MYALUULO KU NKONKO YA MU BIBLE

Efile Mukulu ateemeshaa nteko yooso su?

Efile Mukulu ateemesha nteko ya bantu ba miilo yooso. (Misambo 145:18, 19) Eyi dyaye, Bible, aditunyingisha bwa kumulungula myanda ibungi itutale. (Beena-Fidipe 4:6, 7) Byabya, ingi nteko tayisankishaa Efile Mukulu nya. Bu kileshesho, kwakula luteko loodi mulamiine mu binangu takumusangashaa nya.—Badika Mateo 6:7.

Na dingi Yehowa tasangeelaa nteko ya bantu bakwete kutombokyela miiya yaaye mu kukumiina kwabo nya. (Myeele 28:9) Bu kileshesho, mu mafuku a kala, Efile Mukulu baadi mupele kuteemesha beena Isalele abaadi abayipayisheena. Abitungu tulombashe ingi myanda itekibwe bwa badya kwituteemesha kwi Efile Mukulu.—Badika Yeeshaya 1:15.

Nkinyi kyatudi balombeene kukita bwashi Efile Mukulu ateemeshe nteko yeetu?

Tatwi balombeene kwela nteko kwi Yehowa kwa tushii na lukumiino nya. (Jaake 1:5, 6) Abitungu tuukye shi e kwanka na etatshishaa bwetu. Twi balombeene kunyingisha lukumiino lwetu nsaa yatulongo Bible, mwanda lukumiino lwa binyibinyi ndwimene ku myanda yatushinguula mu Eyi dy’Efile Mukulu.—Badika Beena-Ebreeyi 11:1, 6.

Abitungu twele nteko na mashimba eetu ooso na kwiyisha. Mpa na Yesu Mwan’Efile Mukulu baadi na kwiyisha nsaa ibaadi ele nteko. (Luuka 22:41, 42) Byabya, pamutwe pa kulungula Efile Mukulu kyadya kwitukitshina, abitungu tuteemeshe miiya yaaye mu kubadikanga kwa Bible. Akupu twele nteko ipushene na akikyeb’eshimba dy’Efile Mukulu.—Badika 1 Yowano 5:14.