A do ta bëjmë përsëri? Një tjetër thirrje për pionierë ndihmës

¹ A do ta bëjmë këtë që kërkohet përsëri? A do të shërbejmë si pionierë ndihmës gjatë periudhës së Përkujtimit? Shërbimi ynë i Mbretërisë i shkurtit 1997, na tërhoqi vëmendjen nëpërmjet titullit me shkronja të zeza: «Kërkohen 500 pionierë ndihmës.» Ne ishim të bindur që do ta shqyrtonit atë thirrje seriozisht. Kur u përpilua raporti i shërbimit të marsit 1997, u kënaqëm kur mësuam se edhe pse ishte momenti më kritik i trazirave në Shqipëri, 155 lajmëtarë ishin regjistruar në shërbimin si pionierë ndihmës. Nëse i shtojmë këtij numri 147 pionierët e rregullt dhe 102 pionierët specialë që raportuan për atë muaj, shohim se pothuaj 42 përqind e të gjithë lajmëtarëve ishin në shërbimin si pionierë. A do ta bëjmë përsëri gjatë kësaj periudhe të Përkujtimit?

² Me ngrohtësi i lavdërojmë të gjithë ata që bënë përpjekje shtesë për të rritur aktivitetin e tyre të shërbimit në fushë pranverën e kaluar. Qartë, të gjithë u motivuat nga dashuria vetëmohuese për Perëndinë Jehova dhe për të afërmin tuaj. (Luka 10:27; 2. Pjet. 1:5-8) Lajmëtarët me rrethana të ndryshme të jetës, i rregulluan punët e tyre për të marrë pjesë si pionierë ndihmës. Në një kongregacion, në Shtetet e Bashkuara, 51 lajmëtarë shërbyen së bashku si pionierë në të njëjtin muaj, duke përfshirë shumicën e pleqve, një nënë me vajzën e saj 15-muajshe, një motër që e la punën e saj dhe gjeti një punë gjysmëditore që t’i jepte mundësi për të shërbyer si pioniere dhe një motër të moshuar që kurrë nuk kishte shërbyer si pioniere më parë. Mbikëqyrësi qarkor shkroi: «Po bëhet një përpjekje e jashtëzakonshme në veprën e predikimit. . . . Jo vetëm që kjo po ndikon mbi territorin, por kongregacionet po gumëzhijnë nga entuziazmi. Vëllezërit po gëzojnë duke e njohur më mirë njëri-tjetrin si edhe duke parë rezultatet e mira të shërbimit të tyre.»

³ Gjithashtu, edhe të rinjtë u përfshinë pranverën e kaluar. Një lajmëtare e papagëzuar, 13-vjeçare, në Shtetet e Bashkuara, po priste kohën kur mund të simbolizonte dedikimin e saj ndaj Jehovait. Pas pagëzimit në shkurt, ajo shkroi në lidhje me dëshirën e saj për të shërbyer si pioniere ndihmëse gjatë marsit: «Tani, duke mos pasur asgjë që të më pengonte, iu ktheva menjëherë kërkesës time. . . . Përvojat e shumta të mrekullueshme që gëzuam, nuk do të ishin bërë kurrë një realitet po të mos qe ftesa juaj e dashur për të shërbyer si pionier. I jam mirënjohëse Jehovait që pata këtë privilegj për të qenë midis atyre pionierëve ndihmës që u përgjigjën.» Ajo kishte si synim ta bënte këtë përsëri.

⁴ Ndoshta ju ishit midis 155 lajmëtarëve që u angazhuan në aktivitetin e shërbimit si pionierë ndihmës marsin e kaluar ose mes 122 lajmëtarëve që shërbyen në prill dhe 119 të tjerëve në maj. A do ta bëni përsëri këtë vit? Nëse nuk pate mundësi për të shërbyer si pionier pranverën e kaluar, a mund ta provosh këtë vit? A mund ta kalojmë shifrën 155, që është numri i atyre që shërbyen si pionierë ndihmës në mars 1997? Ai ishte numri më i madh i pionierëve ndihmës në krahasim me çdo muaj tjetër në Shqipëri.

