Yobo
21 Yobo baluluile’shi:
2 “Teemeshayi kalolo biangakula;
Kuno nyi kusamba kua nunsamba nako.
3 Ikalayi nami luishinko pangakula;
Pampudisha kuakula paapa nui bia nkusepa.
4 Pa nedidi, nkuete kuididila muntu su?
Su bibadia kuikala biabia, ntshi* nadia kushimisha luishinko su?
5 Ntaleyi na nushale anukaanya;
Tuulayi eyasa dienu kukanua kuenu.
6 Pa nebielela binangu, nakalakashua,
Na mbidi yande yoso ayisuusu.
7 Buakinyi bantu bebubi abashalaa na muwa,
Abanunupa, na abafiki ba mpeta?*
8 Bana babo be nka kumpala kuabo,
Na abamono mpa na bekulu babo.
9 Mashibo abo ngalamibue kalolo, tamui moo,
Na Efile Mukulu t’ebanyooko na lufimbo luaye.
10 Ngombe yabo ilume ayimitshisha kushi lukalakashi;
Ngombe yabo ikashi ayitanda kushi kupongola mayimi.
11 Bana babo balume bakuete kusuuka lubilo paasha nka bu lombe lua mikooko,
Na bana babo bakinga bakuete kuitumbatumba.
12 Abayimbi na etumba na lusese
Abasanka pabapusha tuleo tua mulengie.*
14 Anka abalungula Efile Mukulu a binyibinyi’shi: ‘Etutadiile!’
Tatui na lukalo lua kuuka mashinda oobe.
15 Sha Bukome Boso nanyi buashi atue tumufubile?
Atupete kinyi su tubamuuku’?
16 Anka nauku’shi tabe na matalua pa bupeta buabo.
Binangu bia muntu ebubi bi kula nami.
17 Mmisusa bungi kinyi ishime kimunyi kia bantu bebubi?
Mmisusa bungi kinyi ayibafuilaa masaku?
Mmisusa bungi kinyi ayibafuishila Efile Mukulu kabutu mu nsungu yaye?
18 Abafikaa bu bisosua kumpala kua lupapi,
Na bu bipusu bia ntete biabatuala kui kipapi kibukopo su?
19 Efile Mukulu akalama dinyoka dia muntu bua bana baye.
Anka Efile Mukulu amufute bua’shi ediukie.
20 Meso aye amone kubutudibua kuaye,
Na aye atome nsungu ya Sha Bukome Boso.
21 Muanda buakinyi ekalakasha pabitale akikafikila nshibo yaye kunyima kuaye
Su bungi bua mieshi yaye mbupeeleshue?*
22 Nanyi mulombene kulongiesha Efile Mukulu kiukilo,*
Aku namu nnaye asambishaa mpa na bantu be kunundu ngofu?
23 Muntu afu na bukome buaye boso
Pashi na muanda aumukalasha na mmushale talalaa,
24 Pe matankanta aaye ngaule na muimu
Na mifufua yaye i bukopo.*
25 Anka ungi muntu afu na dikienga dibukopo,*
Kushi’ye kutompa bintu bibuwa.
26 Boso buabo abakalala mu lufufi,
Na bifinyo abikebadi boso.
27 Talayi! Nauku kalolo bianukuete kunangushena
Na mpango yanudi nayo ya nkukita bibubi.*
28 Muanda anuakula’shi: ‘Nshibo ya muntu muende nkumo ikunyi,
Na kashibo k’epema kabaadi akashala muntu ebubi ke kunyi?
29 Tanuibepushe bantu abakitaa nyendo?
Tanui balongie kalolo mianda yabadi bamone,*
30 Eshi abakaluila muntu ebubi muifuku dia masaku
Na kumupaasha muifuku dia nsungu?
31 Nanyi akamulungula’shi muikelo waye tawi buwa,
Na nnanyi akamufutu bua biadi mukite?
32 P’abakende naye ku mashama,
Mashama aaye aakalamibua.
33 Nsenga iibumbe ya muibanda* ayikekala nsaasa kuadi,
Na bantu boso abamulondo*
Nka bu bungi bua bantu bushi bia kubadika bubadiile kumpala kuaye.
34 Biabia buakinyi anumpa kusambibua kushi kapu?
Mu ngalulo yenu mui nka penda madimi!”