Yehowa akakukuasha bodia kunyingiila nkalakashi ya mu nshalelo

1. Nkishinkamiisho kinyi kiatudi nakio?

BU BIATUDI muilo wa Yehowa, atuuku’shi mmuitufule, na akumiina’shi tuikale na nshalelo e buwa. (Lom. 8:35-39) Tui bashinkamishe dingi’shi mayi a kulonda a mu Bible aetukuashaa misuusa yooso nsaa y’atuiatumikila. (Yesh. 48:17, 18) Bi kuikala naminyi su tuapeta nkalakashi yatush’abatengielanga?

2. Nkalakashi kinyi yatudi balombene kufumankana nayo, na ino nkalakashi ngilombene kuitutakula mu kuiyela nkonko kinyi?

² Bafubi booso ba Yehowa bakuete kunyingiila nkalakashi. Bu kileshesho, bena kifuko be kuituinyongosha mu ungi mushindo. Tui balombene kupeta mukumbo wi bukopo, ulombene kuitukutshishua kukita bi bungi mu mudimo wa Yehowa. Tui balombene kupeta bukitshishi bui bubi abutukila ku bintu bipangibue. Sunga’shi tui balombene kubinguabingua pa muanda wa nkumiino yeetu. Nsaa y’atupete nkalakashi i bino, tui balombene kuiyipusha’shi: ‘Buakinyi bino bibamfikila?’ Ne mukite kintu ki bubi su? Bino abilesha’shi Yehowa t’angielela miabi? Obe namu tobopushishe uno mushindo su? Su ngi biabidi, totshobolokanga. Bafubi be bungi ba Yehowa baasha lulamato, mbanyingiile ino nkalakashi i mumune, na abapushaa nabo nka biabia.​—Mis. 22:1, 2; Aba. 1:2, 3.

3. Mukanda wa Misambo 34:20, awitulongiesha kinyi?

³ Badika Misambo 34:20. Tala mianda ibidi i na muulo i mu misambo: (1) Bantu balulame abapetaa malua e bungi. (2) Yehowa etupashaa ku malua eetu. Yehowa etupashaa mushindo kinyi? Mushindo umune w’etukuashaa, mpa kuitupa mmueneno e buwa a nshalelo mu uno ndumbuluilo e bubi. Sunga Yehowa mmuitulee’shi atukekala na muloo mu kumufubilanga, ta mmuituikashe na nshalelo a bulungantu binobino bia kukutua kupeta nkalakashi nya. (Yesh. 66:14) Yehowa etutekie’shi tutuule binangu bietu nka ku mafuku aafiki, kipungo ki’atukekadika na nshalelo aakumiina’shi tuikadikie na muloo wa losoo. (2 Kod. 4:16-18) Bu biatuki’atutengiela, kuete etukuasha buatudia kumufubila efuku dioso.​—Kwi. 3:22-24.

4. Nkinyi ki’atukataluula mu uno muisambo?

⁴ Tubandeyi kuisambila kiatudi balombene kulongiela ku bileshesho bia bafubi ba Yehowa baasha lulamato ba kala, na ba ano mafuku eetu. Nka bu bi’atukebimono, tui balombene kupeta nkalakashi yatush’abatengielanga. Biabia su tubakulupila mui Yehowa, t’akutua nketukuatshishena. (Mis. 55:23) P’atutaluula bino bileshesho, eyipushe obe nabene’shi: ‘Ne kukita naminyi su napeta muanda wi mumune na wabo? Bino bileshesho bi kunyingisha lukulupilo luande mui Yehowa naminyi? Mmalongiesha kinyi andi mulombene kutumikila mu nshalelo ande?’

