Mukanda wa kumpala wa Kuilondena kua Mianda
14 Irame nfumu a Tiire batumine bantu kui Davide, aye nkumutumina dingi mabaya a mutshi wa cèdre, bantu abatanyaa mabue na abaseyaa mabaya bua kumuibakila nshibo. 2 Paapa Davide nkuuka’shi Yehowa baadi mumutuule binyibinyi bu nfumu a Isalele, muanda bufumu buaye bubaadi bukaamishibue pa muanda wa muilo Waye wa Isalele.
3 Davide batshile bangi bakashi mu Yelusalema, na abo nkumutandila bangi bana balume na bana bakashi. 4 Mashina a bana babaabadi bamutandile mu Yelusalema ngano: Shamua, Shobabe, Natane, Salomone, 5 Ibaare, Elishuwa, Elepelete, 6 Noga, Nefege, Yafiya, 7 Elishama, Beliyada na Elifelete.
8 Pabapushile bena Filistine’shi mbele Davide muimu bu nfumu a Isalele oso mushima, bena Filistine boso babafikile mu kukimba Davide. Pabaadi Davide mupushe wawa muanda, bayile bua kulua nabo. 9 Kunyima bena Filistine babafikile, abo nkubanga kulua na bantu babaadi Muibanda dia bena Refa. 10 Davide nkuipusha Efile Mukulu’shi: “Nyende nkalue na bena Filistine su? Webatuulu muiyasa diande?” Paapa Yehowa nkumulungula’shi: “Enda, nakebatuulu binyibinyi muiyasa diobe.” 11 Biabia, Davide bayile ku Baale-perazime, aye nkuibayipaa kuanka. Paapa Davide bambile’shi: “Efile Mukulu a binyibinyi banshituila eshinda munkatshi mua beshikuanyi bande, anka bu mema e mpumo ababumbula mumba.” Nyi buakinyi babayitanyine yaaya mbalo bu Baale-perazime. 12 Bena Filistine nkuleka ma nkishi aabo kuakua, na Davide batumine eyi, bantu baye nkuiashiika kaalo.
13 Kunyima bena Filistine babafikile dingi mu kuluisha bantu babaadi bashale muibanda. 14 Paapa Davide bayipuishe dingi Efile Mukulu, anka Efile Mukulu a binyibinyi nkumulungula’shi: “Tuebatukanga ngoshi musango umune, anka ebefunye ku mongo, otukile mu mitshi ya baka. 15 Na p’okapusha tuleo bu tuleo tua bantu abatambuka atutukila kunundu kua mitshi ya baka, paapa obangie kulua nabo ngoshi, muanda Efile Mukulu a binyibinyi ekala mukile kumpala kobe bua kuipaa kiluilo kia bena Filistine.” 16 Paapa Davide bakitshine’nka bibaadi Efile Mukulu a binyibinyi mumulungule bua kukita, abo nkuipaa basalayi ba bena Filistine kukatukila ku Gibeone mpa na ku Gezere. 17 Nkumo ya Davide ibapalakeene mu maumbo oso, na Yehowa bakitshine bia’shi bisamba bioso bikale na moo bua Davide.