Yobo
11 Zofare muina Naama baluluile’shi:
2 “Ano mayi oso aashala kushi lualulo,
Sunga’shi kuakula bibungi nkulombene kubingisha muntu?*
3 Buakulakule bobe bui kuuminyisha bantu?
Muntu tamulombene nkusaashila bua mayi oobe a kasaabu?
4 Muanda buakula’shi: ‘Dilongiesha diande di selele,
Na nemutooshibue ku meso kobe.’
5 Anka su Efile Mukulu aakula
Na akufunguila milomo yaye!
6 Biabia badia nkufumbuila mianda ifuame ya binangu,
Muanda kui mianda ibungi ya kulonga pabitale binangu.
Paapa okatundula’shi Efile Mukulu akitaa biashi ofuidibue lusa ku bingi bilubilo biobe.
7 We mulombene kuuka mianda ikata y’Efile Mukulu
Sunga kuuka mianda yoso pabitale* Sha Bukome Boso?
8 Binangu bi bula bua muiyilu kukila eyilu. We mulombene kukita kinyi?
Bi bula bua muushi kukila Mashama.* We mulombene kuuka kinyi?
9 Bi bula kukila nsenga
Na bukata kukila kalunga ka mema.
10 Su Efile Mukulu akidi, akuata muntu na enda naye ku mbulamatadi,
Nanyi mulombene kumukambila?
11 Muanda auku bantu basha madimi.
P’amono muanda wibubi, t’eutuudila binangu su?
12 Anka muntu sha mu mutue mui bisumanga akapusha
Nka penda palombene mpunda a kisuku kutanda muntu.*
13 Su bodia kulumbuula eshimba diobe
Na kuwola maasa oobe kuadi.
14 Su eyasa diobe adikitshi muanda wibubi, edituule kula nobe
Na totadilanga kukutua kululama kushale mu tushibo tobe tua mapema.
15 Muanda paapa okabandulusha mpala yobe kushi buufu;
Okemana munyingie, kushi moo.
16 Muanda paapa okalubu nkalakashi yobe
Okeyitentekiesha nka bu mema apue kualaala.
17 Nshalelo oobe akekala na etaata dibukopo kukila mu nsaa ya midi;
Mpa na mufito waye aukekala bu namashika.
18 T’okatshinyi muanda kui lukulupilo,
Okatala aku na aku na okalala mu kuiyikeela.
19 Okalala kushi muntu su ngumune a kukutshinyisha,
Bantu bebungi abakakimbi bua kukuminyibua nobe.
20 Anka meso a bantu bebubi aakabofula;
Tabakapete mbalo yabadia kusuukila,
Na lukulupilo luabo alukekala penda lufu.”