Krijimi i burrit dhe gruas së parë

Jehovai mbolli një kopsht në një vend që quhej Eden. Kopshti kishte shumë lule, pemë dhe kafshë. Pastaj Perëndia krijoi njeriun e parë, Adamin, nga pluhuri i tokës dhe i fryu në vrimat e hundës. A e di se çfarë ndodhi? Ai filloi të jetonte! Jehovai i dha si punë Adamit të kujdesej për kopshtin dhe t’u vinte emra të gjitha kafshëve.

Jehovai i dha Adamit këtë urdhër të rëndësishëm: ‘Mund të hash nga të gjitha pemët përveçse nga një pemë e veçantë. Nëse ha frytin e kësaj peme, do të vdesësh.’

Më vonë, Jehovai tha: ‘Do t’i bëj një ndihmëse Adamit.’ Ai e vuri Adamin në gjumë të thellë dhe pastaj, me një brinjë të tij krijoi një grua për të. Ajo u quajt Eva. Adami dhe Eva u bënë familja e parë. Si u ndie Adami për gruan e tij? Ai ishte kaq i lumtur sa tha: ‘Shikoni çfarë bëri Jehovai me brinjën time! Më në fund dikush si unë!’

Jehovai i tha Adamit dhe Evës të bënin fëmijë dhe të mbushnin tokën. Ai donte që ata të kënaqeshin duke punuar bashkë ndërsa e kthenin gjithë tokën në parajsë ose në park të bukur, tamam si kopshti i Edenit. Por gjërat nuk shkuan kështu. Pse? Për këtë do të mësojmë më shumë në kapitullin tjetër.