⁵ Përqendrohu mbi prillin dhe majin: Këtë vit, Përkujtimi bie të shtunën, më 11 prill, duke e bërë prillin një muaj të shkëlqyer për rritjen e aktivitetit në shërbim. (2. Kor. 5:14, 15) Gjatë 11 ditëve të para të muajit, ne do të përqendrohemi të ftojmë sa më shumë persona që është e mundur për të ndjekur Përkujtimin. Nëse ke në plan që të shërbesh si pionier ndihmës, të lutemi të dorëzosh kërkesën tënde përpara datës që dëshiron të fillosh.​—1. Kor. 14:40.

⁶ Pasi maji ka pesë javë të plota, lajmëtarët që ndjekin shkollën ose që kanë një punë plotëkohore, mund ta shohin si më të lehtë për të shërbyer si pionierë ndihmës këtë muaj. Duke programuar 10 orë shërbimi për secilën fundjavë, do t’ju duhet të programoni vetëm 10 orë shtesë në muaj për të plotësuar të 60 orët e caktuara.

⁷ Gjatë dy muajve prill dhe maj, si literaturë do të prezantojmë kopje individuale të Kullës së Rojës dhe Zgjohuni! ose Ti mund të jetosh përgjithmonë në parajsë mbi Tokë. Kjo duhet të na inkurajojë edhe më shumë për t’u zgjeruar dhe për të shërbyer si pionierë. Përse e themi këtë? Revistat janë të lehta për t’u prezantuar dhe të këndshme për t’u përdorur në shërbim. Ato mund të përdoren në mënyrë të përshtatshme në të gjitha aspektet e shërbimit, veprën shtëpi më shtëpi, dyqan më dyqan, si edhe kur u afrohemi njerëzve në rrugë, në vende parkimi, në parqe dhe raste të tjera joformale. Ajo që është më e rëndësishme, revistat Kulla e Rojës dhe Zgjohuni! mbështetin të vërtetat mbi Mbretërinë. Ato tërheqin vëmendjen mbi përmbushjen e profecisë biblike, duke provuar se Mbretëria e Perëndisë po sundon. Gjithashtu, ato ndikojnë në jetën e lexuesve duke trajtuar në mënyrë të kuptueshme nevojat reale të njerëzve. Nëse mendojmë se si është prekur jeta jonë nga këto revista të çmuara, do të nxitemi të marrim pjesë duke i shpërndarë ato në masën më të gjerë që është e mundur gjatë muajve prill dhe maj.

⁸ Në përgatitjen për këtë aktivitet intensiv me revista, do të përfitosh duke rishikuar këta artikuj: «Kulla e Rojës dhe Zgjohuni!​—Revista në kohën e duhur të së vërtetës (Kulla e Rojës, 1 janar, 1994). «Përdori sa më mirë revistat tona» (Shërbimi ynë i Mbretërisë, shtator 1995) dhe «Përgatit prezantimin tënd të revistës» (Shërbimi ynë i Mbretërisë, tetor 1996).

⁹ Pleq, merrni drejtimin: Për t’iu përshtatur shumë lajmëtarëve që shërbyen si pionierë pranverën e kaluar, në një kongregacion, pleqtë organizuan një të shtunë në muaj si një ditë speciale për aktivitetin e shërbimit për të gjithë kongregacionin. U bënë rregullime për t’u takuar në orare të ndryshme gjatë ditës, duke u dhënë të gjithëve në kongregacion mundësinë për të marrë pjesë në forma të ndryshme të dhënies së dëshmisë. Këto përfshinë predikimin në qendrat tregtare, dëshminë në rrugë, vizitat shtëpi më shtëpi, bërjen e rivizitave, shkrimin e letrave dhe dëshminë me telefon. Me 117 lajmëtarë që morën pjesë në shërbimin në fushë gjatë ditës, përgjigjja ishte e dallueshme. Ata shpenzuan gjithsej 521 orë në shërbim dhe shpërndanë 617 revista, broshura dhe libra. Gjallëria e asaj të shtune vazhdoi edhe të dielën me një pjesëmarrje gati rekord në mbledhjen publike dhe studimin e Kullës së Rojës.

