Yobo
9 Yobo baluluile’shi:
2 “Mbinyibinyi nauku’shi bi’nka biabia.
Anka muntu afuiyaa e kubinga kilumbu p’asamba n’Efile Mukulu su?
3 Su muntu akumiina kuikakeena Naye,*
Yawa muntu tamulombene kualula ku lukonko su ndumune lua ku nkonko Yaye kinunu.
4 E na binangu* na bukome buibungi.
Nnanyi mulombene kumukambila na kukutua masaku?
5 Atentulaa* miengie kushi muntu kuuka;
Eyifuudika mu nsungu yaye.
6 Atshinkishaa nsenga mu mbalo yayo,
Biabia misungo yayo ayisuusu.
7 Atuminaa nguba eyi buashi tamunyikanga
Na kushikiila etaata dia nyenyenyi;
8 Aye nabene aadishaa mayilu,
Na atambukilaa panundu pa mbundambunda ila ya kalunga ka mema.
9 Mmukite bisaka bia nyenyenyi bia Asha,* bia Kesila,* na bia Kima,*
Na bisaka bia nyenyenyi bi muiyilu dia kuushi;*
10 Akitaa mianda ikata na ibukopo kupusha,
Mianda ya kukaanya ishi bia kubadikibua.
11 Bakidi pepi nami, na ntshi bia kumumona;
Bakidi kumpala kuande, anka ntshi mumutundule.
12 P’anyengie kintu, nanyi mulombene kumukambila?
Nanyi mulombene kumulungula’shi: ‘Okuete kukita kinyi?’
13 Efile Mukulu t’akalama nsungu yaye;
Sunga bakuashi ba Rahabe* abakamuinamina.
14 Abikala naminyi pammualula
Abitungu nsangule bishima biande kalolo bua kuisamba naye!
15 Sunga’shi nadia kuikala mubingie, ntshi nadia kumualula.
Nadia penda kuisendeela nsushi* ande bua’shi ampushishe lusa.
16 Su namuitanyina, angalula su?
Ntamono’shi akateemesha eyi diande,
17 Muanda ansooso na kipapi kibukopo
Na afuimisha malonda ande kushi muanda.
18 Tantadiila buandia kuyooka;
Atungunuka na kunguusha na bintu bi buulo.
19 Su mpabitale bukome, aye nyi e na bukome.
Su mpabitale kusamba, akula’shi: ‘Nanyi mulombene nkusambisha?’*
20 Su nadia kuikala mubingie, kukanua kuande kubadia nkumpiisha;
Sunga’shi ne mululame,* angakula’shi ne mupiile*
21 Sunga’shi ne mulame lulamato luande, ntshi muikulupile;*
Napele muwa wande.
22 Bioso bi mumune. Nyi buakinyi nakula’shi:
‘Abutula muntu shi musoole,* na muntu e bubi mu mushindo umune.’
23 Su kuula kua mema a mpeshi bukidibukidi akufuisha lufu lua mu kimpulunkamba,
Asepe bantu bashi basoole bia bashi na lukulupilo.
24 Nsenga ngituudibue mu maasa a bantu bebubi;
Mmupuute meso* a ba nsushi bayo.
Su ta nnaye, paapa, nnanyi?
25 Binobino mafuku ande aende lubilo kukila muntu asuukaa lubilo;
Aende lubilo kushi kumona muanda wibuwa.
26 Aaselemuka nka bu maato a malengie,
Nka bu bionyi bia miumba abiyiki lubilo bua kukuata kia kudia kiabio.
27 Su nakula’shi: ‘Nayiluankana kuidiladila kuande,
Nashintuula mmuenekielo ande na nekale na muloo,’
28 Natungunuka na kupusha moo bua makienga ande oso,
Na nauku’shi t’okammono bu muntu shi musoole.
29 Nasanganyibua bu muntu mupiile.
Biabia buakinyi abitungu nekupilekupile mu bisumanga?
30 Su netumpa na mema a neje basunguluka,
Na natoosha maasa ande na nsabanga,
31 Paapa ongiele mu buina,
Abifikisha mpa na bilamba biande mu nkushikua.
32 Muanda ta muntu bu’mi bua’shi mmualule,
Bua’shi tuende naye mu kusamba.
33 Takui muntu su ngumune a kuitutshiba muanda,
Akuikala bu nsushi* eetu.
34 Su aleka nkukupila,*
Na bintu biaye abitshinyishaa bia leka nkutshinyisha,
35 Paapa nakesamba naye kushi kutshina,
Muanda tangakulaa na kutshina.