Ligji i përtërirë

28 Po ta dëgjosh me vëmendje zërin e Jehovait, Perëndisë tënd, duke zbatuar me kujdes të gjitha urdhërimet e tij që po të jap sot,+ atëherë Jehovai, Perëndia yt, do të të lartësojë mbi të gjitha kombet e tjera të tokës.+ 2 Veç kësaj, po ta dëgjosh vazhdimisht zërin e Jehovait, Perëndisë tënd, do të të zënë të gjitha këto bekime:+

3 I bekuar do të jesh në qytet+ dhe i bekuar do të jesh në arë.+

4 I bekuar do të jetë fryti i barkut tënd,+ fryti i tokës sate dhe pjella e kafshëve të tua shtëpiake,+ pjella e bagëtisë së trashë dhe të imët.+

5 E bekuar do të jetë shporta+ dhe magjja jote.+

6 I bekuar do të jesh kur të dalësh dhe i bekuar do të jesh kur të hysh.+

7 Jehovai do t’i mundë para teje armiqtë që do të të sulen.+ Do të dalin kundër teje nga një udhë, por do t’ia mbathin nga shtatë udhë.+ 8 Jehovai do të urdhërojë që të kesh bekim në depon tënde+ dhe në çdo gjë që bën dora jote.+ Jehovai, Perëndia yt, do të të bekojë në vendin që po të jep. 9 Po të mbash vazhdimisht urdhërimet+ e Jehovait, Perëndisë tënd, dhe të ecësh në udhët e tij, Jehovai do të të bëjë një popull të shenjtë për vete,+ sikurse t’u betua.+ 10 Të gjithë popujt e tokës do të shohin se ti thirresh me emrin e Jehovait+ dhe do të kenë frikë prej teje.+

11 Jehovai do ta bëjë të mbarë e të bollshëm frytin e barkut tënd,+ pjellën e kafshëve të tua shtëpiake dhe frytin e tokës,+ në vendin që Jehovai iu betua paraardhësve të tu të ta jepte ty.+ 12 Jehovai do të hapë për ty qiellin, që është depoja e tij me të mira, për t’i dhënë vendit tënd shi në stinën e vet+ dhe për të bekuar çdo gjë që bën dora jote.+ Ti do t’u japësh hua shumë kombeve, ndërsa vetë nuk do të marrësh hua.+ 13 Jehovai do të të vërë në krye e jo në bisht. Ti do të jesh vetëm sipër+ dhe jo përfund, po të vazhdosh t’u bindesh këtyre urdhërimeve+ të Jehovait, Perëndisë tënd, që po të jap sot t’i mbash e t’i zbatosh. 14 Nga të gjitha fjalët që po të urdhëroj sot, mos u kthe as djathtas, as majtas,+ që të shkosh pas perëndive të tjera e t’u shërbesh.+

15 Nëse nuk do ta dëgjosh zërin e Jehovait, Perëndisë tënd, duke zbatuar me kujdes të gjitha urdhërimet dhe ligjet e tij që po të jap sot, do të të zënë të gjitha këto mallkime:+

16 I mallkuar do të jesh në qytet+ dhe i mallkuar do të jesh në arë.+

17 E mallkuar do të jetë shporta+ dhe magjja jote.+

18 I mallkuar do të jetë fryti i barkut tënd,+ fryti i tokës sate+ dhe pjella e bagëtisë sate të trashë dhe të imët.+

19 I mallkuar do të jesh kur të dalësh dhe i mallkuar do të jesh kur të hysh.+

20 Jehovai do të dërgojë mbi ty mallkime,+ rrëmujë+ dhe ndëshkime+ për çdo gjë që do të bëjë dora jote e që do të përpiqesh të bësh, gjersa të shfarosesh e të marrësh fund shpejt, nga ligësia e praktikave që ke bërë duke e braktisur.+ 21 Jehovai do të bëjë që të të ngjitet murtaja, gjersa të të shfarosë nga toka që po shkon të shtiesh në dorë.+ 22 Jehovai do të të godasë me tuberkuloz+ e me ethe të forta, me mahisje e me zjarrmi ethesh, me shpatë,+ me erë zhuritëse+ e me vrug,+ që do të të ndjekin gjersa të marrësh fund. 23 Qielli që ke sipër, do të bëhet bakër, ndërsa toka që ke poshtë, hekur.+ 24 Në vend të shiut, Jehovai do të hedhë në vendin tënd hi dhe pluhur, që do të zbresin mbi ty nga qielli gjersa të shfarosesh. 25 Jehovai do të bëjë që të mundesh para armiqve të tu.+ Nga një udhë do të dalësh kundër tyre, por nga shtatë udhë do t’ia mbathësh para tyre. Do të katandisesh tmerri i të gjitha mbretërive të dheut.+ 26 Kufoma jote do të bëhet ushqim për të gjithë zogjtë e qiellit dhe për kafshët e fushës, dhe askush nuk do t’i trembë.+

