Si arrihet uniteti i vërtetë mes të krishterëve?

¹ Çfarë mund t’i bashkojë më tepër se gjashtë milionë njerëz që janë nga 234 vende dhe që flasin rreth 380 gjuhë? Mund t’i bashkojë vetëm adhurimi i Perëndisë Jehova. (Mik. 2:12; 4:1-3) Dëshmitarët e Jehovait e dinë nga përvoja e tyre se uniteti mes të krishterëve ekziston vërtet sot. Si «një kope e vetme» nën ‘bariun tonë të vetëm’ jemi të vendosur të mos i nënshtrohemi frymës përçarëse të kësaj bote.—Gjoni 10:16; Efes. 2:2.

² Qëllimi i padështueshëm i Perëndisë është që të gjitha krijesat me aftësi për të arsyetuar të bashkohen në adhurimin e vërtetë. (Zbul. 5:13) Duke e ditur sa e rëndësishme ishte kjo, Jezui u lut me zjarr për unitetin e ithtarëve të tij. (Gjoni 17:20, 21) Si mund ta nxitë secili prej nesh unitetin e kongregacionit të krishterë?

³ Si arrihet uniteti?: Pa Fjalën dhe frymën e Perëndisë uniteti i krishterë nuk do të arrihej kurrë. Kur zbatojmë gjërat që lexojmë në Bibël, e lejojmë frymën e Perëndisë të rrjedhë lirisht në jetën tonë. Kjo gjë na ndihmon ‘të ruajmë njëjësinë e frymës në lidhjen e paqes’. (Efes. 4:3) Na shtyn ta durojmë me dashuri njëri-tjetrin. (Kolos. 3:13, 14; 1 Pjet. 4:8) A e nxit unitetin duke menduar thellë çdo ditë rreth Fjalës së Perëndisë?

⁴ Edhe detyra që na është ngarkuar, për të predikuar dhe për të bërë dishepuj, na bashkon. Kur punojmë me të tjerët në shërbimin e krishterë «duke u përpjekur krah për krah . . . për besimin e lajmit të mirë», bëhemi «bashkëpunëtorë në të vërtetën». (Filip. 1:27; 3 Gjon. 8) Ndërsa veprojmë kështu, lidhjet e dashurisë brenda kongregacionit bëhen më të forta. Pse të mos ftosh dikë, me të cilin nuk ke dalë kohët e fundit, që të të shoqërojë në shërbim këtë javë?

⁵ Sa të privilegjuar jemi që bëjmë pjesë në të vetmen vëllazëri të vërtetë ndërkombëtare sot mbi tokë! (1 Pjet. 5:9) Kohët e fundit mijëra veta e përjetuan drejtpërdrejt këtë unitet mbarëbotëror në kongreset ndërkombëtare «T’i japim lavdi Perëndisë». Le ta nxitë secili prej nesh këtë unitet të çmuar duke lexuar çdo ditë Fjalën e Perëndisë, duke i zgjidhur mosmarrëveshjet me dashuri dhe duke predikuar lajmin e mirë «në një mendje të vetme».—Rom. 15:6.