«Gjallesa fluturuese më madhështore në tokë»
ALBATROSI është përshkruar me të drejtë si «gjallesa fluturuese më madhështore në tokë». Me një hapje krahësh prej tre metrash, ky zog, më i madhi ndër zogjtë detarë, arrin shpejtësinë më shumë se 115 kilometra në orë. Albatrosi mund të duket i ngathët në tokë, por në qiell duket madhështor.
Nga afro 20 llojet e njohura të albatrosit, rreth 15 mund të gjenden në ujërat e oqeanit përreth Zelandës së Re. Kepi i Tajaroas, që ndodhet në gadishullin e Otagos, në jug të Zelandës së Re, është i vetmi vend në Hemisferën Jugore ku shumohet albatrosi.
Atje albatrosi mbretëror i veriut fillon të shumohet pas gjashtë deri dhjetë vjetësh. Shumimi vazhdon gjatë gjithë jetës së tij, që mund të jetë mjaft e gjatë. Nga sa dihet, disa prej këtyre zogjve kanë jetuar më shumë se gjysmë shekulli. Albatrosi bën një vezë—një vit po, një vit jo—dhe vitin që nuk bën vezë e kalon në det. Zakonisht, zogu qëndron me të njëjtin partner për gjithë jetën.
Si mashkulli, edhe femra punojnë bashkë për të ngritur çerdhen, që e fillojnë në shtator. Pastaj, në nëntor, femra bën një vezë që mund të peshojë deri gjysmë kilogrami. Për rreth 80 ditë, prindërit e ngrohin vezën me radhë deri në fillim të shkurtit kur del zogu. Pas kësaj, prindërit e ruajnë dhe e ushqejnë me radhë zogun me peshq dhe kallamarë që ia kanë zbutur duke e përtypur vetë. Kur është gjashtë muajsh, zogu mund të peshojë 12 kilogramë—shumë më tepër se një albatros i rritur.
Gati një vit më vonë, prindërit largohen nga kepi i Tajaroas për të kaluar një vit në det para se të kthehen përsëri për të ngrohur vezën tjetër. Ndërkohë, fëmija i tyre, tashmë i dobësuar dhe i veshur plotësisht me pupla, ka mësuar mes vështirësive dhe ngulmimit të shtrijë krahët dhe të niset fluturimthi në qiell të hapur. Për ku? Për në oqean, ku albatrosi i ri do të kalojë disa nga vitet e para. Kur të bëhet adoleshent, albatrosi do të kthehet në kepin e Tajaroas. Atje, ndërsa zogjtë e mëdhenj ndërtojnë çerdhe dhe shumohen, albatrosi i ri do ta kalojë kohën duke pispillosur puplat, duke luajtur dhe duke u mburrur me zotësinë e tij në fluturim.
[Kutia në faqen 25]
VIZITË NË KOLONINË E ALBATROSIT MBRETËROR
Që kur isha i vogël, më tërhiqnin shumë tregimet me albatros, prandaj mezi prisja të vizitoja koloninë e albatrosit mbretëror. Atë ditë frynte erë dhe, kur unë e një shoqe u afruam, i ngulëm sytë drejt qiellit që të shihnim shfaqjen ajrore për të cilën kishim ardhur. Nuk u zhgënjyem. Kur i pamë duke fluturuar, ngelëm gojëhapur nga ky specialist legjendar i fluturimit.
Gjatë kthimit, u bashkuam me një grup vizitorësh për të dëgjuar shpjegimet e ciceronit për një orë. Me anë të imazheve, ekspozitës dhe videove, mësuam se albatrosi mbretëror i veriut mund të jetojë për një kohë të gjatë në det, madje mund të flejë mbi ujë. Qoftë në ujë, qoftë në ajër, ky zog i mahnitshëm është vërtet një mrekulli—një arsye tjetër për t’i dhënë lavdi atij që ‘krijoi gjithçka’, Perëndisë Jehova.—Zbulesa 4:11.
[Figura në faqen 24]
Të dy prindërit e ruajnë dhe e ushqejnë me radhë zogun, i cili mund të peshojë 12 kilogramë kur është gjashtë muajsh
[Figura në faqet 24, 25]
Kepi i Tajaroas, shtëpia e albatrosit mbretëror të veriut
[Figura në faqen 24]
Albatrosi mbretëror i veriut mund të jetojë për një kohë të gjatë në det, madje mund të flejë mbi ujë
[Burimet e figurave në faqen 23]
Sipër: © David Wall/Alamy; poshtë: © Kim Westerskov/Alamy
[Burimet e figurave në faqen 25]
Në sfond: © davidwallphoto.com; faqja 24, sipër: Tui De Roy/Roving Tortoise Photos; faqja 24, poshtë: me mirësjellje nga Diarmuid Toman; faqja 25, albatrosi në fluturim: © Naturfoto-Online/Wolfgang Bittmann