Yobo
22 Elifaze muina Temane baluluile’shi:
2 “Muntu mmulombene kuikala na bukuashi kui Efile Mukulu?
Muntu sha binangu mmulombene kuikala na bukuashi kuadi?
3 Sha Bukome Boso ekalakashaa* pa muanda’shi we mululame
Sunga’shi e na ki’apetaa pa muanda’shi we na lulamato?
4 Akakunyoko
Na kuenda mu kusamba nobe pa muanda omutshinaa su?
5 Ta mpa muanda’shi bubi bobe mbufuime ngofu
Na bilubilo biobe tabi na nfudiilo?
6 Muanda okuete kunyenga bakuenu bintu bu kieko kushi muanda,
Na kufuula bantu bilamba biabo webalekanga musua.*
7 T’opaa bantu bakokie mema a kutoma,
Na osuminaa basha nsala bia kudia.
8 Nsenga ngia muntu sha bukome,
Na muntu abadi bakumiine nyi mushale muanka.
9 Anka we mualushe bakashi kilele ku maasa bisumanga,
Na we musoose maboko a bana ba nshiye.*
10 Nyi buakinyi miteo* ngikuifunyishe,
Na mianda ya mu kimpulukamba ayitshinyishaa ayikutshinyisha.
11 Nyi buakinyi tue bia kumona muanda kui mufito wi bukopo,
Na mema ebungi ngakubuikile.
12 Efile Mukulu te muiyilu mula su?
Na tala bi nyenyenyi yoso muiyilu mula.
13 Anka buakula’shi: ‘Efile Mukulu auku binyibinyi kinyi?
Mmulombene kusambisha mu mufito wi bukopo su?
14 Makumbi ngamushikiile, biabia te bia kumona
Pa kuete kutambuka mu kifunda kia muiyilu.’
15 Okalondo eshinda dia kala
Dibaabadi batambukile kui bantu bebubi,
16 Bantu babaabadi bakatushe kumpala kua kipungo kiabo
Basha kitako kibaabadi balaashe kui mema aule?*
17 Babaadi balungule Efile Mukulu’shi: ‘Etutadiile!’
Na ‘Sha Bukome Boso mmulombene kuitukita kinyi?’
18 Aku namu Aye nyi baadi muushe mashibo aabo na bintu bibuwa.
(Binangu bibubi bui biabia bi kula na biande.)
19 Bantu balulame abakebimono na basankie,
Na bantu bashi basoole muanda abakasepe na bakule’shi:
20 ‘Beshikuanyi betu mbabutudibue,
Na kaalo akakatatshisha bintu biabo bishale.’
21 Kimba biakumuuka, na okekala mu butaale;
Akupu okapete bintu bibuwa.
22 Kumiina muiya wa kukanua kuaye,
Na olame mayi aaye muishimba diobe.
23 Su bualukiila kui Sha Bukome Boso, okalushibua bi bodi kumpala;
Su bokatusha kukutua kululama mu kashibo kobe k’epema,
24 Su bodia kusumbula ôlo* oobe mu lufufi
Na kusumbula ôlo a ku Ofire mu mpongo ya mbuebue,
25 Paapa Sha Bukome Boso akekala ôlo oobe,
Na akekala kiamo kiobe kia arja kikile buwa.
26 Muanda paapa muloo oobe aukekala mui Sha Bukome Boso,
Na okabandulusha mpala yobe kui Efile Mukulu.
27 Okamuisendeela, na akakuteemesha;
Na okakumbasha mitshipo yobe.
28 Kioso kiota kitshibilo bua kukita akikende kumpala,
Na etaata adikamunyika muishinda diobe.
29 Muanda okayishiibua milongo pu’akula na kuitatula,
Anka akapaasha bantu basha kuiyisha.*
30 Akapaasha baba bashi basoole muanda;
Biabia su maasa oobe ngatooshibue, okapaashibua binyibinyi.”