Si të jesh më i përkushtuar në martesë

VËSHTIRËSIA

Ditën që u martove, u betove se do t’i përkushtoheshe për gjithë jetën bashkëshortit. Ky ishte një premtim solemn që tregonte vendosmërinë tënde për të qëndruar përgjithmonë me bashkëshortin e për të zgjidhur problemet që do të dilnin.

Por, fërkimet gjatë viteve kanë bërë të vetën. A mendon se je po aq i përkushtuar ndaj bashkëshortit sa në fillim?

Ç’DUHET TË DISH

Përkushtimi është zgjidhja, jo problemi. Shumë njerëz sot nuk besojnë se përkushtimi është i rëndësishëm. Disa e shohin si një zinxhir që të lidh këmbët pas një vendimi të gabuar. Mirë është ta shohësh si spirancë që e mban martesën të palëkundur përballë tallazeve të jetës. Një grua me emrin Megan thotë: «Kur grindemi, gjëja më e mirë e përkushtimit është se më jep siguri se nuk do të ndahemi.»a Besimi se martesa nuk cenohet​—edhe nëse çalon në ndonjë aspekt—​krijon një bazë ku të mbështetesh për të zgjidhur problemet.​—Shih kutinë «Përkushtimi dhe besnikëria».

Përfundimi: Nëse ke probleme martesore, tani është momenti ta forcosh përkushtimin e jo ta vësh në pikëpyetje. Si ta bësh këtë?

Ç’MUND TË BËSH

Shqyrto pikëpamjen tënde. «Të martuar përgjithmonë.» Kjo shprehje të bën të ndihesh i sigurt apo sikur të janë lidhur këmbët? Kur lindin probleme, a e mendon gjithmonë ndarjen si mundësi? Që të jesh më i përkushtuar, është thelbësore ta konsiderosh martesën si lidhje të përhershme.​—Parimi biblik: Mateu 19:6.

Shqyrto të kaluarën. Prindërit mund të kenë ndikuar te pikëpamja jote për përkushtimin. Një grua me emrin Lea shprehet: «Prindërit u divorcuan kur isha e vogël dhe kam frikë se mos kjo ka ndikuar për keq te pikëpamja ime për përkushtimin.» Të jesh i sigurt se martesa jote mund të jetë ndryshe. Nuk është e thënë se do të bësh të njëjtat gabime si prindërit.​—Parimi biblik: Galatasve 6:4, 5.

Shqyrto të folurit tënd. Në debat e sipër, mos thuaj gjëra për të cilat mund të pendohesh më vonë, si «do të të lë» ose «do të gjej ndonjë që më vlerëson». Shprehje të tilla minojnë përkushtimin dhe nuk nxjerrin gjë në dritë, por ju futin në vorbullën e një morie fyerjesh. Në vend që ta lëndoni njëri-tjetrin, mirë është të thoni fjalë të tilla, si: «Me sa duket, të dy jemi të mërzitur. Si ta zgjidhim këtë problem?»​—Parimi biblik: Proverbat 12:18.

Jep shenja të qarta përkushtimi. Mbaj fotografi të bashkëshortit mbi tavolinën e punës. Fol mirë për martesën tënde para të tjerëve. Vër synim t’i telefonosh çdo ditë bashkëshortit kur je larg. Mos fol në njëjës dhe përdor shprehje si «unë dhe gruaja» ose «unë dhe burri». Kështu do t’u tregosh qartë të tjerëve, dhe vetes, se je i përkushtuar ndaj bashkëshortit.

Gjej shembuj të mirë. Vëzhgo çifte me përvojë që i kanë përballuar me sukses problemet martesore. Pyeti: «Çfarë është për ju përkushtimi dhe si ju ka ndihmuar?» Bibla thotë: «Hekuri mpreh hekurin. Kështu edhe një njeri mpreh fytyrën e një tjetri.» (Proverbat 27:17) Me këtë parim në mendje, pse të mos përfitosh nga këshilla e atyre që kanë martesë të lumtur?