Udhëheqje për të zgjedhur shokë të mirë

NË VEND që t’u drejtohen prindërve, të rinjtë u drejtohen moshatarëve të tyre për këshilla mbi veshjen dhe muzikën, thotë një raport në Reader’s Digest. Prandaj, për prindërit është jetësore të dinë se me cilët shoqërohen fëmijët e tyre dhe ku shkojnë.

«Është përgjegjësia juaj të hetoni,—thotë Ezmei fon Rensberg, kryelektore e departamentit të psikologjisë në një universitet afrikano-jugor. Ajo shton: «Ka mundësi që fëmija të mërzitet me ju, por më pas do t’i kalojë.» Pastaj, ajo u jep prindërve sugjerimet e mëposhtme. Rregullat duhet të jenë logjike dhe të kenë parime të qarta ku bazohen; dëgjojeni fëmijën; mos reagoni tepër, por ruani qetësinë dhe kini të qartë në mendje se çfarë doni të thoni. Nëse fëmija tashmë ka miqësi me një shok të padëshirueshëm, përqendrohuni mbi sjelljen e papranueshme që ka nxitur kjo miqësi, në vend që thjesht t’ia ndaloni atij shoqërimin e mëtejshëm.

Në Fjalën e Perëndisë, në Bibël, ka pasur gjithnjë në dispozicion këshilla të shëndosha për prindërit. Për shembull, aty thuhet: ‘Jini të shpejtë në të dëgjuar, të ngadalshëm në të folur dhe të ngadalshëm në zemërim.’ (Jakovit 1:19) Shkrimet japin edhe këtë këshillë të shkëlqyer lidhur me zgjedhjen e shokëve: «Kush shkon me të urtët bëhet i urtë, por shoku i budallenjve do të bëhet i keq.» (Fjalët e urta 13:20) Këta shembuj ilustrojnë mençurinë që kanë në dispozicion ata që e lexojnë Biblën me çmueshmëri dhe që zbatojnë atë që thotë ajo në jetën e përditshme.