Ndërtimi i Sallave të Mbretërisë—Aspekt i rëndësishëm i shërbimit të shenjtë
1. Çfarë është arritur deri tani në lidhje me ndërtimin e Sallave të Mbretërisë dhe çfarë nevoje ka akoma?
1 Gjatë viteve të fundit, janë ndërtuar qindra Salla Mbretërie anembanë botës. E vlerësojmë vërtet punën e madhe që kanë bërë Komitetet Rajonale të Ndërtimit dhe të gjithë ata që kanë dhënë ndihmën e tyre. Por, megjithëse është bërë një punë e jashtëzakonshme, ka ende shumë për të bërë në këtë drejtim. Edhe në Shqipëri po planifikohet formimi i këtyre komiteteve për ndërtimin e ardhshëm të Sallave të Mbretërisë, dhe ky rregullim do të kërkojë bashkëpunimin e kongregacioneve. Si mund të ndihmojë secili prej nesh në këtë aspekt të rëndësishëm të shërbimit të shenjtë që i bëjmë Jehovait?—Zbul. 7:15.
2. Si mund të ndihmojmë drejtpërdrejt për ndërtimin e Sallave të Mbretërisë?
2 Të jemi të gatshëm: Nëse je një lajmëtar i pagëzuar, të ftojmë që të tregohesh i gatshëm për të punuar me Komitetet Rajonale të Ndërtimit duke plotësuar formularin Pyetësor për vullnetar për ndërtimin e Sallave të Mbretërisë. (Psal. 110:3) Të gjithë ata që dalin vullnetarë duhet të kenë frymën e gatishmërisë dhe të bashkëpunimit. (Psal. 133:1) Edhe në rast se nuk ke shumë përvojë në ndërtim, prapëseprapë mund të jesh një ndihmë e madhe për suksesin e një projekti ndërtimi. Gjithashtu, stërvitja që mund të marrësh në disa aspekte të ndërtimit, do të të japë mundësinë të jesh më i dobishëm në të ardhmen.
3. Cila është një mënyrë tjetër për të mbështetur projektet e ndërtimit të Sallave të Mbretërisë?
3 Në qoftë se nuk je në gjendje të dalësh vullnetar, mund të japësh mbështetjen tënde duke inkurajuar të tjerët që kanë mundësi të marrin pjesë në këtë vepër. Mund të ndihmosh që caktimet e këtyre vëllezërve në kongregacion të përmbushen gjatë mungesës së tyre. Duke planifikuar që më përpara, pleqtë sigurohen që të plotësohen nevojat e kongregacionit gjatë kohës që disa po punojnë në një projekt të Sallave të Mbretërisë. Pa dyshim, Jehovai kënaqet kur ne punojmë së bashku në unitet për të çuar përpara interesat e Mbretërisë.—Hebr. 13:16.
4. Si mund t’i inkurajojmë ata që marrin pjesë në projektet e ndërtimit të Sallave të Mbretërisë?
4 Të jemi inkurajues: Të ndërtosh vende adhurimi kërkon shumë kohë dhe punë. Kjo nënkupton se ata që ftohen të marrin pjesë në një projekt ndërtimi, ndonjëherë edhe mund të largohen nga kongregacioni i tyre. Le t’u japim pa humbur kohë lavdërime dhe inkurajim vullnetarëve të ndërtimit, të cilët bëjnë sakrifica për të përmbushur këtë «detyrë të nevojshme».—Vep. 6:3; Rom. 14:19.
5. Si duhet të tregojnë ekuilibër vullnetarët e ndërtimit?
5 Të jemi të ekuilibruar: Predikimi për Mbretërinë e Perëndisë është veprimtaria teokratike kryesore për ne. (Marku 13:10) Duke pasur parasysh këtë, Komitetet Rajonale të Ndërtimit përpiqen të bëjnë një planifikim të mirë, në mënyrë që vullnetarët të mos shkëputen pa qenë nevoja nga kongregacionet e tyre. Po kështu, vullnetarët e ndërtimit përpiqen të jenë të ekuilibruar për të përmbushur përgjegjësitë e shumta që kanë. Ata marrin masat e nevojshme që caktimet e tyre në kongregacion të përmbushen ndërkohë që nuk janë të pranishëm.
6. Çfarë arrihet kur të gjithë në kongregacion bashkëpunojnë për të çuar përpara adhurimin e vërtetë?
6 Apostulli Pavël tha se pjesëtarët e kongregacionit punojnë bashkë në unitet «për rritjen e trupit, për ndërtimin e vetvetes në dashuri». (Efes. 4:16) Dashuria jonë për Jehovain dhe për adhurimin e vërtetë na nxit që të bashkëpunojmë për të predikuar lajmin e mirë dhe për të përkrahur ndërtimin e Sallave të Mbretërisë.