Yobo
23 Yobo baluluile’shi:
2 “Mpa na lelo natungunuka nka na kuidila;*
Bukome buande bubapu pa muanda wa kuidila kuande.
3 Su nadia kuuka mbalo ya kupeta Efile Mukulu!
Nadia kuenda mbalo yadi mushale.
4 Nadia kutuala muanda wande kuadi
Na kuusha mukanua muande na bishinkamisho bia kuibingisha nabio;
5 Nadia kuuka bibadia nkungalula
Na kuteemesha ku biakuete kundungula.
6 Badia kufubisha bukome buaye bukata bua kunduisha su?
Nya, binyibinyi badia nkuteemesha.
7 Kuakua muntu mululame badia kuipushena naye,
Na Nsushi ande badia kumbingisha bua loso.
8 Anka su nende dia kutunduka nguba, te kuanka;
Na nalukiila, ntshi mumupete.
9 Pa kuete kufuba ku mboko i bakashi ntshi kuete kumumona;
Akupu p’aluluka ku mboko i balume, ntshi kuete nka kumumona nya.
10 Anka auku eshinda dinatuele.
Kunyima ku’aye kuntompa, nekala nka bu ôlo mukile buwa.
11 Ngua yande ngilonde kalolo muadi muashine;
Ne mulame eshinda diaye kushi kuiditupilua.
12 Ntshi mulekie miiya yadi mumpe.
Ne mulame kalolo mayi aaye kukila mpa na biabadi bantekie.
13 P’ata kitshibilo, nanyi akumukanda?
P’akumiina kukita kintu kampanda, ekikitshi.
14 Muanda akakumbasha kioso kiadi mupue kungatshila kitshibilo,
Na e na bintu bi bungi bi biabia biadi mulame.
15 Nyi buakinyi nemukalakashue pa muanda waye;
Pa ngiele binangu pabimutale, moo wande aufuimi.
16 Efile Mukulu mungikashe muntu sha moo,
Na Sha Bukome Boso bankuatshisha moo.
17 Anka mufito tawabandile kunguminyisha
Sunga mufito wi bukupo ubuikile mpala yande.