Yobo
16 Yobo baluluile’shi:
2 “Ne mupue kupusha mianda ibungi i bino kumpala.
Pamutue pa kunyingisha, nubanyisha mpa na kunkiengiesha!
3 Mayi a bisumanga* e na nfudiilo su?
Nkinyi akikutakula bua kualula bino?
4 Nami namu nadia kuakula nka bi’anuakula.
5 Pamutue pa biabia nadia kuinunyingisha na mayi a mukanua muande,
Na kusamba kua milomo yande kubadia kutshimbisha busungu.
6 Su n’akula, busungu buande t’abutaala,
Na su nalekie kuakula, busungu buande abupeele su?
7 Anka binobino bankokesha;
Babutula bantu ba mu nshibo muande boso.*
8 Dingi bonkuata, na bibekala bukamonyi,
Biabia kunyaana kuande kubebo na kubanfundu.
9 Nsungu yaye ngisaane mu bipindi, na mmushikue.
Kuete nkudiila meno.
Muishikuanyi ande mmutonuene meso aaye.
10 Bababuula mukanua muabo bikata bua nkumina,
Babankupila ku matama na kasaabu;
Babebungu bebungi bua kunduisha.
11 Efile Mukulu bantuulu mu maasa a tu nsongualume,
Na bantakula mu maasa a bantu bebubi.
12 Nekeele muiyikeele, anka bansasula;
Bankuata muikoshi na bansooso;
Akupu bantuulu bu kintu kiaye kia kuasa bintu.
13 Bantu baye abelaa buta bangifunyishe;
Atubula nfiyo yande na takuete kumpusha lusa;
Apongoola nsumiinyi* ande mu nsenga.
14 Kuete kuntubulatubula;
Kuete kuiyela kuandi bu musalayi.
15 Ne mutele ma mpaya pamune bua kushikiila kikoba kiande,
Na nemushiikie kinemo* kiande mu lufufi.
16 Meso ande abamongo na kudila,
Na bitshitshi* biande mbifiite ngofu,
17 Sunga biabidi’shi maasa ande tangakite butomboshi
Na luteko luande ndutokane.
18 Ô nsenga, tobuikilanga mase ande!
Na takuikalanga mbalo ya kuikisha bua kudila kuande!
19 Mpa na binobino, kamonyi kande ke muiyilu;
Muntu mulombene kutuusha bukamonyi pa bintale e muiyilu.
20 Benami bakuete nkusenga
Apatuusha eyiso diande mpolo* kui Efile Mukulu.
21 Muntu kampanda atshibe kilumbu pakantshi pa muntu na Efile Mukulu,
Nka bu biabakitaa pankatshi pa muntu na muinaye.
22 Muanda bipua bibashala mbipeela,
Na nende muishinda diabash’abalukiilaa.