MU MAFUKU A KALA

5. Yakobo bapetele nkalakashi kinyi pa muanda wa Labane? (Tala kifuatulo ki ku kipusu.)

⁵ Bafubi ba Yehowa ba kala babaadi bapete nkalakashi i bungi yabashibaadi abatengiela. Tubandeyi kutala muanda wa Yakobo. Nshaye baadi mumulungule’shi ende akebakile mukashi mu ba nsonguakashi ba Labane, mulanguidi naaye a mu kifuko na baadi mushinkamishe’shi Yehowa mmulombene ku muelela miabi i bungi. (Kib. 28:1-4) Biabia, Yakobo bakitshiine mianda ilulame. Bakatukile mu nsenga ya Kanaana enda ku nshibo kua Labane baadi na ba nsonguakashi babidi, Lea na Rashele. Yakobo baadi mufule Rashele nsonguakashi a Labane ngofu, na baadi mukumiine kufubila Labane munda a bipua musambobidi kumpala kua’shi ayibakile Rashele. (Kib. 29:18) Anka mianda ta ibaadi ikitshikie biinyi bibaadi abikulupila Yakobo nya. Labane baadi mubelekie Yakobo muteo bua’shi ebakile taata a bantu Lea. Kunyima kua lubingo Labane baadi mutadiile bua’shi Yakobo eyibakile Rashele, anka su Yakobo bafubu munda a bingi bipua musambobidi. (Kib. 29:25-27) Labane baadi dingi muntu mukutue kululama mu muanda wabo na Yakobo. Mu bino bioso, Labane baadi mufubishe Yakobo munda a bipua 20!​—Kib. 31:41, 42.

6. Yakobo baadi munyingiile ingi nkalakashi kinyi?

⁶ Yakobo baadi munyingiile ingi nkalakashi. Yakobo baadi na kifuko kikata, anka bana baye booso ta babaadi abashaala pamune mu butaale nya. Babaadi mpaa na bapaane mukuabo mulume Yosefu mu bupika. Bana ba Yakobo babidi, babaadi basabulushe kifuko kiabo mpaa n’Eshina dia Yehowa. Kukatusha biabia, mukashi a Yakobo a kifulo Rashele, bafuile pa kutanda muana aaye a kabidi. Na pa muanda wa nsala bibaadi abitungu’shi Yakobo, akatukie mu nsenga ya kuabo ende mu Ejipitu na bununu buaye.​—Kib. 34:30; 35:16-19; 37:28; 45:9-11, 28.

7. Yehowa baadi muleshe Yakobo’shi Mmumukumiine naminyi?

⁷ Sunga mbibaadi na ino nkalakashi yooso, Yakobo ta mushimishe lukumiino luaye mui Yehowa na mu milayilo Yaaye nya. Yehowa namu ku luaye lupese, baadi muleshe Yakobo’shi mmumukumiine. Bu kileshesho, sunga bibaadi Labane muishe Yakobo milongo, Yehowa baadi muelele Yakobo miabi apeta bintu bi bungi bia ku mbidi. Yakobo baadi na lutumbu lukata binyibinyi kui Yehowa, nsaa ibamuene muana aaye mulume Yosefu abaabadi bamulungule’shi mmufue takudi mafuku e bungi! Kipuano kiaye ki buwa na Yehowa, kibaadi kimukuashe buadia kunyingiila nkalakashi yaaye. (Kib. 30:43; 32:9, 10; 46:28-30) Su tualama kipuano ki buwa na Yehowa, natue namu tui kobesha kunyingiila nkalakashi yatush’atutengielanga ayitukuata.

8. Mfumu Davide baadi akumiina kukita kinyi?

⁸ Mfumu Davide ta baadi mulombene kukita bioso bibaadi akumiina kukita mu mudimo wa Yehowa nya. Bu kileshesho, Davide baadi akumiina kuibakiila Efile Mukulu aaye ntempelo. Balesheshe luno lukalo kui mutemuki Natane. Bua kumualuula Natane bamulunguile’shi: ‘Kyooso kyokwete kunangushena bwa kukita, ekikite. Mwanda Efile Mukulu ee noobe.’ (1 Mya. 17:1, 2) Tui balombene kunangushena mushindo ubaadi bino bishima binyingishe Davide. Pangi musuusa umune babangile kuata mpango ya kukita uno mudimo ukata.

