Shëndeti i përsosur: Vetëm një ëndërr?

A KENI qenë ndonjëherë sëmurë rëndë apo keni kaluar ndonjë operacion të vështirë? Nëse po, ka të ngjarë që tani ta çmoni edhe më shumë jetën. Por cilado qoftë gjendja juaj fizike, a besoni se është e mundur të gëzohet një shëndet i përsosur? Kjo mund të mos duket realiste, duke pasur parasysh mbizotërimin e sëmundjeve sfilitëse si kanceri ose sëmundjet e zemrës. Në fakt, shumica prej nesh sëmuremi kohë pas kohe. Megjithatë, mirëqenia e plotë nuk është thjesht një ëndërr.

Njeriu u krijua për të gëzuar një shëndet të shkëlqyer e jo për të luftuar me sëmundjet dhe me vdekjen. Kështu, për të anuluar sëmundjet dhe vdekjen, Jehovai siguroi bazën për shëndet të përsosur dhe jetë të përjetshme, me anë të flijimit shpërblerës të Krishtit Jezu. «Perëndia e deshi aq shumë botën, sa dha Birin e tij të vetëmlindurin, që, kushdo që beson në të, të mos humbasë, por të ketë jetë të përjetshme.» (Gjoni 3:16) Ata që do të jetojnë përgjithmonë në botën e re të premtuar të Perëndisë nuk do të luftojnë me shëndetin e keq ose me plakjen. Nëse do të jetë kështu, çfarë do të ndodhë atëherë me sëmundjet?

Çlirim nga sëmundjet

Një model na e siguron mënyra me të cilën Jezu Krishti shëroi të sëmurët. Në lidhje me kurime të tilla thuhet: «Të verbërit po shohin, të çalët po ecin, lebrosët janë pastruar dhe të shurdhërit po dëgjojnë; të vdekurit po ngjallen dhe ungjilli po u predikohet të varfërve.» (Mateu 11:3-5) Po, të gjithë të pamundurit që iu afruan Jezuit «u shëruan plotësisht». (Mateu 14:36) Si rezultat, «turmat mrekulloheshin kur shikonin se memecët flitnin, sakatët shëroheshin, të çalët ecnin dhe të verbërit shihnin; dhe lëvdonin Perëndinë e Izraelit».—Mateu 15:31.

Vërtet, edhe pse asnjë sot nuk mund të kryejë kurime si këto, ne mund të jemi të sigurt se nën sundimin e Perëndisë njerëzimi do të arrijë përsosmërinë, do të shërohet nga të gjitha sëmundjet mendore dhe fizike. Premtimi i Perëndisë është i regjistruar te Zbulesa 21:3, 4: «Ja! Tabernakulli i Perëndisë me njerëzit! Dhe ai do të banojë me ta; edhe ata do të jenë populli i tij dhe vetë Perëndia do të jetë bashkë me ta, Perëndi i tyre. Dhe Perëndia do të thajë çdo lot nga sytë e tyre; dhe vdekja nuk do të jetë më; as brengë, as klithma, as mundim, sepse gjërat e mëparshme shkuan.»

Imagjinoni një botë ku nuk ka nevojë për asnjë industri farmaceutike ose për spitale, kirurgji ose terapi! Për më tepër, në parajsën e rivendosur, depresioni dhe sëmundjet mendore do të jenë gjëra të së kaluarës. Jeta do të jetë një kënaqësi e vërtetë dhe lumturia një ndjenjë e përhershme. Në fakt, fuqia e pafundme e Perëndisë do të aktivizojë proceset ripërtëritëse të trupit dhe dobitë e shpërblesës do të eliminojnë efektin dobësues të mëkatit. «Asnjë banor i qytetit nuk do të thotë: ‘Jam i sëmurë.’ »—Isaia 33:24.

Sa shpresë e mrekullueshme! Të gëzojmë shëndet të përsosur fizik e frymor nën Mbretërinë e Perëndisë! Ndërkohë që mbani një stil të ekuilibruar e të shëndetshëm jetese tani, shihni përpara nga bekimet e botës së re të Perëndisë. Jehovai ‘i mbushtë me të mira vitet e tua, u përtëriftë si e shqiponjës rinia jote’!—Psalmi 103:5, DSF.