Mukanda wa kumpala wa Kuilondena kua Mianda
22 Akupu Davide bakuile’shi: “Ino nyi nshibo ya Yehowa Efile Mukulu a binyibinyi, na kino nyi nkilambuilo kia milambu ya kushiika kaalo bua Isalele.”
2 Davide batumine eyi bua kubunga benyi boso be mu nsenga ya Isalele, na aye nkuibatuula bua’shi bekale abatanya mabue, na bua’shi balumbuule mabue bua kuibaka nshibo ya Efile Mukulu a binyibinyi. 3 Davide balumbuluile dingi biamo bibungi bia kukita nabio misumaadi ya ku biibi na bintu bia kulunga nabio, na biamo bia munyinga bikile bungi biabashibaadi balombene kupima, 4 mpa na mabaya a mutshi wa sedre ebungi bukile, muanda bena Sidone na bena Tiire babaadi batuadile Davide mabaya a mutshi wa sedre ebungi bukile. 5 Davide bakuile’shi: “Muana ande Salomone ki mukinga na tabandile kuuka mianda ibungi, aku namu nshibo ayitungu kuibakila Yehowa abitungu ikale ibuwa bukile, bua’shi nkumo yayo na buwa buayo biukibue mu maumbo oso. Nyi buakinyi namulumbuluila bintu.” Biabia Davide nkulumbuula bintu bikile bungi kumpala kua lufu luaye.
6 Akupu David nkuitanyina muana aaye Salomone na aye nkumutumina eyi bua kuibakila Yehowa Efile Mukulu a Isalele nshibo. 7 Davide balunguile muana aaye Salomone’shi: “Ami nshobe, naadi nakumiina kuibaka nshibo bua eshina dia Yehowa Efile Mukulu ande. 8 Kadi Yehowa bandunguile’shi: We musumbule mase ebungi na we mulue ngoshi ibungi, biabia toyibaka nshibo bua eshina diande, muanda we musumbule mase ebungi mu nsenga kumpala kuande. 9 Talanga! Okatanda muana mulume akekala muntu sha butaale, nakamupa kuikisha kui beshikuanyi baye boso bamuifunyishe, eshina diaye adikala Salomone na nakapa Isalele butaale na kuiyikeela mu mafuku aaye. 10 Aye nyi akebaka nshibo bua eshina diande, akafiki muana ande ami namu nakekala nshaye, nakanyingisha nkuasa aaye a bufumu mu Isalele bua loso.’
11 Binobino muana ande, Yehowa ekale nobe, bua’shi bioso biokitshi biende kumpala na oyibakie nshibo ya Yehowa Efile Mukulu oobe, nka bu bibaadi muakule pa bikutale. 12 Anka Yehowa akupe binangu na kapatupatu p’akutuulu bu mukunkushi a Isalele, bua’shi olame miiya ya Yehowa Efile Mukulu oobe. 13 Mianda yobe ayende kumpala nka su olonda kalolo miiya na bitshibilo bibaadi Yehowa mulungule Moyise bua kupa Isalele. Nyinga eshimba na okankamane. Totshinanga sunga kusuusa. 14 Ne muitatshishe ngofu bua kulumbuula ntalanta 100 000 ya ôlo na ntalanta 1 000 000 ya kiamo kia arja bua nshibo ya Yehowa na biamo bia munyinga bikile bungi, na biamo bibungi buabashi balombene kupima, ne mulumbuule dingi mabaya na mabue, kadi okalombasha bingi bintu. 15 We na bena mudimo bebungi, bantu ba kutanya mabue, bantu ba kuibaka, bantu abaseyaa mabaya na bafubi abauku kukita kalolo midimo ya mishindo yoso. 16 Ôlo, kiamo kia arja, kiamo kia munyinga na biamo bibungi buabashi balombene kupima. Ebuee obangie mudimo, na Yehowa ekale nobe.”
17 Akupu Davide batumine eyi kui bakunkushi boso ba Isalele bua kukuasha muana aaye Salomone, amba’shi: 18 “Yehowa Efile Mukulu eenu te nenu na ta muinupe kuikisha ku mpese yoso su? Baadi mutuule bantu ba muiumbo mu maasa muande na eumbo dibaadi ku matalua a Yehowa na a muilo waye. 19 Binobino atayi kitshibilo kia kukimba Yehowa Efile Mukulu eenu n’eshimba dienu dioso na anyima yenu yoso, na nubangie kuibaka mbalo ya kishila ya Yehowa Efile Mukulu a binyibinyi, bua kufika mu kutuesha mushete wa kilombeno wa Yehowa, na bina mudimo bia kishila bia Efile Mukulu a binyibinyi, mu nshibo ayibakibua bua eshina dia Yehowa.”