27 Jehovai do të të godasë me çibanët e Egjiptit,+ me hemorroide, ekzemë e shpërthim puçrrash, nga të cilat nuk do të shërohesh dot. 28 Jehovai do të të godasë me çmenduri,+ humbje shikimi+ dhe pështjellim.+ 29 Ti do të kërkosh rrugën me të prekur në mes të ditës, si kërkon i verbri në terr,+ dhe nuk do të kesh sukses në udhët e tua. Gjithmonë do të ta hanë hakun dhe do të të grabitin e asnjeri nuk do të të shpëtojë.+ 30 Do të fejohesh me një vajzë, por një burrë tjetër do ta përdhunojë.+ Do të ndërtosh një shtëpi, por nuk do të banosh në të.+ Do të mbjellësh një vresht, por s’do t’i shijosh frytet e tij.+ 31 Demi do të të theret mu para syve—por ti s’do të hash fare prej tij. Gomari do të grabitet para teje—por nuk do të të kthehet. Delja jote do t’u jepet armiqve të tu—por nuk do të kesh shpëtimtar.+ 32 Bijtë dhe bijat e tua do t’i jepen një populli tjetër+ dhe sytë e tu do të shohin e do të kenë mall për ta gjithmonë—por dora jote s’do të ketë fuqi.+ 33 Frytin e tokës sate dhe tërë prodhimin tënd do ta hajë një popull që nuk e njeh,+ kurse ty gjithmonë do të ta hanë hakun e do të të dërrmojnë.+ 34 Do të luash mendsh nga ajo që do të të shohin sytë.+

35 Jehovai do të të godasë në gjunjë e në kofshë, madje nga tabani i këmbës e deri në majë të kokës, me një çiban të keq, nga i cili nuk do të shërohesh.+ 36 Ty+ dhe mbretin+ që do të vësh mbi vete Jehovai do t’ju çojë në një komb që nuk e ke njohur as ti, as paraardhësit e tu e atje do t’u shërbesh perëndive të tjera prej druri e prej guri.+ 37 Po, ti do të ngjallësh habi+ dhe do të jesh shprehje proverbiale+ mes tërë popujve ku do të të çojë Jehovai, dhe ata do të tallen me ty.

38 Do të hedhësh shumë farë në arë, por do të mbledhësh pak,+ sepse do ta përpijë karkaleci.+ 39 Do të mbjellësh vreshta e do t’i kultivosh, por nuk do të pish verë e nuk do të mbledhësh gjë në to,+ sepse do t’i përpijë krimbi.+ 40 Do të kesh ullinj në gjithë territorin tënd, por nuk do të lyhesh me vaj, sepse ullinjtë nuk do t’i mbajnë kokrrat.+ 41 Do të sjellësh në jetë bij e bija, por nuk do t’i gëzosh, sepse do të shkojnë në robëri.+ 42 Tërë pemët e tua dhe fryti i tokës sate do të bëhen pre e insekteve zukatëse. 43 I ardhuri që është me ty, do të ngrihet lart e më lart mbi ty, kurse ti do të shkosh poshtë e më poshtë.+ 44 Ai do të të japë hua, kurse ti nuk do t’i japësh hua atij.+ Ai do të bëhet kreu, kurse ti do të bëhesh bishti.+

45 Gjithë këto mallkime+ do të të ndjekin e do të të zënë gjersa të shfarosesh,+ pasi nuk e dëgjove zërin e Jehovait, Perëndisë tënd, dhe nuk mbajte urdhërimet dhe ligjet që të dha ai.+ 46 Ato do të jenë gjithnjë si shenjë dhe si paralajmërim për ty dhe për pasardhësit e tu,+ 47 meqë nuk i shërbeve me gëzim e hare+ zemre Jehovait, Perëndisë tënd, për bollëkun që të dha në çdo gjë.+ 48 Do t’u shërbesh i uritur,+ i etur, i zhveshur dhe në skamje të plotë armiqve+ që do të dërgojë Jehovai kundër teje. Ai do të të vërë në qafë një zgjedhë të hekurt, gjersa të të shfarosë.+

