekie kufubila Yehowa. Akumiinaʼshi tubofule, nyi buakinyi atungunuka na kukita biaʼshi tukumiineʼshi Yehowa ta muitufule. Tatukumanga kukumiina madimi a Satana!​—Yob. 27:5.

18. Nkinyi kiodia kukita bua kushinkamishaʼshi Yehowa mukufule?

¹⁸ Bua kunyisha kushinkamishaʼshi Yehowa mukufule, tungunuka na kumuteka buaʼshi akukuashe wemone biabia biakumono. Nangushena ngofu pa ma verse aalesha mushindo witufule Yehowa na wetupasukilaa. Tentekieshaʼshi Yehowa afulaa baaba boso bamufule. Tokumanga kuilua efuku su ndimuneʼshi nkuulo nyi nkia buntu kikupe Yehowa pa bupenka bobe. Kulupilaʼshi Yehowa Nshobe nka bu bibakuile Yesu. Paapa su muntu akuipushaʼshi, “We mushinkamisheʼshi Yehowa mukufule su?” Kushi kunyengakana omualuulaʼshi “Oolo mmunfule! Na efuku dioso, nkuete kukita muande moso bua kumuleshaʼshi nemumufule!”