¹⁰ Në secilën mbledhje të shërbimit gjatë prillit dhe majit, kongregacioni duhet kujtuar se kur dhe ku do të mbahen mbledhjet për shërbimin në fushë, veçanërisht nëse janë bërë disa rregullime shtesë, ndryshe nga ato të programuara zakonisht. Pionierët e rregullt si edhe lajmëtarët që nuk janë pionierë ndihmës, inkurajohen që të mbështetin këtë numër rregullimesh me aq sa ua lejojnë rrethanat.

¹¹ Mbikëqyrësi i shërbimit duhet të takohet me vëllain që cakton territoret e të bëjë rregullime për të punuar ata territorë që nuk janë mbuluar shpesh. Më shumë vëmendje mund t’u kushtohet atyre që nuk janë në shtëpi, dëshmisë në rrugë dhe nga dyqani në dyqan. Mund të vihet theksi mbi dëshminë në mbrëmje, veçanërisht kur bëhet ndryshimi i orës, fundjavën e parë të prillit. Për të dy muajt prill dhe maj, duhet porositur një numër i mjaftueshëm revistash për t’i paraprirë rritjes së aktivitetit.

¹² Shumë lajmëtarë mund të kualifikohen: Fjalia e parë në kërkesën për pionier ndihmës thotë: «Nga dashuria ime për Jehovain dhe dëshira ime për të ndihmuar të tjerët që të mësojnë mbi atë dhe qëllimet e tij të dashura, unë dua të shtoj pjesën time në fushën e shërbimit duke u regjistruar si një pionier ndihmës.» Dashuria për Jehovain dhe dëshira për të ndihmuar të tjerët frymësisht, janë baza e dedikimit tonë. (1. Tim. 4:8, 10) Për t’u kualifikuar si pionier ndihmës, lajmëtari duhet të jetë i pagëzuar, të ketë një qëndrim të mirë moral dhe të jetë në gjendje të kushtojë 60 orë në shërbim gjatë muajit. Ndërsa të gjithë shqyrtojmë rrethanat tona, a do të mundin disa prej nesh, që nuk kanë shërbyer kurrë si pionierë më përpara, ta bëjnë këtë gjatë këtij viti në muajin prill ose maj?

¹³ Shumë në kongregacion mund të kuptojnë se edhe ata mund të shërbejnë si pionierë, kur shohin të tjerët me rrethana të ngjashme me të tyret që regjistrohen. Fëmijët e shkollës, të moshuarit, ata që punojnë në kohë të plotë, duke përfshirë pleq, shërbëtorë ndihmës e të tjerë, kanë shërbyer me sukses si pionierë ndihmës. Një amvisë dhe nënë me dy fëmijë, që ka një punë plotëkohore, arriti të bënte 60 orë, shpërndau 108 revista dhe filloi 3 studime biblike gjatë një muaji që shërbeu si pioniere ndihmëse. Si ia doli për ta bërë këtë? Ajo përdori kohën e pushimit në punë për të dëshmuar në territorin fqinj, dëshmoi duke shkruar letra dhe u angazhua në dhënien e dëshmisë në rrugë dhe në vendet e parkimit. Gjithashtu, përfitoi mjaft nga dita e pushimit javor në punë, duke marrë pjesë me kongregacionin në shërbimin në fushë. Megjithëse, fillimisht mendonte se shërbimi si pioniere ndihmëse ishte një synim i paarritshëm, me inkurajimin e të tjerëve dhe me një program praktik, pengesat u kapërcyen.