9. Davide bakitshiine naminyi pa baadi mupushe mukandu wi bubi?

⁹ Mu kapindi kapeela mutemuki a Yehowa balukiile kuadi na mukandu wi bubi. “Bufuku bwa dyadya efuku,” Yehowa balunguile Natane’shi, Davide ta mmulombene kungibakila ntempelo nya; umune a ku bana baaye ngi akangibakila ntempelo. (1 Mya. 17:3, 4, 11, 12, EEM) Davide bakitshiine naminyi pa bapushishe uno mukandu? Davide bashintuluile kepatshila kaaye. Baadi mukongole makuta na bintu bibaadi abitungu bua’shi muana aaye Solomonyi akite wawa mudimo.​—1 Mya. 29:1-5.

10. Yehowa baadi muelele Davide miabi naminyi?

¹⁰ Musuusa umune kunyima kuabo kulungula Davide’shi nta naye akebaka ntempelo, Yehowa baadi mukite naye kilombeeno. Yehowa baadi mulee Davide’shi umune a ku bekulu baaye ngi akamunana losoo. (2 Sam. 7:16) Nangushena Davide bi’akekadika na muloo mu nsenga ipia p’akauku’shi e na muwa wa ikalaika mu bipua kinunu bia kumunana bia Yesu, Mfumu atukila ku lutandua luaye! Uno muanda awitukuasha buatudia kumona’shi su ta tui bakite kintu ki’atukumiinanga kukita bua Yehowa, Efile Mukulu eetu mmulombene kuitupa bingi bintu bi buwa biatush’abatengielanga.

11. Mmushindo kinyi ubaadi bena Kidishitu ba mu siekele a kumpala bapete miabi, sunga bibaadi Bufumu ta mbufikie nsaa ibaabadi abebutengiela? (Bikitshino 6:7)

¹¹ Bena Kidishitu ba mu siekele a kumpala babaadi banyingiile ingi nkalakashi yabashibaadi abatengiela. Bu kileshesho, babaadi bakumiine’shi Bufumu bu’Efile Mukulu abufiki, ta babaadi abauku nsaa yabudi bulombene kufika nya. (Bik. 1:6, 7) Biabia nkinyi kibabakitshine? Babaadi bepaane mu mudimo wa kulungula mukandu wi buwa. Bu bibaabadi abapalakasha mukandu wi buwa, babaadi bamone bi miabi ya Yehowa bua kuikitshisha kuabo.​—Badika Bikitshino 6:7.

12. Bena Kidishitu ba mu siekele a kumpala babaadi bakite kinyi pabatuelele kipupa kia nsala?

¹² Dingi efuku, kipupa kikata kia nsala akikatuele “mu nsenga ishima.” (Bik. 11:28) Kino kipupa kia nsala kibaadi kikuate mpaa na bena Kidishitu ba mu siekele a kumpala. Banda kunangushena bibaabadi abakiengie muanda wa kino kipupa kikata kia nsala. Kushi mpaka, ba mfumu ba bifuko babaadi abekalakasha pabitale mushindo wabadi balombene kupa ba mu nshibo muabo bidibua. Na bibaadi naminyi bua ba nsongua babaadi na mpango ya kutamisha mudimo wabo wa bulungudi? Babaadi balombene kuiyipusha’shi abitungu tutengiele mpaa na apakapuila kino kipupa kia nsala bua kukita uno mudimo wa bulungudi su? Bena Kidishitu babaadi beubidishene na uno nshalelo abaabadi naye. Babaadi batungunukie na kulungula mukandu wi buwa muyile mushindo ubaabadi nao, na babaadi na muloo wa kuiabishena bintu biabo na balanguidi nabo ba mu Yuda.​—Bik. 11:29, 30.

