Gjykatësit
12 Pastaj burrat e Efraimit u mblodhën, shkuan drejt veriut dhe i thanë Jefteut: «Pse shkove të luftosh kundër bijve të Amonit dhe nuk na bëre zë të vinim me ty?+ Ne do të ta djegim shtëpinë mbi kokë.»+ 2 Por Jefteu u tha: «Unë dhe populli im kishim hasmëri të madhe me bijtë e Amonit.+ Unë ju thirra për ndihmë, por ju nuk më shpëtuat nga duart e tyre. 3 Kur pashë se nuk ishit ju ata që do të më shpëtonit, vendosa të vija jetën* time në rrezik+ e të shkoja kundër bijve të Amonit,+ të cilët Jehovai m’i dha në dorë. Pse pra, jeni ngritur sot në luftë kundër meje?»
4 Sakaq Jefteu mblodhi tërë burrat e Galaadit+ dhe nisi luftën me Efraimin. Burrat e Galaadit i ranë Efraimit, sepse ata kishin thënë: «Ju jeni burra të arratisur nga Efraimi, o Galaad, që banoni në mes të Efraimit dhe të Manaseut.» 5 Galaadi zuri përpara Efraimit vaun e Jordanit+ dhe kur të arratisurit e Efraimit thoshin: «Na lini të kalojmë», burrat e Galaadit pyetnin secilin prej tyre: «A je efraimit?» Në rast se përgjigjej: «Jo!», 6 ata i thoshin: «Atëherë thuaj Shiboleth.»+ Por ai thoshte «Siboleth», pasi nuk e shqiptonte dot fjalën si duhej. Atëherë e kapnin dhe e vritnin në vaun e Jordanit. Kështu, në atë kohë, u vranë dyzet e dy mijë veta nga Efraimi.+
7 Jefteu qe gjykatës i Izraelit për gjashtë vjet. Pastaj Jefteu, galaditi, vdiq dhe e varrosën në qytetin e tij në Galaad.
8 Pas tij, Izraelin nisi ta gjykonte+ Ibzani nga Betlehemi,+ 9 i cili pati tridhjetë djem e tridhjetë vajza. Ai dërgoi jashtë njerëz që të sillnin tridhjetë vajza për bijtë e tij dhe qe gjykatës i Izraelit për shtatë vjet. 10 Pastaj Ibzani vdiq dhe e varrosën në Betlehem.
11 Pas tij, Izraelin nisi ta gjykonte Eloni, një zabulonit.+ Ai qe gjykatës i Izraelit për dhjetë vjet. 12 Pastaj zabuloniti Elon vdiq dhe e varrosën në Ajalon, në vendin e Zabulonit.
13 Pas tij, Izraelin nisi ta gjykonte Abdoni, biri i Hilelit që ishte piratonit.+ 14 Ai pati dyzet djem e tridhjetë nipër, të cilët u hipnin shtatëdhjetë gomarëve.+ Ai qe gjykatës i Izraelit për tetë vjet. 15 Pastaj Abdoni, biri i piratonitit Hilel, vdiq dhe e varrosën në Piraton, në vendin e Efraimit, në malin e amalekitëve.+