Yobo
42 Akupu Yobo baluluile Yehowa’shi:
2 “Binobino nauku’shi we na ngobesha ya kukita bintu bioso
Na kintu kioso kionangushena bua kukita taki biankukambila nya.
3 We muakule’shi: ‘Nnanyi kuete ku’elesha elango diande mufito kushi kiukilo?’
Biabia nekeele muakule, anka kushi kushinguula
Mianda ya kukaanya ngofu yanshanguuku.
4 We muakule’shi: ‘Nteemeshe namu, na n’akula.
Nakuele nkonko, na ongalule.’
5 Matui ande ngapushe nkumo yobe,
Anka binobino nakumono na meso ande.
6 Nyi buakinyi nekalashena bua biangakuile,
Na nashala mu lufufi na mu buto bua kulesha’shi n’elanga.”
7 Kunyima kua Yehowa kulungula Yobo bino bishima, Yehowa balunguile Elifaze muina Temane’shi:
“Nsungu yande ayikutembela obe na bakuuku bobe babidi, muanda tanui bakule bia binyibinyi pambitale bu bibakitshi mufubi ande Yobo.” 8 Binobino atayi ngombe ilume musambobidi na mikooko ilume musambobidi, nuende kui mufubi ande Yobo na nuiyituushe bu mulambu wa kushiika kaalo buenu. Na mufubi ande Yobo enutekiela. Mbinyibinyi nakumiina luteko* luaye lua kukutua kuinukitshina mianda muyile kukutua kuenu kua binangu, muanda tanui bakule bia binyibinyi pambitale bu bibakitshi mufubi ande Yobo.”
9 Biabia Elifaze muina Temane, Bildade muina Shuwa na Zofare muina Naama babayile na abo nkukita bibaadi Yehowa muibalungule. Na Yehowa nkukumiina luteko lua Yobo.
10 Kunyima kua Yobo kutekiela bakuuku baye, Yehowa bakatuishe makienga aaye na amualuisha bupeta buaye. Yehowa bamupeele bintu bibaadi nabio kumpala misusa ibidi. 11 Bakuabo balume boso na bakuabo bakashi na bakuuku baye boso ba kala babafikile kuadi na badia naye bia kudia mu nshibo muaye. Abo nkumusamba na nkumunyingisha pabitale makienga oso abaadi Yehowa mutadiile’shi amufikile. Oso a kuabadi bamupeele ekuta dia kiamo kia arja na kakano ka ôlo.
12 Biabia Yehowa baadi muelele bipua bia nfudiilo bia muwa wa Yobo miabi kukila bipua bia ku mbangilo, na Yobo nkupeta mikooko 14 000, tumelo 6 000, ngombe 2 000,* na mpunda ikashi 1 000. 13 Baadi mupete dingi bana balume musambobidi na bana bakashi basatu. 14 Baadi muudikie muana aaye mukashi a kumpala bu Yemima, a kabidi bu Kezia na a kasatu bu Kerene-Apuke. 15 Mu diadia eumbo dioso tamubaadi muana mukashi e buwa bu bana bakashi ba Yobo, na nshabo baadi muibape bupianyi pamune na bakuabo balume.
16 Kunyima kua biabia Yobo bakitshine bipua 140, na aye nkumona bana baye na bekulu baye, bipungo binanka. 17 Nfudiilo a bioso Yobo bafuile, kunyima kua kulala mafuku ebungi na a muloo mu muwa waye.*