Ligji i përtërirë
10 Pikërisht në atë kohë, Jehovai më tha: ‘Gdhend dy pllaka guri si ato të parat,+ ngjitu tek unë në mal dhe bëj një arkë prej druri.+ 2 Unë do të shkruaj në pllaka fjalët që ishin në pllakat e para që theve. Pastaj ti vëri ato në arkë.’ 3 Kështu, bëra një arkë me dru akacieje, gdhenda dy pllaka guri si ato të parat+ dhe u ngjita në mal me dy pllakat në dorë. 4 Ai shkroi në pllaka po ato që shkroi herën e parë,+ domethënë Dhjetë Fjalët+ që Jehovai ju tha në mal nga mesi i zjarrit,+ ditën që u mblodhët si kongregacion.+ Pastaj, Jehovai m’i dha mua. 5 Atëherë u ktheva dhe zbrita nga mali.+ Pllakat i vura në arkën që kisha bërë, që të qëndronin aty, si më urdhëroi Jehovai.+
6 Bijtë e Izraelit u larguan nga Beerot-Bene-Jakani+ në drejtim të Moserahut. Atje vdiq e u varros Aaroni.+ Në vend të tij filloi të shërbente si prift i biri, Eleazari.+ 7 Që andej u larguan në drejtim të Gudgodahut dhe nga Gudgodahu për në Jotbatah,+ një vend me lugina përrenjsh plot ujë.
8 Në atë kohë, Jehovai e ndau veç fisin e Levit+ që të mbante arkën e besëlidhjes+ së Jehovait, të qëndronte para Jehovait për t’i shërbyer+ dhe të bekonte në emër të tij gjer më sot.+ 9 Kjo është arsyeja përse Levi nuk ka marrë pjesë dhe trashëgimi+ mes vëllezërve të vet. Jehovai është trashëgimia e tij, siç i tha Jehovai, Perëndia yt.+ 10 Unë qëndrova në mal dyzet ditë e dyzet net+ si herën e parë. Jehovai më dëgjoi edhe këtë radhë,+ dhe Jehovai nuk deshi të të shfaroste.+ 11 Përkundrazi, Jehovai më tha: ‘Ngrihu dhe dil para popullit për t’u nisur, që ai të hyjë e të shtjerë në dorë vendin që iu betova paraardhësve të tij se do t’ia jepja këtij populli.’+
12 Dhe tani, o Izrael, çfarë po kërkon nga ti Jehovai, Perëndia yt,+ veçse t’i frikësohesh+ Jehovait, Perëndisë tënd, që të ecësh në tërë udhët e tij,+ ta duash+ e t’i shërbesh Jehovait, Perëndisë tënd, me gjithë zemër e me gjithë shpirt,+ 13 të mbash për të mirën tënde+ urdhërimet dhe ligjet+ e Jehovait, që po të jap sot? 14 Pa shih, Jehovait, Perëndisë tënd, i përkasin qiejt,+ madje qiejt e qiejve, toka+ dhe gjithçka që është në të. 15 Vetëm me paraardhësit e tu Jehovai u lidh dhe i deshi, prandaj, nga të gjithë popujt zgjodhi pasardhësit e tyre,+ po, ju, si po bën edhe sot. 16 Prandaj rrethpritni zemrën+ dhe mos e ngurtësoni qafën.+ 17 Sepse Jehovai, Perëndia juaj, është Perëndi i perëndive+ dhe Zotëri i zotërinjve,+ Perëndia i madh, i fuqishëm e që të ngjall frikë.+ Ai nuk trajton asnjë me anësi+ dhe nuk merr ryshfete.+ 18 Kur gjykon, i jep të drejtën jetimit* e vejushës,+ e do të ardhurin+ dhe i jep bukë e rroba. 19 Edhe ju duajeni të ardhurin,+ sepse edhe ju ishit të tillë në Egjipt.+
20 Jehovait, Perëndisë tuaj, duhet t’i frikësoheni.+ Atij duhet t’i shërbeni+ dhe me të duhet të qëndroni të lidhur;+ për emrin e tij duhet të betoheni.+ 21 Atë duhet të lëvdoni+ se ai është Perëndia juaj, që bëri për ju ato gjëra të mëdha e të frikshme që patë me sytë tuaj.+ 22 Shtatëdhjetë shpirt zbritën paraardhësit tuaj në Egjipt,+ por ja, tani Jehovai, Perëndia juaj, ju ka bërë të shumtë si yjet e qiellit.+