Mukanda wa kumpala wa Kuilondena kua Mianda

5 Bano nyi bana ba Rubene muana mbedi a Isalele. Baadi muana mbedi, kadi bu bibaadi mulale ekupi dia nshaye,* babapele bana ba Yosefe muana a Isalele matalua aaye a bu muana mbedi, nyi buakinyi mu kuilondena kua kifuko kiabo, tababaadi bamufunde bu muana mbedi. 2 Sunga biekala’shi Yunda baadi mukile bakuabo, na kuadi nyi kubaadi kutuukile muntu baadi na kia kuikala bu mukunkushi, matalua a bu muana mbedi abaadi a Yosefe. 3 Bana ba Rubene muana mbedi a Isalele babaadi: Anoke, Palu, Esrone na Karmi. 4 Bana ba Yowele babaadi: Shemaya, Shemaya batandile Goge, Goge nkutanda Shimeyi. 5 Shimeyi batandile Mika, Mika nkutanda Reaya, Reaya batandile Baale. 6 Baale atanda Bera, yawa ababakuatshile benda naye kui Nfumu Tilgate-pilenesere a mu Asiri, baadi nfumu a bena Rubene. 7 Bakuabo, muyile kuilondena kua bifuko biabo, baba babaabadi bafunde mashina muyile kuilondena kua bifuko bia ba nkambua babo babaadi: Nfumu Yeyele, Zekariya, 8 na Bela muana a Azaze, Azaze muana a Shema, Shema muana a Yowele, yawa baadi mushale ku Arowe mpa na ku Nebo na ku Baale-meone. 9 Bu bibaadi nyema yabo ifuime ngofu mu eumbo dia Gileade, babayile mu kushala dia kutunduka nguba, mpa na ku mbangilo kua kabaaka, ku Muela wa Efrate. 10 Mu mafuku a Saule babaluile na bena Agera, abo nkuibatshimuna, na nkushala mu tushibo tuabo tua mapema mu nsenga yoso i kutunduka nguba kua Gileade.

11 Bekulu ba Gade babashalele pepi nabo, muiumbo dia Bashane mpa na ku Saleka. 12 Mu bashane, Yowele baadi mukata, Shafame amulondela, kubaadi’nyi Yanai na Shafate. 13 Bakuabo ba mu mashibo a bamashabo babaadi: Mikaele, Meshulame, Sheba, Yorai, Yakane, Ziya na Ebere, bantu musambobidi. 14 Baba babaadi bana ba Abihaile muana a Urii, Urii muana a Yaroa, Yaroa muana a Gileade, Gileade muana a Mikaele, Mikaele muana a Yeshishai, Yeshishai muana a Yado, Yado muana a Buze. 15 Aki muana a Abidiele, muana a Guni baadi nfumu a bifuko biabo. 16 Babaadi bashalele mu Gileade, mu Bashane na bibundi bibaadi bimuifunyishe, na mu ma mbalo oso a kudishila nyema a mu Sarone, mpa na ku nfudiilo kuao. 17 Boso buabo babaadi bafundibue mashina aabo muyile kuilondena kua bifuko biabo, mu mafuku a nfumu Yotame a mu Yunda, na a nfumu Yeroboame* a mu Isalele.

18 Bena Rubene, bena Gade na kipindi kia kisamba kia Manasee babaadi na bilobo bia ngoshi 44 760 mu kiluilo kiabo, na biabia bilobo bia ngoshi bibaadi abituala ngabo, mpete ya ngoshi, na mata, na bibaadi bilongieshibue kalolo bua kulua ngoshi. 19 Babaluile ngoshi na bena Agera, Yeture, Nafishe na Nodabe. 20 Biabia Efile Mukulu bebakuashile mu ngoshi, abo nkutshimuna bena Agera na bantu boso babaadi abebakuatshishena. Bu bibaabadi bakimbe bukuashi bu’Efile Mukulu mu yaaya ngoshi, aye namu baadi muteemeshe kuiyaya kuabo, muanda babaadi bakulupile muadi. 21 Babanyengiele bimunuanga biabo, tumelo 50 000, mikooko 250 000 na mpunda 2 000, abo nkukuata bantu 100 000. 22 Bantu bebungi babafuile muanda Efile Mukulu a binyibinyi nyi baadi alu ngoshi. Na babashalele mu ma mbalo aabo mpa na mu kipungo kibabebakuatshile benda nabo.

23 Bana ba mu kipindi kia kisamba kia Manasee, babashalele mu nsenga ibangie ku Bashane na ku Baale-ermone, na ku Senire na ku muengie wa Hermone. Babaadi bungi bukile. 24 Ba nfumu ba bifuko biabo mbano: Efere, Ishi, Eliyele, Azeriyele, Yelemiya, Odawiya na Yadiele. Babaadi bilobo bia ngoshi, bantu bende nkumo na ba nfumu ba bifuko biabo. 25 Kadi, babakutshilue kulesha lulamato kui Efile Mukulu a bankambua babo, n’abo nkulanguila b’efile babaadi bantu ba muiumbo abalanguila . 26 Biabia Efile Mukulu a Isalele baadi mutakule Nfumu Pule a mu Asiri (kuamba’shi Nfumu Tilgate-pilenesere a Asiri) aye nkukuata bena Rubene, bena Gade na kipindi kia kisamba kia Manasee aye nkuenda nabo ku Ala, ku Abore, ku Ara na ku muela wa Gozane. Kuakua nyi kuabadi mpa na lelo uno.