Mendje të sfilitura

NIKOLA ka pasur periudha trishtimi të thellë që kur ishte 14 vjeçe. Megjithatë, në moshën 16-vjeçare, filloi të përjetonte diçka të re​—një gjendje të çuditshme euforie dhe energjie të jashtëzakonshme. Në kokë i vërshonin mendime, thoshte gjëra pa lidhje dhe vuante nga pagjumësia. E gjithë kjo shoqërohej me një dyshim të pabazuar se miqtë përfitonin prej saj. Pastaj, Nikola thoshte se mund t’ua ndryshonte si të donte ngjyrën objekteve. Atëherë mamaja e saj e kuptoi se Nikola kishte nevojë për ndihmën e mjekut, prandaj e çoi në spital. Pasi e mbajtën për njëfarë kohe nën vëzhgim dhe i panë nga afër luhatjet e humorit, më në fund mjekët arritën të përcaktonin diagnozën: Nikola vuante nga çrregullimi bipolar.a

Anembanë botës ka miliona njerëz që ashtu si Nikola, vuajnë nga ndonjë çrregullim i humorit, i cili mund të jetë ose në formën e çrregullimit bipolar, ose në formën e depresionit. Pasojat e këtyre sëmundjeve mund të jenë shkatërrimtare. «Për vite të tëra kam provuar një dhembje të madhe shpirtërore,​—thotë Stiveni, një pacient që vuan nga çrregullimi bipolar.​—Bija në një trishtim të tmerrshëm e pastaj kaloja në një gjendje euforie. Terapia dhe ilaçet më ndihmonin, por gjithsesi mbetej një betejë.»

Nga se shkaktohen çrregullimet e humorit? Çfarë ndien një njeri që vuan nga depresioni apo nga çrregullimi bipolar? Si mund t’u jepet mbështetja e duhur atyre që vuajnë nga këto çrregullime dhe atyre që kujdesen për ta?

[Shënimi]