Mukanda wa kumpala wa Kuilondena kua Mianda

21 Dingi efuku, Satana batshile kitshibilo kia kumuesha bena Isalele malua, nyi aye nkutakula Davide bua kubadika bena Isalele. 2 Paapa Davide balunguile Yoabe na ba nfumu ba muilo’shi: “Endayi nukabadikie Isalele kubanga ku Beere-sheba mpa na ku Dane. Akupu nualukie nundungule bua’shi ngukie bungi buabo.” 3 Kadi Yoabe bakuile’shi: “Yehowa afuimishe muilo waye misango 100! Muanana nfumuami, ouku’shi bano bantu boso mbapue kuikala bafubi bobe. Buakinyi nfumuami akiebe kukita muanda wi biabia? Buakinyi okimbi kusoolesha Isalele?”

4 Anka nfumu bakamikile Yoabe. Biabia Yoabe nkuenda, na nkuifunya mu Isalele oso, akupu aye nkualukiila mu Yelusalema. 5 Biabia Yoabe nkulungula Davide bungi bua bantu babaabadi bafunde mashina. Mu Isalele mushima mubaadi bana balume abauku kulua na mpete ya ngoshi 1 100 000, na mu Yunda mubaadi bana balume abauku kulua na mpete ya ngoshi 470 000. 6 Anka Yoabe, tabaadi mubadikie bena Levi na bena Benyamine, muanda muiya wa nfumu taubaadi umusankishe.

7 Binyi biabia, uno muanda taubaadi usankishe Efile Mukulu a binyibinyi su nkapeela, na aye nkunyoka Isalele. 8 Paapa Davide nkulungula Efile Mukulu a binyibinyi’shi: “Nakitshi muluisho ukata p’ami kukita bino. Bua binobino, fuila namu mufubi oobe lusa, muanda nakitshi mianda bu muntu shi na binangu.” 9 Akupu, Yehowa besambile na Gade baadi alungula Davide bimonua, akula’shi: 10 “Enda okalungule Davide’shi, ‘Yehowa amba bino: “Nakutuudila manyoka asatu kumpala kobe. Sangula dimune diandi mulombene kukutumina.”’” 11 Paapa Gade bayile kui Davide amulungula’shi: “Yehowa akula bino: ‘Kiosangula nkinyi? 12 Osangula bipua bisatu bia nsala? Su mmieshi isatu yabakubinguabingua kui beshikuanyi bobe, na lupete lua ngoshi lua beshikuanyi bobe alukubinguabingua? Su osangula mafuku asatu a lupete lua ngoshi lua Yehowa, kuamba’shi kipupa kituele muiumbo, na muikeyilu a Yehowa afuishe kabutu mu nsenga yoso ya Isalele?’ Biabia ela binangu kalolo, bua’shi ondungule kiandia kukaluula yawa ekeele muntume.” 13 Paapa Davide balunguile Gade’shi: “Uno muanda aunkalakasha ngofu. Nakumiina’shi mpone muiyasa dia Yehowa, muanda lusa luaye ndukile bukata; anka ntankumiina kupona muiyasa dia muana a muntu.”

14 Paapa Yehowa batumine kipupa mu Isalele, biabia bantu 70 000 babafuile mu Isalele. 15 Dingi, Efile Mukulu a binyibinyi batumine muikeyilu ku Yelusalema bua kumubutula, anka, pabaadi takiebe kubutula Yelusalema, Yehowa bamuene wawa muanda aye nkuinyongola bua aa malua, na aye nkulungula muikeyilu baadi ayipaa bantu’shi: “Bibakumbana! Isha mboko yobe.” Muikeyilu a Yehowa baadi muimane pepi na mbalo ya kukupiila ntete ya Ornane muina Yebuse.

16 Pabaadi Davide mubushe meso bamuene muikeyilu a Yehowa muimane pankatshi pa nsenga na eyilu, mmukuate lupete muiyasa diaye muilutadishe ku Yelusalema. Davide na bakulu babaadi bafuale ma mpaya babaponene musango umune abo nkukupila mapala mu nsenga. 17 Paapa Davide balunguile Efile Mukulu a binyibinyi’shi: “Ami nyi tumine eyi bua’shi babadikie muilo. Ami nyi mukite muluisho, na ami nyi mukite bi bubi; kadi ino mikooko namu, a wayo ngunyi? Ô Yehowa Efile Mukulu ande, ami nyi odia kunyoka na ba mu nshibo ya nshami. Kadi tofuishilanga muilo oobe kino kipupa.”

18 Paapa Muikeyilu a Yehowa balunguile Gade bua nkalungula Davide bua’shi akaamine, akebakile Yehowa kilambuilo ku mbalo ya kukupiila ntete ya Ornane muina Yebuse. 19 Paapa Davide bakaamine muyile bibamulunguile Gade, biabia bibaadi muakule muishina dia Yehowa. 20 Mu yaaya nsaa, Ornane baadi akupila ntete ya blé balulukile aye nkumona Muikeyilu, na bana baye balume bananka babaadi naye babafuamine. 21 Pabafikile Davide kuadi, Ornane babushile meso na aye nkumumona, musango umune bakatukile ku mbalo ya kukupiila ntete aye nkuenda kui Davide, nkumuinamina na nkukupila mpala paashi. 22 Paapa Davide balunguile Ornane’shi: “Ngudishe mbalo yobe ya kukupiila ntete bua’shi nebakile Yehowa kilambuilo panka. Eyingudishe ku muulo wiyilombanyine buashi kipupa akipaa bantu kiimane.” 23 Kadi Ornane balunguile Davide’shi: “Eyaate bu yobe, na muanana nfumuami akite panka biabia bioso biakumiina.* Nakupa dingi ngombe bua milambu ya kushiika kaalo, na mabaaya abakakaa kui ngombe bua kufunta ntete odia kufubisha bu nteete, na ntete ya blé yodia kufubisha bu mulambu wa ntete, nakupa bino bintu bioso.”

24 Paapa Nfumu Davide balunguile Ornane’shi: “Nya, nakuwulu bianka ku muulo wibilombanyine, muanda ntangata bintu biobe nebipe Yehowa sunga kumulambula milambu ya kushiika kaalo yashantushila kintu su nkimune.” 25 Biabia Davide nkupa Ornane ôlo i bushito bua shekele* 600 bua kuula yaaya mbalo. 26 Na Davide bayibakiile Yehowa kilambuilo mu yaaya mbalo, aye nkulambula milambu ya kushiika kaalo na milambu ya butaale. Bayitanyine Yehowa, aye nkumualula pa kutuma kaalo akakatukila muiyilu pa kilambuilo, ako nkushiika milambu ya kushiika kaalo. 27 Paapa Yehowa nkulungula Muikeyilu bua kualusha lupete luaye lua ngoshi mu kipusu kialo. 28 Pabamuene Davide’shi Yehowa bamualula pa yaaya mbalo ya kukupiila ntete ya Ornane muina Yebuse, batungunukile na kulambula panka milambu. 29 Binyi biabia, tabernakele a Yehowa abaabadi bakite kui Moyise mu kabaaka na kilambuilo kia milambu ya kushiika kaalo, bibaadi ku mbalo i kunundu ya ku Gibeone mu aa mafuku. 30 Anka Davide tabaadi na bia kuikuenda bua kukepusha Efile Mukulu, muanda lupete lua ngoshi lua muikeyilu a Yehowa lubaadi lumutshinyishe.