Asgjë nuk mund t’i ndalë

Një burrë që nuk ecte, ulej dhe lypte përditë pranë derës së tempullit. Një pasdite, ai pa Pjetrin dhe Gjonin teksa hynin në tempull. Ai u tha: ‘Ju lutem, më falni ndonjë gjë!’ Pjetri iu përgjigj: ‘Do të të jap diçka më të mirë se paratë. Në emër të Jezuit, ngrihu dhe ec!’ Pastaj Pjetri e ndihmoi të çohej dhe burri nisi të ecte. Turma u gëzua shumë nga kjo mrekulli, dhe shumë veta u bënë besimtarë.

Por priftërinjtë dhe saducenjtë u zemëruan. I kapën apostujt, i çuan në Sinedër, pra gjykata e udhëheqësve fetarë, dhe i pyetën: ‘Kush ua dha fuqinë të shëroni këtë njeri?’ Pjetri u përgjigj: ‘Ne e morëm fuqinë nga Jezu Krishti të cilin ju e vratë.’ Udhëheqësit fetarë u bërtitën: ‘Mos flisni më për Jezuin!’ Por apostujt thanë: ‘Ne duhet të flasim për të. Nuk do të pushojmë së foluri.’

Sapo i liruan, Pjetri dhe Gjoni shkuan te dishepujt e tjerë dhe u thanë ç’kishte ndodhur. Ata iu lutën së bashku Jehovait: ‘Të lutemi, na ndihmo të jemi të guximshëm, që të vazhdojmë të bëjmë veprën tënde.’ Jehovai u dha frymën e shenjtë, dhe ata vazhduan të predikonin e të shëronin. Gjithnjë e më shumë veta u bënë besimtarë. Saducenjtë ishin kaq xhelozë, saqë i arrestuan apostujt dhe i futën në burg. Megjithatë, gjatë natës, Jehovai dërgoi një engjëll që hapi dyert e burgut dhe u tha apostujve: ‘Kthehuni në tempull dhe atje mësojeni popullin.’

Të nesërmen në mëngjes u njoftua Sinedri: ‘Edhe pse burgun e gjetëm të kyçur, burrat që arrestuat kanë ikur. Janë në tempull duke mësuar popullin.’ Përsëri apostujt i arrestuan dhe i çuan në Sinedër. Kryeprifti u tha: ‘Ju urdhëruam të mos flitni më për Jezuin!’ Pjetri u përgjigj: «Ne duhet t’i bindemi Perëndisë si sovran, dhe jo njerëzve.»

Udhëheqësit fetarë ishin kaq të zemëruar, saqë donin t’i vritnin apostujt. Por një farise me emrin Gamaliel u ngrit dhe tha: ‘Hapni sytë! Perëndia mund të jetë me këta burra. Vërtet doni të luftoni kundër Perëndisë?!’ Ata ia vunë veshin këshillës së tij. Pasi i rrahën apostujt me thupër, i urdhëruan edhe një herë që të mos predikonin, e pastaj i lanë të iknin. Por kjo nuk i ndali apostujt. Ata vazhduan të predikonin me guxim lajmin e mirë në tempull dhe nga shtëpia në shtëpi.