3 Sepse ka shpresë

Bibla thotë qartë se jeta është ‘e mbytur me halle’. (Jobi 14:1) Sot, të gjithë preken nga tragjedi të ndryshme. Por disa ndihen tërësisht të pashpresë, sikur të mos kishte dritë në fund të tunelit, pa asnjë të ardhme më të mirë. A ndihesh edhe ti kështu? Nëse po, të jesh i sigurt se Bibla ofron shpresë të vërtetë, jo vetëm për ty, por për të gjithë njerëzimin. Për shembull:

• Bibla mëson se Perëndia Jehova kishte si qëllim diçka shumë më të mirë për ne.​—Zanafilla 1:28.

• Perëndia Jehova premton se do ta kthejë tokën në parajsë.​—Isaia 65:21-25.

• Përmbushja e këtij premtimi është e sigurt. Zbulesa 21:3, 4 thotë:

  «Tenda e Perëndisë është me njerëzit. Ai do të banojë me ta, e ata do të jenë populli i tij. Po, vetë Perëndia do të jetë me ta. Ai do të fshijë çdo lot nga sytë e tyre. Nuk do të ketë më vdekje. As vajtim, as klithmë, as dhembje nuk do të ketë më. Gjërat e mëparshme shkuan.»

Kjo shpresë nuk është thjesht një dëshirë. Perëndia Jehova ka si qëllim ta realizojë këtë gjer në fund e ai ka edhe fuqinë, edhe dëshirën për ta bërë. Shpresa që jep Bibla është e besueshme dhe është një arsye e fortë pse t’i thuash «jo vetëvrasjes».

MOS HARRO: Megjithëse gjendja emocionale mund të të hedhë sa andej-këtej si një varkë në det të trazuar, mesazhi i shpresës në Bibël mund të jetë si një spirancë që nuk të lejon të lëkundesh.

ÇFARË MUND TË BËSH SOT: Fillo të shqyrtosh çfarë shprese të vërtetë për të ardhmen jep Bibla. Dëshmitarët e Jehovait do të të ndihmonin me kënaqësi. Mund t’i takosh në zonën tënde ose mund të gjesh informacione të vlefshme në sitin e tyre jw.org/​sq.a