49 Jehovai do të ngrejë kundër teje një komb të largët+ nga skaji i tokës, që vjen porsi shqiponja kur vërvitet mbi prenë,+ një komb të cilit nuk do t’ia kuptosh gjuhën,+ 50 një komb me pamje të egër,+ që nuk do t’ia dijë për të moshuarin dhe nuk do t’i vijë keq për djalin e ri.+ 51 Ata do të hanë pjellën e kafshëve të tua shtëpiake dhe frytin e tokës sate, gjersa ti të shfarosesh+ dhe s’do të të lënë as drithë, as verë të re e as vaj, as pjellën e bagëtisë sate të trashë dhe të imët, gjersa të të shkatërrojnë.+ 52 Ata do të të rrethojnë në tërë qytetet e tua, gjersa në mbarë vendin tënd të bien muret e larta e të fortifikuara, te të cilat ti kishe besim, po, do të të rrethojnë në tërë qytetet në mbarë vendin që të dha Jehovai, Perëndia yt.+ 53 Kështu, nga shtrëngimi e tensioni në të cilin do të të mbërthejë armiku yt, ti do të hash frytin e barkut tënd, mishin e bijve e të bijave+ që dha Jehovai, Perëndia yt.

54 Ai që është sqimatar dhe që sillet gjithë delikatesë, do t’i shohë+ me keqdashje të vëllanë, gruan e vet të shtrenjtë dhe bijtë që i kanë mbetur, 55 sa të mos i japë asnjërit prej tyre nga mishi i të bijve që do të hajë, pasi nga shtrëngimi dhe tensioni me të cilin do të të mbërthejë armiku yt brenda tërë portave të qyteteve të tua, atij nuk do t’i ketë mbetur asgjë.+ 56 Ajo që është sqimatare e që sillet gjithë delikatesë, dhe që prej sqimës dhe delikatesës nuk ka provuar kurrë ta vërë tabanin e këmbës përdhe,+ do ta shohë me keqdashje burrin e vet të shtrenjtë, të birin e të bijën, 57 madje edhe mbeturinat e paslindjes që dalin mes këmbëve të saj dhe bijtë që ka lindur,+ pasi do t’i hajë fshehurazi, sepse nga shtrëngimi dhe tensioni me të cilin do të të mbërthejë armiku yt brenda portave të qyteteve të tua, do të ketë skamje të plotë.+

58 Nëse nuk përmbush me kujdes të gjitha fjalët e këtij ligji, të shkruara në këtë libër,+ që t’i frikësohesh këtij emri të lavdishëm+ e që ngjall frikë,+ po, Jehovait,+ Perëndisë tënd, 59 Jehovai do të t’i bëjë edhe më të rënda plagët ty dhe pasardhësve të tu, plagë të mëdha që zor se mbyllen,+ sëmundje të këqija që zor se shërohen.+ 60 Ai do të sjellë prapë mbi ty të gjitha lëngatat e Egjiptit, para të cilave ti u trembe, dhe ato do të të ngjiten.+ 61 Veç këtyre, Jehovai do të sjellë mbi ty gjithfarëlloj sëmundjesh e plagësh, që nuk janë shkruar në librin e këtij ligji, gjersa ti të shfarosesh. 62 Ndonëse jeni bërë të shumtë si yjet e qiellit,+ ju do të mbeteni shumë pak,+ sepse nuk e dëgjuat zërin e Jehovait, Perëndisë tuaj.

63 Ashtu si ngazëllonte Jehovai për ju, kur ju bënte mirë e ju shumonte,+ po njësoj do të ngazëllojë Jehovai për ju, kur t’ju shkatërrojë e t’ju shfarosë.+ Ju do të shkuleni nga toka drejt së cilës po shkoni për ta shtënë në dorë.+

64 Jehovai do t’ju shpërndajë mes tërë popujve nga njëri skaj i tokës në skajin tjetër,+ dhe atje do t’u shërbeni perëndive të tjera që nuk i keni njohur as ju, as paraardhësit tuaj, e që s’janë veç dru e gur.+ 65 Ju nuk do të gjeni rehat mes atyre kombeve,+ dhe nuk do të gjeni vend ku të prehet tabani i këmbës suaj. Atje Jehovai do t’ju japë një zemër që dridhet,+ dobësim sysh+ dhe dëshpërim shpirti. 66 Do të gjendeni në rrezikun më të madh për jetën, do të tmerroheni ditë e natë dhe nuk do ta keni jetën të sigurt.+ 67 Në mëngjes do të thoni: ‘Ah, veç të ishte mbrëmje!’ kurse në mbrëmje do të thoni: ‘Ah, veç të ishte mëngjes!’ nga tmerri që do të përjetojë zemra juaj dhe nga ajo që do t’ju shohin sytë.+ 68 Jehovai do t’ju kthejë me anije në Egjipt, nëpër udhën për të cilën ju thashë: ‘S’do ta shihni më kurrë’,+ dhe atje do t’ju shesin tek armiqtë tuaj si skllevër e shërbyese,+ por askush nuk do t’ju blejë.»