Mukanda wa kumpala wa Kuilondena kua Mianda

20 Ku mbangilo kua kipua,* mu mafuku aendaa ba nfumu ku ngoshi, Yoabe bayile mu ngoshi na basalayi, aye nkuluisha eumbo dia bena Amone ngoshi, bafikile aye nkuifunyisha Raba, anka Davide bashadile mu Yelusalema. Yoabe baadi mulue na kibundi kia Raba na aye nkuikibutula. 2 Akupu Davide batshile kifulu kia ntumbo kibaadi ku mutue wa Malekame, bushito buakio bubaadi bua ntalanta umune a ôlo, ku kiakia kifulu babaadi bekulengieshe na mabue a muulo, babekitudile ku mutue wa Davide. Davide batshile dingi bintu bikile bungi bibaabadi banyengie mu kiakia kibundi. 3 Batuadile dingi bantu babaadi mu kiakia kibundi, aye nkuibatuula bua kukitanga midimo i bukopo ya kutanya mabue, kufuba na biamo bi maashi na tubengiele. Davide bakitshine bino bua bibundi bioso bia bena Amone. Nfudiilo a bioso Davide balukiile na basalayi baye boso mu Yelusalema.

4 Kunyima kua biabia, kubatukile ngoshi ku Gezere na bena Filistine. Paapa Sibekayi muina Usha, nkuipaa Sipayi baadi muikulu a bena Refa, na abo nkubanga kumuna bena Filistine.

5 Kubatukile’nyi ngoshi na bena Filistine, Elanane muana a Yaire bayipayile Lami mukuabo na Goliate muina Gate, mutuela wa mulumbu waye ubaadi bukata nka bu mutshi wabanyinaa buanda ku kiamo kia kuluka nakio bilamba.

6 Ngoshi ibatukile dingi ku Gate, kubaadi muntu baadi bula bua kukaanya, baadi na minue 6 ku eyaasa dioso, na mana 6 ku luao loso, bioso bibaadi 24. Aye namu baadi muikulu a bena Refa. 7 Baadi nka aolomona bena Isalele. Biabia Yonatane muana a Shimeya mukuabo na Davide bamuipayile.

8 Bano bantu babaadi bena Refa ba ku Gate, na babaadi bebayipee kui Davide na bafubi baye.