A ke një engjëll mbrojtës?

Bibla nuk thotë se çdo njeri ka një engjëll mbrojtës. Është e vërtetë se Jezui tha një herë: «Kini kujdes se mos përbuzni një nga këta të vegjlit [dishepujt e Krishtit], sepse po ju them se engjëjt e tyre në qiell shohin gjithnjë fytyrën e Atit tim që është në qiell.» (Mateu 18:10) Megjithatë, në vend që të nënkuptonte se çdo person ka një engjëll mbrojtës, Jezui thjesht po thoshte se engjëjt interesoheshin vërtet për secilin nga dishepujt e tij. Prandaj, adhuruesit e vërtetë tregohen të mençur e të kujdesshëm, duke mos rrezikuar më kot, me idenë se engjëjt e Perëndisë do t’i mbrojnë.

A do të thotë kjo se engjëjt nuk i ndihmojnë njerëzit? Jo. (Psalmi 91:11) Disa janë plotësisht të bindur se Zoti i ka mbrojtur dhe i ka drejtuar me anë të engjëjve. Po njësoj mendon edhe Keneti, që përmendëm në artikullin e parë. Edhe pse nuk mund ta themi në mënyrë të prerë, ai mund të ketë të drejtë për këtë. Dëshmitarët e Jehovait i shohin vazhdimisht dëshmitë se edhe engjëjt përfshihen në veprën e predikimit. Gjithsesi, ngaqë engjëjt janë të padukshëm, nuk mund ta themi se deri në ç’masë i përdor Zoti për të ndihmuar njerëzit në aspekte të ndryshme. Sido që të jetë, nuk bëjmë fare gabim nëse e falënderojmë të Plotfuqishmin për çfarëdolloj mbështetjeje që mund të na ketë dhënë.​—Kolosianëve 3:15; Jakovi 1:17, 18.