Të rinjtë pyesin

Kush është burrë i vërtetë?

«Babi më vdiq kur isha tre vjeç. Nganjëherë i kam zili çunat që janë rritur me baba. Duken shumë më të sigurt se unë.»—Aleksi.a

«Lidhja ime me tim atë është sa për të thënë. M’u desh ta mësoja vetë se ç’do të thotë të jesh burrë i vërtetë.»—Xhonatani.

A JE ndier ndonjëherë si këta të rinj? A ke frikë se mos, për një arsye a një tjetër, s’do ta mësosh kurrë ç’do të thotë të jesh burrë i vërtetë? Nëse po, mos i humb shpresat!

Shiko se si mund t’i kapërcesh dy vështirësi të zakonshme.

VËSHTIRËSIA 1: Idetë e gabuara të përhapura për burrërinë

Ç’thonë disa:

Burrat e vërtetë janë të fortë, nuk qajnë.
Burrat e vërtetë nuk lënë njeri t’u thotë çfarë duhet të bëjnë.
Burrat janë më të mirë se gratë.

Një këndvështrim tjetër: Të bëhesh burrë do të thotë të mos jesh çunak—jo të mos jesh grua. Burrë i vërtetë bëhesh kur i lë pas tiparet e një kalamani. Apostulli i krishterë Pavël shkroi: «Kur isha fëmijë, flisja si fëmijë, mendoja si fëmijë dhe arsyetoja si fëmijë. Por tani që jam bërë burrë, i kam flakur tiparet e një fëmije.» (1 Korintasve 13:11) Me fjalë të tjera, sa më shumë mëson të mendosh, të flasësh e të sillesh me pjekuri, dhe nuk mendon, flet e sillesh më si fëmijë, aq më shumë tregon se je burrë i vërtetë.b

Provo këtë: Shkruaj në një fletë përgjigjet e pyetjeve të mëposhtme:

Në cilat pika kam përparuar dhe i kam hequr «tiparet e një fëmije»?
Në cilat pika mund të përmirësohem?

Mund të lexosh: Luka 7:36-50. Shiko si tregoi Jezui se ishte burrë i vërtetë (1) duke mbrojtur atë që ishte e drejtë dhe (2) duke i trajtuar me respekt të tjerët—përfshirë edhe gratë.

«E admiroj shokun tim, Kenin. Është burrë i fortë—fizikisht, emocionalisht dhe në besim—por edhe njeri i mirë. Shembulli i tij më ka mësuar se një burrë i vërtetë nuk i ul të tjerët vetëm që të dalë vetë si më i mirë.»—Xhonatani.

VËSHTIRËSIA 2: Mungesa e një figure atërore pozitive

Ç’thonë disa:

Nëse babai nuk është pjesë e familjes, kurrë s’do ta mësosh vërtet çfarë do të thotë të jesh burrë.
Nëse babai ka qenë shembull i keq, do s’do, je i destinuar të përsëritësh gabimet e tij.

Një këndvështrim tjetër: Edhe nëse fëmijëria jote s’ka qenë aspak ideale, nuk je i destinuar të dështosh! S’ka pse të ta diktojnë jetën rrethanat e këqija. (2 Korintasve 10:4) E ke vetë në dorë të ndjekësh këshillën që i dha mbreti David të birit, Solomonit: «Bëhu i fortë dhe tregohu burrë.»—1 Mbretërve 2:2.

Natyrisht, mund të jetë e vështirë të rritesh me një baba që të lë pas dore—ose pa baba fare. «Të mos njohësh babanë është një minus i madh në jetë,—thotë Aleksi, i cituar në fillim.—Jam 25 vjeç, por ndihem sikur vetëm tani po i mësoj gjërat që duhej t’i kisha mësuar në fillim të adoleshencës.» Nëse edhe ti ndihesh si Aleksi, ç’mund të bësh?

Provo këtë: Gjej një këshilltar—një burrë që është shembull i mirë.c Pyete çfarë cilësish janë veçanërisht të rëndësishme te një burrë i vërtetë. Pastaj, pyete si mund t’i zhvillosh ti këto cilësi.—Proverbat 1:5.

Mund të lexosh: Proverbat, kapitujt 1-9. Vër re këshillat atërore që mund ta ndihmojnë një djalë të bëhet burrë i mençur e me besim të fortë.

«Ndihem i kënaqur kur shoh çfarë burri po bëhem. Do të doja që im atë të kishte luajtur rol në përparimin tim, por prapëseprapë jam optimist për të ardhmen. Jam i bindur se nuk jam i destinuar të dështoj.»—Xhonatani.

Pas Zgjohuni! të dhjetorit 2012, artikujt «Të rinjtë pyesin» mund t’i gjesh vetëm në Internet,

a Në këtë artikull, disa emra janë ndryshuar.

b Shih kutinë «Djalë apo burrë?»

c Pleqtë e kongregacionit të krishterë mund të jenë këshilltarë të mirë.

PSE TË MOS PYESËSH PRINDËRIT?

Sipas teje, si është një burrë i vërtetë? Si po eci unë, a po tregohem i pjekur?

DY FJALË PËR PRINDËRIT

BABALLARËT—

Ideja që do të ketë yt bir për një burrë të vërtetë do të bazohet kryesisht te shembulli që lë ti. Nëse e trajton gruan me respekt, po i mëson djalit t’i trajtojë gratë me respekt. Nëse punon pa u lodhur që të kujdesesh për familjen—edhe sikur kjo të kërkojë të bësh punë të përulur ose të lodhshme—po i mëson djalit të punojë pa u lodhur dhe të jetë i përgjegjshëm.—1 Timoteut 5:8.

Mbase marrëdhënia jote me babanë s’ka qenë aspak ideale. Ndoshta edhe ai s’kishte marrëdhënie të mirë me babanë e tij. Por, mos harro: ti e ke në dorë ta ndalësh këtë rreth vicioz. Mos e humb mundësinë! Zgjidh t’i qëndrosh afër djalit tënd.d Lëri shembull të mirë, dhe ka shumë të ngjarë që kur të rritet, do të bëhet burrë i vërtetë—një burrë që do të jesh krenar ta quash «im bir».—Proverbat 23:24.

NËNAT—

Si mund ta ndihmosh tët bir të bëhet burrë i vërtetë? Mos bëj krahasime negative me burrin tënd. Për shembull, ta zëmë se djali bën një gabim që të sjell ndër mend bashkëshortin. Mbase të vjen t’i shfrysh: «Boll! Bën tamam si yt atë!» Natyrisht, ke të drejtë ta këshillosh djalin kur gabon. Megjithatë, mos harro: nëse fjalët a veprimet e tua nënkuptojnë se çdo gjë që bën burri yt është e gabuar, ndoshta pa dashje po e pengon djalin të bëhet burrë.

Mbështet përpjekjet e tët shoqi që të përfshihet në jetën e djalit. Nxiti të kalojnë kohë bashkë dhe kërko raste që të nxjerrësh në pah cilësitë pozitive të bashkëshortit dhe gjërat e mira që bën. A punon pa u lodhur që të mbajë familjen? A kalon kohë me fëmijët? A i trajton me respekt të tjerët? Tregoji djalit sa shumë i çmon këto gjëra. Me këto komente do ta ndihmosh të mësojë nga aspektet e mira të shembullit të të atit.

d Për më shumë informacione, shih artikullin «Si të mbajë lidhje të ngushta babai me djalin?» në Kullën e Rojës të 1 nëntorit 2011, botuar nga Dëshmitarët e Jehovait.