13. Bena Kidishitu ba mu siekele a kumpala babaadi bapete miabi kinyi mu kipungo kia kipupa kia nsala?

¹³ Bena Kidishitu ba mu siekele a kumpala babaadi bapete miabi kinyi mu kipungo kia kipupa kia nsala? Booso babapetele buabua bukuashi bua biabia bintu, babamuene’shi, Yehowa be bakuasha. (Mat. 6:31-33) Babaadi bepushe peepi na bakuabo balume na bakashi, babaadi bafikie bua kuibakuasha. Bano babaadi batushe bia buntu sunga bano babaadi bakite uno mudimo, babaadi bamone bi muloo aufikaa mu kupaana. (Bik. 20:35) Yehowa baadi muelele booso miabi bu bibaabadi beubidishene na kuno kushintuluka kua mu nshalelo.

14. Nkinyi kibaadi kikitshikile Mpoolo na Barnabase, na mbipeta kinyi bibatukile? (Bikitshino 14:21, 22)

¹⁴ Bena Kidishitu ba mu siekele a kumpala babaadi babinguebingue, ingi nsaa, na mu nsaa yabash’abebitengielanga. Tubandeyi kutala kibaadi kikitshikile Mpoolo na Barnabase pa baabadi abalungula mukandu wi buwa mu kibundi kia Listre. Kumpala babaadi na muloo ukile wa bantu babaadi abebakukila na kuibateemesha. Kunyima, beshikuanyi ‘babakookieshe kibumbu,’ na bangi ba kuabadi babaadi baase Mpoolo mabue na bamukaka bu kitanda paasha pa kibundi. (Bik. 14:19, Kilombeene Kipya 2014) Anka Mpoolo na Barnabase babatungunukile na kulungula mukandu wi buwa mu angi ma mbalo. Kubatukile bipeta kinyi? Babaadi bekashe “bantu be bungi bu balongi.” Na bishima biabo na bileshesho biabo, bibaadi binyingishe balanguidi naabo. (Badika Bikitshino 14:21, 22.) Be bungi mbakuashibue muanda Mpoolo na Barnabase ta babaadi bakookie pabaabadi abapete kubinguabingua kua mukimpulunkamba. Bu biatush’atukooko kukita mudimo wa Yehowa wadi muitupe, atukapete miabi.

MU ANO MAFUKU EETU

15. Kileshesho kia mukuetu Macmillan A. H. akikulongiesha kinyi?

¹⁵ Kumpala kua kipua kia 1914, muilo wa Yehowa ubaadi autengiela kumona apakitshika ingi mianda. Tubandeyi kutala kileshesho kia mukuetu mulume Macmillan A. H. Nka bu be bungi ba kiakia kipungo, mukuetu  Macmillan apete efuto diaye dia kuenda muiyilu binobino. Mu muisambo waye ubaadi mukite mu mueshi wa Kitema mu 1914, bambile’shi: “Pangi uno mmuisambo wande wa mfudiilo, aku namu wawa taubaadi muisambo wa mfudiilo nya.” Kunyima mukuetu Macmillan bafundile bino: “Pangi bangi bakuatudi babaadi abanangushena namu naabo’shi atuende muiyilu nka binobino.” Bambile dingi’shi: “Kintu kiatudi balombene kukita, nkutungunuka na kuipaana mu mudimo wa Muanana.” Mukuetu  Macmillan batungunukile na kuipaana mu mudimo wa Muanana. Baadi na katshintshi mu mudimo wa Muanana. Baadi mupete muabi wa kunyingisha be bungi babaadi mu lukano pa muanda wa kukutua kuabo kua kutuelakana mu mianda ya politike. Na baadi atuele mu bisangilo bia kakongie na lulamato looso sunga bitabaadi mununu. Mmushindo kinyi ubaadi mukuetu Macmillan mupete miabi ya kufubisha nsaa yaaye kalolo mu kufubila Yehowa pa baadi ki’atengiela efuto diaye? Kapindi kapeela kumpala kua lufu luaye, mu kipua kia 1966, bafundile’shi: “Lukumiino luande lubanyingi ngofu lelo uno, kukila bibaludi kumpala.” Dino nyi eyikashi di buwa bukile diatudia kuambula atue booso, bikishebishe su tubapu kunyingiila nkalakashi munda mua mafuku e bungi kukila biatupuandikishanga!​—Eb. 13:7.

