HULI

Bir i Aramit. (Zn 10:23) Mirëpo te 1 Kronikave 1:17 Huli përmendet si bir i Semit. Në Dorëshkrimin Aleksandrin dhe në dorëshkrimin hebraik Kenikot 175, 1 Kronikave 1:17 është njësoj me Zanafillën 10:23, sepse përmban shprehjen «bijtë e Aramit» para se të renditen Uzi, Huli, Geteri dhe Mashi. Kështu, mungesa e fjalëve «bijtë e Aramit» te 1 Kronikave 1:17 në tekstin masoretik ndoshta është një gabim kopjimi. Megjithatë, nuk ka pse të jetë medoemos kështu; në Shkrime, fjala «bijtë» mund të përfshijë nipërit ose edhe pasardhës të brezave të mëvonshëm. (Një rast i ngjashëm mund të jetë ai i 1Kr 1:4. Atje nuk tregohet se Semi, Kami dhe Jafeti ishin bijtë e Noesë, mbase ngaqë lidhja e tyre me Noenë ishte aq e njohur, sa shkrimtari nuk e pa të nevojshme ta përmendte.)

Nuk dihet me siguri se në çfarë zone u vendosën pasardhësit e Hulit. Sipas historianit Jozef, Huli (Urusi) ishte themeluesi i Armenisë. (Antikitete judaike, I, 145 [vi, 4]) Të tjerë e lidhin me disa zona në Mesopotami e gjetkë. Shumë veta përkrahin idenë se kishte lidhje me rajonin e Hulës afër ujërave të Meromit të përmendura në Bibël, në veri të detit të Galilesë, ngaqë emri Hul me sa duket ruhet tek emri Hula dhe tek Ulatha, emri i një rajoni të përmendur nga Jozefi.—Antikitete judaike, XV, 360 (x, 3).