Mukanda wa kumpala wa Kuilondena kua Mianda
10 Bena Filistine babaadi abalu ngoshi na bena Isalele. Basalayi ba bena Isalele babasuukile kumpala kua bena Filistine, bena Filistine nkuipaa bebungi ba kuabadi ku Muengie wa Ngilboa. 2 Bena Filistine babaabangile kuilondena na Saule na bana baye, abo nkuipaa Yonatane, Abinadabe, na Malaki-shuwa, bana ba Saule. 3 Ngoshi ibaadi inunkile Saule, beedi ba mikietue babamuene mbalo ibaadi Saule, abo nkumutapa ngofu. 4 Akupu Saule nkulungula muntu baadi amutuadila bina ngoshi’shi: “Ata lupete lobe lua ngoshi ongipee, tala bano bantu bashi basadiibue bafika mu kunkitshina mianda kushi lusa.” Kadi muntu baadi amutuadila bina ngoshi tabaadi mukumiine nya, muanda baadi apusha moo wi bukopo. Biabia Saule nkuata lupete, nkuiyipaa aye nabene. 5 Pabamuene yawa muntu baadi amutuadila bina ngoshi’shi Saule baafu, batshile lupete luaye, aye nkuiyipaa namu. 6 Biabia Saule na bana baye balume basatu na bantu boso ba mu nshibo yaye babafuile pamune. 7 Pabaadi bena Isalele boso babaadi bashale mu nsenga ya mabanda bamone’shi bantu boso babasuuku, na’shi Saule na bana baye babaafu, bababangile kusuuka na kuleka bibundi biabo; akupu bena Filistine babafikile, abo nkuimushala.
8 Efuku dibalondele, pabayile bena Filistine mu kuata bintu bia bantu bababayipayile, babapetele Saule na bana baye balume mbafue ku muengie wa Ngilboa. 9 Paapa babaatshile bintu bia Saule na bina ngoshi biaye, abo nkumutshiba mutue, na abo nkutuma eyi mu nsenga ishima ya bena Filistine bua’shi bapalakashe mukandu kui mankishi aabo na kui muilo. 10 Akupu babatuudile bina ngoshi biaye mu ntempelo a efile aabo, na abo nkupudika kabaala ka mutue waye mu nshibo ya efile aabo Dagone.
11 Pabaadi bantu boso ba mu Yabeshe mu Gileade bapushe pabitale bioso bibaadi bena Filistine bakitshine Saule, 12 bilobo bioso bia ngoshi bibebuele bienda, biakatuala kitanda kia Saule na bitanda bia bana baye balume. Babebituadile mu Yabeshe na abo nkushiika mifufua yabo muushi mua mutshi ukata mu Yabeshe, akupu abo nkuishidika munda mua mafuku musambobidi.
13 Biabia Saule bafuile bua kukutua lulamato kui Yehowa, muanda bakutshile kukookiela eyi dia Yehowa, dingi bayile mu kuipusha mianda kui muntu abukaa, 14 pamutue pa kuipusha Yehowa mianda. Biabia Efile Mukulu bamuipayile, na aye nkupa Davide muana a Yesee bufumu.