Të mbledhim njerëz nga të gjitha gjuhët
1 Fjala e Perëndisë po përmbushet! Njerëz «nga të gjitha gjuhët e kombeve» po e përqafojnë adhurimin e vërtetë. (Zah. 8:23) Si po i ndihmojnë Dëshmitarët e Jehovait individë nga të gjitha «fiset, popujt dhe gjuhët» që të arrijnë të kenë një qëndrim të pastër përpara Jehovait me mundësinë për të mbijetuar «shtrëngimin e madh»?—Zbul. 7:9, 14.
2 Organizata e Perëndisë përgjigjet: Trupi Udhëheqës ka marrë masa që literatura biblike të sigurohet në afërsisht 380 gjuhë, me qëllim që njerëzit në të gjithë tokën ta kuptojnë qartë rëndësinë e lajmit të mirë. Përgatitja dhe botimi i literaturës në kaq shumë gjuhë është një sipërmarrje shumë e madhe. Në të përfshihet formimi i skuadrave me përkthyes të kualifikuar dhe sigurimi i ndihmës së nevojshme për ta përkthyer literaturën tonë në të gjitha këto gjuhë. Veç kësaj, përfshin edhe shtypjen e transportimin e materialit. Megjithatë një rol themelor luan çdo lajmëtar i Mbretërisë, që ua çon njerëzve këtë mesazh biblik jetëshpëtues.
3 Pranohet sfida: Sot, në shumë vende ka një numër të konsiderueshëm të huajsh që flasin një gjuhë tjetër. Për t’u dhënë këtyre njerëzve lajmin e mirë, gjithnjë e më shumë shërbëtorë të Perëndisë po përpiqen të mësojnë gjuhën kineze, ruse, spanjolle ose disa gjuhë të tjera të zakonshme në territorin e tyre. Të tjerë po mësojnë gjuhën amerikane të shenjave. Vetëm në Shtetet e Bashkuara ka afërsisht 2.900 kongregacione dhe 240 grupe që predikojnë në 38 gjuhë të tjera, përveç anglishtes. Disa njerëz që nuk kishin dëgjuar kurrë për Jehovain ose që nuk dinin asgjë për Biblën, po pranojnë të vërtetën e Fjalës së Perëndisë.—Rom. 15:21.
4 A mund të përpiqemi edhe më shumë për t’ua shpallur lajmin e mirë atyre njerëzve në territorin tonë që i përkasin një kombi tjetër? (Kolos. 1:25) Shumë kongregacione po organizohen që t’u predikojnë të huajve në territorin e tyre, që flasin një gjuhë tjetër. Së pari, lajmëtarët mësojnë aq sa të bëjnë një prezantim të thjeshtë në gjuhën e huaj, si: «Mirëdita! Kam një lajm të mirë për ju. [Pastaj, ofrojnë një fletushkë ose broshurë në atë gjuhë.] Mirupafshim.» Jehovai po i bekon me të vërtetë këto përpjekje të vogla!
5 Mesazhi i Mbretërisë tërheq njerëz të çdo mjedisi dhe gjuhe. Le të shfrytëzojmë çdo mundësi për ta ndarë këtë mesazh me ta.