¹⁴ Jezui i siguroi dishepujt e tij: «Zgjedha ime është e këndshme dhe pesha ime është e lehtë.» (Mat. 11:30, BR) Ky ishte titulli i një artikulli inkurajues në Kullën e Rojës së 15 nëntorit, 1995. Në të flitet për një motër që kishte një punë plotëkohore shumë stresuese. A mendoi se për të nuk bëhej fjalë që të shërbente si pioniere ndihmëse? Aspak. Në fakt, ajo ia del të shërbejë si pioniere ndihmëse çdo muaj. Përse? Sepse e ndien që në të vërtetë, shërbimi si pioniere e ndihmon të jetë e ekuilibruar. Ndihma që u jepte njerëzve, ndërsa mësonin të vërtetën biblike dhe tek i shihte që ndryshonin jetën e tyre për të fituar aprovimin e Perëndisë, u bënë burimi më i madh i gëzimit në jetën e saj plot aktivitete.​—Prov. 10:22.

¹⁵ Çdo sakrificë personale dhe rregullim që duhet të bëjë dikush për të shërbyer si pionier, shpërblehet me tepri nga bekimet që gëzohen. Një motër shkroi mbi përvojën e saj si pioniere ndihmëse: «Kjo gjë më ndihmoi ta largoja mendjen nga vetja e të përqendrohesha më shumë në dhënien e ndihmës të tjerëve. . . . Këtë ua rekomandoj atyre që mund ta bëjnë.»

¹⁶ Kërkohet një program i mirë: Në faqen e fundit të kësaj shtojce kemi ridhënë modelin e programeve që u paraqitën në Shërbimi ynë i Mbretërisë, shkurt, 1997. Ndoshta njëri prej tyre i përshtatet rrethanave të tua. Ndërsa e rishikon atë, shqyrto rutinën normale të aktivitetit tënd mujor. Cilat plane në lidhje me shtëpinë mund të përfundohen para se të fillosh si pionier apo mund të lihen përkohësisht mënjanë deri pas kësaj? A mund të kursesh ca nga koha që harxhon për zbavitje, shlodhje apo aktivitete të tjera argëtuese? Në vend se të shikosh shumën e 60 orëve që kërkohen, bëj një program mbi një bazë ditore ose javore. Kërkohen vetëm 2 orë në ditë ose 15 orë në javë, për të shërbyer si pionier ndihmës. Shiko programet e dhëna si model dhe me një laps në dorë shih se çfarë mund të zgjedhësh në lidhje me një program personal shërbimi, që të përshtatet më mirë ty dhe familjes tënde.

¹⁷ Përgjigjja e shkëlqyer dhe mbështetja shtesë që dha kongregacioni për shërbimin pranverën e kaluar, rritën entuziazmin e një pioniereje të rregullt e cila shkroi: «Faleminderit shumë për inkurajimin tuaj të dashur, për të bërë një përpjekje shtesë në mbështetje të shërbimit si pionier ndihmës. . . . Programet që sugjeruat, ndihmuan shumë veta që nuk kishin shërbyer kurrë si pionierë ndihmës më parë, të kuptojnë se mund ta bëjnë këtë. . . . Jam shumë e lumtur që bëj pjesë në organizatën e Jehovait dhe që ndjek udhëheqjen e dashur dhe gëzimprurëse të skllavit të besueshëm dhe të matur.»

¹⁸ Proverbat 21:5, na siguron: «Planet e njeriut të zellshëm me siguri sjellin përfitim.» Proverbat 16:3 na inkurajon: «Rrotulloji veprat e tua mbi vetë Jehovain dhe planet e tua do të vendosen në mënyrë të qëndrueshme.» Po, duke e përfshirë me anë të lutjes Jehovain në vendimin tonë dhe duke u mbështetur fort tek ai, që të na ndihmojë të kemi sukses, mund të jemi pozitivë në lidhje me planet tona për të shërbyer si pionierë ndihmës. Mund të ndodhë që pasi shohim se sa i suksesshëm del programi ynë gjatë një apo dy muajve si pionier ndihmës, kemi mundësi të shënojmë kutinë që gjendet në kërkesën për pionier ndihmës që thotë: «Shënoni këtu nëse dëshironi të shërbeni si pionier ndihmës vazhdimisht, deri në një njoftim të mëtejshëm.» Sidoqoftë, ne mund të shohim më tej, për të shërbyer përsëri si pionierë ndihmës në gusht, i cili ka pesë fundjavë të plota. Ndërsa mbyllim vitin e shërbimit në gusht, prej secilit do të jetë bërë një përpjekje e përbashkët, për të marrë pjesë në mënyrë sa më të plotë që është e mundur në shërbim.

