Mukanda wa kumpala wa Kuilondena kua Mianda

15 Davide batungunukile na kuibaka mashibo aaye mu Kibundi kia Davide, balumbuluile mbalo bua Mushete wa Efile Mukulu a binyibinyi, na aye nkuiushimikila kashibo k’epema. 2 Akupu, Davide bakuile’shi: “Takui muntu su ngumune asemuna Mushete wa Efile Mukulu a binyibinyi, kukatusha nka penda bena Levi, muanda Yehowa mmuibasangule bua kusemuna Mushete wa Yehowa na kumufubila bua loso.” 3 Paapa Davide nkuitanyina Isalele oso ku Yelusalema bua kukatuala Mushete wa Yehowa, na kuenda nao ku mbalo ibaadi muiulumbuluile.

4 Biabia Davide babungile bana ba Alona na bena Levi: 5 Mu bena Kehate mubaadi nfumu Uriyele na bakuabo balume 120; 6 mu bena Merari mubaadi nfumu Asaya na bakuabo balume 220; 7 mu bena Gershome mubaadi nfumu Yowele na bakuabo balume 130; 8 mu bana ba Elizafane mubaadi nfumu Shemaya na bakuabo balume 200; 9 mu bana ba Ebrone mubaadi nfumu Eliyele na bakuabo balume 80; 10 mu bana ba Uziele mubaadi nfumu Aminadabe na bakuabo balume 112. 11 Dingi, Davide nkuitanyina tshite muakuidi Zadoke na Abiatare, na bano bena Levi: Uriyele, Asaya, Yowele, Shemaya, Eliyele na Aminadabe, 12 Davide bebalunguile’shi: “Anue nui ba nfumu ba bifuko bia bena Levi. Biabia etoosheyi anue na bakuenu balume, bua’shi nukaate Mushete wa Yehowa Efile Mukulu a Isalele, nufikie nao nuiutuule mu mbalo yandi muiulumbuluile. 13 Muanda panushibaadi beutuale musango wa kumpala, Yehowa Efile Mukulu eetu baadi muitukuatshile nsungu ibukopo, muanda tatubakimbile mushindo wibuwa wa kuiutuala.” 14 Biabia ba tshite muakuidi na bena Levi babetooshele bua kukatuala Mushete wa Yehowa Efile Mukulu a Isalele.

15 Paapa bena Levi babasemuine Mushete wa Efile Mukulu a binyibinyi na mitandalo ku mapampa aabo, nka bu bibakuile Moyise muyile eyi dia Yehowa. 16 Akupu, Davide balunguile ba nfumu ba bena Levi bua kusangula bakuabo ba tuyimba ba kuyimbanga na muloo oso na bino biombuanga: Biombuanga bia mioshi, nsese na ma sembale.

17 Biabia bena Levi babasanguile bano bantu ba mu kisamba kiabo: Emane muana a Yowele, Asafe muana a Berekiya na Etane muana a Kusheya a mu kifuko kia Merari. 18 Babaadi na bakuabo balume ba mu kisaka kia kabidi: Zekariya, Bene, Yaaziyele, Shemiramote, Yekiele, Uni, Eliabe, Benaya, Maaseya, Matitiya, Elifeleu, Mikeneya, Obede-edome na Yeyele balami ba ku biibi. 19 Ba tuyimba babaadi na kia kuyimba sembale ya kiamo kia munyinga mbano: Emane, Asafe na Etane. 20 Zekariya, Aziyele, Shemiramote, Yekiele, Uni, Eliabe Maaseya na Benaya babaadi abayimbi na biombuanga bia mioshi bibaabadi balumbuule bua’shi bipushene na eyi dia Alamote.* 21 Matitiya, Elifeleu, Mikeneya, Obede-edome, Yeyele na Azaziya babaadi abayimbi nseese ibaabadi balumbuule bua’shi ipushene na eyi dia Sheminite,* bua kutuma ngono. 22 Kenania mukata a bena Levi baadi akunkusha mudimo wa kusemuna Mushete, muanda baadi auku uno mudimo kalolo. 23 Berekiya na Elkana babaadi balami ba ku kiibi kia nshibo ibaadi Mushete. 24 Ba tshite muakuidi babaadi abele mpungi na eyi dibukopo kumpala kua Mushete wa Efile Mukulu a binyibinyi mbano: Shebanya, Yoshafate, Netanele, Amasayi, Zekariya, Benaya na Eliezere. Obede-edome na Yekiya babaadi namu balami ba ku kiibi kia nshibo ibaadi Mushete.

25 Paapa Davide na bakulu ba Isalele na ba nfumu ba bantu kinunu, babayile na muloo oso mu kuata mushete wa kilombeno wa Yehowa ubaadi mu nshibo mua Obede-edome. 26 Pabaadi Efile Mukulu a binyibinyi mukuashe bena Levi babaadi abatuala mushete wa kilombeno wa Yehowa, babalambuile ngombe musambobidi na mikooko ilume musambobidi. 27 Davide baadi mufuale kilamba kibuwa kia musapi ushi na maboko, anka bu bena Levi boso babaadi batuale Mushete, ba tuyimba, na Kenania baadi mukata a bantu baabadi abatuala mushete na a ba tuyimba. Davide baadi dingi mufuale kilamba kia efode kia lin. 28 Bena Isalele boso babatuadile mushete wa kilombeno wa Yehowa, abende na kuela tukundakunda tua muloo na kudila kua lusengua, na mpungi, na sembale, bayimbanga bibukopo na biombuanga bia mioshi na nseese.

29 Kadi pabafikile mushete wa kilombeno wa Yehowa mu Kibundi kia Davide, Mikale muana mukashi a Saule batadile kuididishi, aye nkumona nfumu Davide asanka na etumbu, paapa aye nkubanga kumubepuula muishimba diaye.