Yobo
20 Zofare muina Naama baluluile’shi:
2 “Nyi buakinyi binangu biande bikalakashue abintakula bua kualula
Muanda nemukalakashue.
3 Napusha kusaashilua kampanda kubankaa;
Na binangu biande abintakula bua kualula.
4 Binyibinyi kubanga kala toboukile uno muanda
Muanda bi bino kasha muntu* atudibua pa nsenga,
5 Eshi musaase wa muloo wa muntu ebubi ngua kapindi kapeela
Na muloo wa muntu sh’atshinaa Efile Mukulu* tawishaa.
6 Sunga biekala’shi nkumo yaye ngikaamine mpa na muiyilu
Na mutue waye ngukakume mpa na mu makumbi,
7 Akashimina bua loso nka bu tufi tuaye;
Baba babaadi na kiubishi kia kumumona abakakula’shi: ‘E kunyi?’
8 Akapapama nka bu kilotua, na tabakamumono nya;
Abakamubingi nka bu kimonua kia bufuku.
9 Eyiso dibaadi dimumone kumpala tadikamumono dingi,
Na mbalo yaye tayikamumono dingi nya.
10 Bana baye abakakimbi kukuminyibua kui balanda,
Na maasa aaye aakalusha bupeta buaye.
11 Mifufua yaye ibaadi iule na bukome bua bu nsongua,
Anka ayikalala* naye mu lufufi.
12 Su kintu kibubi akipushika kiisaasa mukanua muaye,
Su mmuikifuamishe muushi mua ludimi luaye,
13 Su ekipusha buwa na tamuikilekie
Anka batungunuka na kuikilama mukanua muaye,
14 Biakudia biaye abikafiki busasa munda muaye
Abikafiki nka bu lulengo* lua nyoka a kobra munda muaye.
15 Mmumine bupeta, anka akebulasa;
Efile Mukulu akebutuusha boso muifu diaye.
16 Akafifi lulengo lua nyoka a kobra;
Meno* a nyoka a lulengo aakamuipaa.
17 Tan’amone miela ya mema,
Miela ya buuki na manteka.
18 Akalusha bintu biaye kushi kuibifubisha;*
Takasanka na bupeta bua busunga buaye nya.
19 Muanda mmusoose na mmusumbushene balanda;
Munyengie nshibo yashi muibakie.
20 Anka t’akepusha mu butaale;
Bupeta buaye t’abukamupaasha.
21 Tankumushadile kintu su nkimune kia kudia;
Nyi buakinyi bupeta buaye tabukayisha
22 Apafuimi bupeta buaye ngofu, tuinyongoshi atumufuimina;
Makienga aamufikila na bukome boso.
24 P’asuuku bina ngoshi bia kiamo,
Mikietue ya mu buta bua kiamo kia munyinga* ayikamutubula.
25 Atuusha mukietue mu mongo muaye,
Kina ngoshi akipenyapenya mu nsumiinyi aaye,
Na moo aumukuata.
26 Mufito wibukopo autengiela bupeta buaye;
Kaalo kabashi bapupule kui muntu akamushiiki;
Dikienga aditengiela muntu oso mupande mu kashibo kaye k’epema.
27 Eyilu adikatuusha kilubilo kiaye patooka;
Nsenga ayikeebo bua kumuluisha.
28 Kuula kua mema a mpeshi akukalaasha nshibo yaye;
Akukekala mpeshi ebukopo muifuku dia nsungu y’Efile Mukulu.
29 Dino nyi efuto diabakapa muntu ebubi kui Efile Mukulu,
Bupianyi buabadi bamutshibile kui Efile Mukulu.”