Yobo
40 Yehowa batungunukile na kualula Yobo’shi:
2 “Muntu ayimenaa nka pa bilubilo bia bangi mmulombene kulua na Sha Bukome Boso su?
Yawa akiebe kusaashila Efile Mukulu alule.”
3 Yobo baluluile Yehowa’shi:
4 “Tala! Ntshi na muulo.
Ne mulombene nkualula kinyi?
Natuulu eyasa kukanua kuande.
5 Nekalanga muakule mususa umune, anka tangalula dingi;
Ne muakule mususa wa kabidi, anka tangakula dingi.”
6 Akupu Yehowa baluluile Yobo mu kipapi ki bukopo’shi:
7 “Elumbuule namu, bu muana mulume;
Nakuele nkonko, na ongalule.
8 We mulombene kuelesha kululama kuande mpaka su?
We nkumponeesha kilumbu bua’shi obe obingie su?
9 We na mboko i bukome bu y’Efile Mukulu a binyibinyi,
Sunga’shi eyi diobe di kukungula bu diaye su?
10 Lesha namu ntumbo yobe, na biodi bukome;
Lesha kineemo kiobe na bukata bobe.
11 Lesha nsungu yobe ibukopo;
Tala muntu oso sha kuitatula na omuishe.
12 Tala muntu oso sha kuitatula, na omuishe milongo,
Na ashina bantu bebubi mbalo yabadi bemane.
13 Ebafuamishe boso mu lufufi;
Webanye* mu mbalo ifuame,
14 Paapa, sunga ami nakakumiina’shi,
Mboko yobe ibalume ngilombene nkupaasha.
15 Binobino, tala Behemote,* anaadi mukite nka bu biandi mukukite.
Adiyaa lubishi nka bu ngombe.
16 Tala bukome bui mu bioko biaye
Na bukome bua misamba y’efu diaye!
17 Anyingishaa mukila waye bu mutshi wa sedre;
Mishila ya matankata aaye ngituelene.
18 Mifufua yaye inka bu ikitshibue na kiamo kia munyinga;
Mikolo yaye inka bu milonda ya kiamo kifushue.
19 E mu mulongo wa kumpala* mu mifubo y’Efile Mukulu;
Anka penda mupangi aaye nyi mulombene kuifubuila kuadi na lupete luaye lua ngoshi.
20 Muanda miengie ayimutuushilaa bia kudia,
Mbalo ayashilaa nyema yoso ya mu kisuku.
21 Alalaa muushi mua mitshi ya lotise,
Afuamaa mu malengie a mu mema.
22 Mitshi ya lotise ayimuputaa mu mutaala wayo
Na mitshi i na masaki ebungi ya muibanda* ayimuifunyishaa.
23 Su muela autunkatunka tekalakashaa.
T’atshinaa sunga Yordane amuikupila kukanua.
24 Muntu mmulombene kumukuata p’akuete kutala su,
Sunga kutubula mpembe yaye na ndobo?*