16. Herbert Jennings na mukashi aaye babapetele lukalakashi kinyi lua mu kimpulunkamba? (Shake 4:14)

¹⁶ Be bungi ba mu muilo wa Yehowa bakuete kunyingiila mikumbo ya mu kimpulunkamba. Bu kileshesho, mu mianda ya mu nshalelo aaye, mukuetu Herbert Jenningsb alesha mushindo ubaabadi abasankila mudimo wabo ubaabadi bebatume mu Ghana bu ba misionere. Kingi kipungo babaadi bamukuate na lukalakashi lua mu binangu lua betanyina bu dépression e bukopo. Mukuetu Jennings baadi mutemune mukanda wa Shake 4:14, na kupatuula bino bishima pabitale bibaadi muanda waye upia, amba’shi: “Malooba t’atuuku akitufikila.” (Badika.) Bafundile’shi: “Pa muanda wa uno mukumbo tubaadi baate mpango ya kukatuka mu Ghana na kuleka ba kuuku betu be bungi, tualukila mu Canada [bua’shi bakambukie].” Yehowa bakuashishe mukuetu Jennings na mukashi aaye batungunuka na kumufubila na lulamato looso sunga bibaabadi na lulakalakashi.

17. Kileshesho kia mukuetu Jennings nkikuashe bena Kidishitu netu naminyi?

¹⁷ Muisambo wa mukuetu Jennings ubaadi muakule na kululama kooso, ngukuashe bangi bantu ngofu. Ungi mukuetu mukashi bafundile’shi: “Kashaa nta muene muanda aunyingisha bu uno unaadi mubadikie mu uno muisambo. . . . Kubadika mushindo ubaadi mukuetu Jennings mukatukie ku mudimo kubaabadi bamutume buadia kuenda mu kuibukisha nkunkuashe buandia kuikadika na mueneno e na nkatshinkatshi pabitale mianda yande.” Mu mushindo umune, ungi mukuetu mulume bafundile’shi: “Kunyima kua kufuba mu kakongie bu mukulu munda a bipua ekumi, naadi mulekie mudimo wa bu mukulu pa muanda wa maladi a mu binangu. Binaadi napusha panaadi nabadika miisambo i mu nshalelo a muntu ibaadi ayakuila bantu be na lukalakashi lua mu binangu lua betanyina bu dépression, bibaadi binyiishe kumbofusha ngofu. . . . Anka muisambo wa kunyingiila kua Jennings, ngunyingishe nami namu ngofu.” Bino abitutenkiesha’shi nsaa y’atunyingiila nkalakashi ya mu kimpulunkamba, tui balombene kunyingisha namu bangi. Sunga nshalelo eetu ashintuluka biatush’atukulupilanga, abitungu tutungunukie na kuikala bu bileshesho bia lukumiino na kunyingiila.​—1 Mp. 5:9.

