A është e gabuar të përdoret emri i Perëndisë?

NË SHKRIMET Hebraike, që shpesh quhen «Dhiata e Vjetër», emri i Perëndisë shfaqet gati 7.000 herë në formën יהוה (lexohet nga e djathta në të majtë). Me fjalë të tjera, emri i Perëndisë paraqitet me katër shkronja hebraike Jodh, He, Ua dhe He, që në përgjithësi transliterohen JHVH.

Në lashtësi judenjtë filluan të kishin besëtytninë se ishte e gabuar të përdorej emri i Perëndisë. Si pasojë, ata nuk pranonin ta shqiptonin dhe në shkrimet e tyre filluan ta zëvendësonin me fjalë të tjera. Megjithatë, shumë përkthyes të Biblës kanë përdorur emrin «Jahve» ose «Jehova». Një prej tyre është përkthimi katolik Jerusalem Bible. Sipas këtij përkthimi, kur Moisiu pyeti Perëndinë si t’u përgjigjej izraelitëve nëse do ta pyesnin kush e kishte dërguar, Perëndia iu përgjigj: «Do t’u thuash bijve të Izraelit: ‘Jahveu, Perëndia i etërve tuaj, Perëndia i Abrahamit, Perëndia i Isakut dhe Perëndia i Jakobit më ka dërguar te ju.’ Ky është emri im përgjithnjë; me këtë emër do të më thërrasin tërë brezat që do të vijnë.»—Dalja 3:15.

Kur u lut, Jezui tregoi se ai vetë e kishte përdorur emrin e Perëndisë: «Unë ua kam bërë të njohur emrin tënd dhe do ta bëj të njohur.» Gjithashtu, në lutjen që njihet si lutja «Ati ynë», Jezui tha: «Ati ynë që je në qiej, u shenjtëroftë emri yt.»—Gjoni 17:26; Mateu 6:9.

Ndaj mund të duket e habitshme që në librin e tij të kohëve të fundit Jezui i Nazaretit (gjermanisht), papa Benedikti XVI tha këtë për përdorimin e emrit hyjnor: «Izraelitët kishin . . . plotësisht të drejtë që nuk pranonin ta shqiptonin emrin me të cilin Perëndia quan veten, të shprehur me fjalën JHVH, që të mos e ulnin në nivelin e emrave të hyjnive pagane. Po kështu, përkthimet e fundit të Biblës kanë bërë gabim që e kanë përdorur këtë emër—të cilin Izraeli gjithnjë e shihte si të mistershëm e të pashqiptueshëm—sikur të ishte një emër i vjetër çfarëdo.»

Si mendoni? A është e drejtë apo e gabuar të përdoret emri i Perëndisë? Jehovai vetë thotë: «Ky është emri im përgjithnjë; me këtë emër do të më thërrasin tërë brezat që do të vijnë.» Pra, a ka ndokush të drejtë ta kundërshtojë?

[Figura në faqen 30]

Jezui e përdori emrin e Perëndisë