Mukanda wa kumpala wa Kuilondena kua Mianda
26 Bisaka bia balami ba ku biibi bibaadi bino: Mu bena Kora mubaadi Meshelemiya muana a Koree a ku bana ba Asafe. 2 Meshelemiya batandile bano bana: Zekariya baadi muana mbedi, Yediaele a kabidi, Zebadia a kasatu, Yataniele a kananka, 3 Elame a katano, Yehokanane a kasamombo, Elieho-enai a musambobidi. 4 Obede-edome batandile bano bana: Shemaya muana mbedi, Yehozabade a kabidi, Yowa a kasatu, Sakare a kananka, Netanele a katano, 5 Amiele a kasamombo, Isakare a musambobidi, na Peuletayi a muanda; muanda Efile Mukulu baadi mumuelele miabi.
6 Muana aaye Shemaya batandile bana babaadi ba nfumu ba bifuko bia bamashabo, muanda babaadi bilobo bia ngoshi na balume ba kukulupila. 7 Bana ba Shemaya mbano: Oteni, Refaele, Obede na Elezabade. Dingi, Elihu na Semakiya bakuabo na Shemaya, babaadi namu balume ba kukulupila. 8 Baba boso, babaadi bana ba Obede-edome. Abo, bana babo balume na bakuabo, babaadi balume ba kukulupila na bantu abauku kukita mudimo kalolo. Boso 62 babaadi ba mu kifuko kia Obede-edome. 9 Meshelemiya baadi na bana na bakuabo 18, babaadi balume ba kukulupila. 10 Osa a mu bana ba Merari batandile bano bana: Shimiri baadi nfumu, muanda, sunga biekala’shi tabaadi muana mbedi, nshaye bamutuudile bu nfumu a kifuko, 11 Ilikiya baadi a kabidi, Tebaliya a kasatu, Zekariya a kananka. Bana ba Osa na bakuabo, boso babaadi 13.
12 Mu bino bisaka bia balami ba ku biibi, ba nfumu babaadi na midimo ya kukita mu nshibo ya Yehowa nka bu bakuabo. 13 Biabia babelele bubale, bua kuibatuula ku biibi bilekenelekene, biabikala bakata sunga bapeela, boso babaadi mumune muyile bifuko bia bamashabo. 14 Bubale bua dia kutunduka nguba, bubaponene pe Shelemeya. Pabitale muana aaye Zekariya muntu sha binangu, bubale buaye bubaponene dia kunundu. 15 Bua Obede-edome bubaponene dia kuushi, na bana baye babapetele mudimo wa kutala mashibo a kulamina bintu. 16 Bubale bua Shufame na Osa bubaponene dia kupona nguba, pepi na kiibi kia Shalekete, pepi na eshinda dibaadi adikaamina. Kisaka kia balami kibaadi kitalene na kingi kisaka kia balami; 17 kubaadi bena Levi basamombo babaadi abalama dia kutunduka nguba; ku lupese lua kunundu kubaadi bena Levi bananka efuku dioso; ku lupese lua kuushi kubaadi bangi bananka efuku dioso; na mu mashibo a kulamina bia kudia kubaadi babidi babidi; 18 bua kisanga* dia kupona nguba kubaadi bena Levi bananka muishinda dikata, na babidi mu kisanga. 19 Bino nyi bibaadi bisaka bia balami ba ku biibi, ba ku bana ba Kora na ba Merari.
20 Bua bena Levi, Akiya nyi baadi na bushito bua kutala tudimbo tua bupeta bua nshibo ya Efile Mukulu a binyibinyi, na tudimbo tua bintu biabadi bekashe bia kishila.* 21 Bana ba Ladane, kuamba’shi bana ba muina Gershone a mu kifuko kia Ladane, ba nfumu ba bifuko bia Ladane muina Gershone, Yekiyeli, 22 na bana ba Yekiyeli, Zetame na mukuabo Yowele. Babaadi na bushito bua kulama tudimbo tua kulamina bupeta bua nshibo ya Yehowa. 23 Mu bena Amalame, bena Isala, bena Ebrone na bena Uziele, 24 Shebuele muana a Gershome muana a Moyise, baadi mukunkushi atala mashibo a kulamina bintu. 25 Pabitale bakuabo ba mu lutandua lua Eliezere, kubaadi Rehabiya muana a Eliezere, Rehabiya nkutanda Yeshaya, Yeshaya nkutanda Yorame, Yorame nkutanda Zikri, Zikri namu nkutanda Shelomote. 26 Uno Shelomote na bakuabo balume babaadi abatala tudimbo toso tua bintu biabadi bekashe bia kishila, bibaadi Nfumu Davide, ba nfumu ba bifuko, na ba nfumu ba bantu kinunu, ba nfumu ba bantu lukama na ba nfumu ba kiluilo bekashe bia kishila. 27 Bintu bibaabadi banyengie mu ngoshi babaadi bebikashe bia kishila bua kulumbuula nshibo ya Yehowa. 28 Mpa na bintu bioso bibaadi Samuele muntu baadi amono mianda, Saule muana a Kishe, Abnere muana a Nere, na Yoabe muana a Seruya bekashe bia kishila. Bintu bioso bibaabadi abekasha bia kishila, babaadi abebituulu ku matalua a Shelomite na bakuabo.
29 Mu bana ba Isala, babatuudile Kenania na bana baye ku midimo ibaadi ayikitshika paasha, bu bakunkushi na ba nsushi ba Isalele.
30 Mu bena Ebrone, Ashabiya na bakuabo 1 700, balume ba kukulupila, babaadi abakunkusha mianda ya mu Isalele mu kipindi kia nsenga ki kupona nguba kua Yordane, pabitale midimo yoso ya Yehowa na mudimo wa nfumu. 31 Mu bena Ebrone, Yeriya baadi nfumu a bena Ebrone muyile kuilondena kua bifuko bia bamashabo. Mu kipua kia 40 kia kumunana kua Davide, babakimbile, abo nkupeta mu Yazere mu Gileade bilobo bia ngoshi, balume ba kukulupila munkatshi muabo. 32 Na bakuabo balume babaadi 2 700, balume ba kukulupila, ba nfumu ba bifuko bia bamashabo. Biabia Nfumu Davide bebatuudile kunundu kua bena Rubene, bena Gade na bena kipindi kia kisamba kia Manasee bua mianda yoso itale mudimo wa Efile Mukulu a binyibinyi, na mianda ya nfumu.