¹⁹ Jezui profetizoi: «Ai që ushtron besim tek unë, edhe ai do të bëjë veprat që bëj unë; dhe ai do të bëjë vepra më të mëdha se këto.» (Gjoni 14:12, BR) Është një privilegj i gëzuar për ju, të shërbeni si bashkëpunëtorë të Perëndisë, ndërsa kjo profeci po përmbushet në mënyrë madhështore. Tani është koha për të predikuar lajmin e mirë me intensitetin më të madh se kurrë ndonjëherë, duke blerë kohën e volitshme për të bërë këtë vepër. (1. Kor. 3:9; Kolos. 4:5) Pjesëmarrja sa më shpesh që është e mundur në shërbimin si pionier ndihmës, është një mënyrë e shkëlqyer për të bërë pjesën tonë si lajmëtarë të Mbretërisë. Ne me padurim presim të shohim se sa e madhe do të jetë kënga e lavdërimit të pionierëve ndihmës, gjatë këtij sezoni të Përkujtimit. (Psal. 27:6) Duke menduar për rezultatet e pranverës së kaluar pyesim veten se ‘a do ta bëjmë përsëri’? Jemi të bindur që po!

[Kutia në faqen 3]

A mund të shërbesh si pionier ndihmës?

«Sido qofshin rrethanat e tua personale, nëse je i pagëzuar dhe ke një qëndrim të mirë moral, nëse mund të bësh rregullime për të plotësuar kërkesën për të bërë 60 orë shërbim në muaj dhe beson se mund të shërbesh një a më shumë muaj si pionier ndihmës, pleqtë e kongregacionit do të jenë të kënaqur të shqyrtojnë kërkesën tënde për këtë privilegj shërbimi.»​—Të organizuar për të kryer shërbimin tonë, faqe 114.

[Kutia në faqen 6]

Programe për pionierët ndihmës

Mënyra për të programuar 15 orë shërbim në fushë çdo javë

Mëngjeset—Nga e hëna deri të shtunën

E diela mund të zëvendësohet për çdo ditë

Dita Periudha Orët

E hënë Mëngjes 2 1⁄2

E martë Mëngjes 2 1⁄2

E mërkurë Mëngjes 2 1⁄2

E enjte Mëngjes 2 1⁄2

E premte Mëngjes 2 1⁄2

E shtunë Mëngjes 2 1⁄2

Shuma e orëve: 15

Dy ditë të plota

Mund të zgjidhen dy ditë të javës

Dita Periudha Orët

E mërkurë Ditë e plotë 7 1⁄2

E shtunë Ditë e plotë 7 1⁄2

Shuma e orëve: 15

Dy mbrëmje dhe një fundjavë

Mund të zgjidhen dy mbrëmje jo të fundjavës

Dita Periudha Orët

E hënë Mbrëmje 1 1⁄2

E mërkurë Mbrëmje 1 1⁄2

E shtunë Ditë e plotë 8

E diel Gjysmë dite 4

Shuma e orëve: 15

Pasditet e ditëve të javës dhe e shtuna

E diela mund të zëvendësohet për çdo ditë

Dita Periudha Orët

E hënë Pasdite 2

E martë Pasdite 2

E mërkurë Pasdite 2

E enjte Pasdite 2

E premte Pasdite 2

E shtunë Ditë e plotë 5

Shuma e orëve: 15

Programi personal i shërbimit

Vendos mbi numrin e orëve për çdo periudhë kohe

Dita Periudha Orët

E hënë

E martë

E mërkurë

E enjte

E premte

E shtunë

E diel

Shuma e orëve: 15