18. Nkinyi kiodi mulombene kulongiela ku kileshesho kia mukashi kilele a mu Nigeria bu biabadi be bileshe mu kifuatulo?

¹⁸ Bipupa bu kino kia Corona-Virus, kikeele na bukitshishi kui bafubi ba Yehowa be bungi. Bu kileshesho, mukashi kilele a mu Nigeria ta baadi na bidibua bi bungi nya, kunamashika ka nsonguakashi kaaye kabaadi kamuipushe ki’abadi kunyima kua kuteeka ekopo diabo dia mfudiilo dia mupunga. Mukuetu mukashi balunguile ka nsonguakashi kaaye’shi, ntshi na ekuta su ndimune sunga kidibua, anka atuambula mukashi kilele a mu Serepta baadi muteekie kiakudia kiaye kia mfudiilo na atuula lukulupilo luaye looso nka mui Yehowa. (1 Bf. 17:8-16) Kumpala ababangile kunangushena pabitale kia kudia kia kuifuku. Anka babapetele ebofu dia biakudia adifiki kui balanguidi nabo. Diadia ebofu dia biakudia, dibaadi na bidibua bilombene nkafikisha na ku mbingo ikile pa ibidi. Mukuetu mukashi bambile’shi, ntshi naadi nauku’shi Yehowa e peepi buadia kuteemesha ku mianda inaadi nalungula ka nsonguakashi kande nya. Kushi mpaka, nsaa y’atukulupila mui Yehowa, mianda ayitukalakasha mu nshalelo ngilombene kuitukuasha buatudia kunyisha kuifubuila kui Yehowa.​—1 Mp. 5:6, 7.

19. Nkubinguabingua kinyi kubaadi Aleksey Yershov munyingiile?

¹⁹ Mu bipua bishale’mu bakuetu balume na bakashi mbanyingiile kubinguabingua kua mu kimpulunkamba. Tubandeyi kutala muanda wa mukuetu Aleksey Yershov mushalele mu Russie. Muilo wa Yehowa wa mu dino eumbo ubaadi usankie na kitshibilo kia bulungantu kibaabadi baate nsaa ibaadi mukuetu Yershov mubatshishibue mu kipua kia 1994. Kunyima kua bipua, mianda ibashintulukile mu Russie. Mu kipua kia 2020, babaadi batuele mu nshibo ya mukuetu Yershov bamunyenga bintu bi bungi bioso bibaadi nabio. Kunyima kua mieshi i bungi bena mbulamatadi babamufundile’shi ntomboshi. Bua kutamisha kilumbu babaadi bakite video ku bukuashi bua muntu baadi adimbi’shi mmukumiine kulonga Bible munda a mafuku akile pa kipua kishima. Uno muanda ubaadi bubi bukile!

20. Mukuetu Yershov baadi munyingishe kipuano kiaye na Yehowa mushindo kinyi?

²⁰ Kuno kubinguabingua kua mukuetu Yershov, kubaadi kutushe kipeta kia muanda wi buwa. Kipuano kiaye na Yehowa kibanyishishe kunyinga. Amba’shi: “Ami na mukashi ande tubaadi atutekie pamune misuusa ibungi.” Amba dingi’shi: “Naadi mumune’shi ntshinaadi na ngobesha ya kupua uno muanda kushi ku bukuashi bua Yehowa nya.” Amba dimo’shi: “Kuilongiela kuande kua pa bupenka nkunkuashe buandia kunyingiila kutshoboloka. Naadi na nangushena ku bileshesho bia bafubi baasha lulamato. Kui mianda i bungi yabadi bafunde mu Bible ayishimika kasele ku muulo wa kushaala baumiine na kulesha lukulupilo mui Yehowa.”

21. Nkinyi kibatulongo mu uno muisambo?

²¹ Nkinyi kibatulongo mu uno muisambo? Tubamono’shi ingi nsaa, atufumankanaa na nkalakashi yatush’abatengielanga mu uno ndumbuluilo. Sunga mbiabia, Yehowa akuashaa bafubi baaye misuusa yooso nsaa y’abakulupila muadi. Nka bu biabadi babangie mu Kifundue kietu kia mutue wa muanda’shi: ‘Malwa e bungi aafikilâ muntu mululame, anka Yehowa amupâshâ mu oso.’ (Mis. 34:20, EEM) Tutungunukieyi na kutuula binangu bietu kushi nka ku nkalakashi yetu, anka ku bukome bua Yehowa bu’etukuashaa nabo. Na dingi nka bu Mpoolo mutumibua, tui kuamba’shi: ‘Ne mulombene kukita bioso mu bukuashi bua yawa ankankamikaa na yawa ampeya bukome.’​—Fid. 4:13, Kilombeeno Kipya 2014.