8—Shembulli

ÇFARË DO TË THOTË

Prindërit lënë shembullin duke zbatuar gjërat që u mësojnë fëmijëve. Për shembull, vështirë që djali të tregojë të vërtetën nëse i ka kapur veshi fjalët «thuaji se nuk jam në shtëpi» kur ti s’ke qejf të takosh dikë që të ka trokitur në derë.

«Një shprehje e njohur thotë: ‘Bëj si them unë, por mos bëj si bëj unë.’ Por, kjo mënyrë nuk funksionon me fëmijët. Ata janë si sfungjerë që thithin çdo fjalë a veprim tonin. Dhe, nëse nuk i bëjmë vetë gjërat që përpiqemi t’u mësojmë, do të na i thonë.»​—Davidi.

PARIMI BIBLIK: «Ti që predikon ‘mos vidh’, vjedh për vete?»​—Romakëve 2:21.

PSE KA RËNDËSI

Prindërit ndikojnë te fëmijët, e madje edhe tek adoleshentët, më tepër se kushdo tjetër​—përfshirë bashkëmoshatarët. Kjo do të thotë se je në pozitën më të mirë për t’i drejtuar fëmijët në rrugën e duhur, sigurisht, me kusht që t’i zbatosh edhe vetë ato që u mëson.

«Mbase ia themi diçka fëmijës 100 herë dhe dyshojmë nëse po na dëgjon. Ama, një herë të mos i bëjmë vetë gjërat që themi, fëmija do të na e përmendë. Atyre s’u shpëton gjë, edhe kur ne mendojmë se nuk e kanë mendjen.»​—Nikola.

PARIMI BIBLIK: ‘Mençuria nga lart para së gjithash nuk është hipokrite.’​—Jakovi 3:17.

Ç’MUND TË BËSH

Shqyrto standardet e tua. Çfarë shikon ti për t’u zbavitur? Si sillesh me bashkëshortin dhe me fëmijët? Çfarë miqsh ke? A mendon për të tjerët? Me pak fjalë, a je ai lloj personi që dëshiron të bëhen fëmijët e tu?

«Unë dhe burri nuk u kërkojmë fëmijëve të jetojnë sipas një standardi që s’e ndjekim vetë.»​—Kristina.

Kërko falje kur gabon. Fëmijët e tu e dinë se nuk je i përsosur. Ndaj, nëse thua «më fal» kur bën një gabim​—si bashkëshortit edhe fëmijëve—​po jep një mësim të çmuar për ndershmërinë dhe përulësinë.

«Është e domosdoshme që fëmijët të dëgjojnë se i pranojmë gabimet dhe se kërkojmë falje për to. Po s’e bëmë këtë, vetëm sa po u mësojmë t’i fshehin gabimet e tyre.»​—Robina.