Pse e donin Dorkën?

TË GJITHË ne dëshirojmë që njerëzit të na duan. A e dëshiron edhe ti këtë? . . .a Në Bibël lexojmë për Dorkën. Ajo ishte një grua që e donin shumë veta.

Dorka jetonte në Jopë, qytet bregdetar në detin Mesdhe. Jerusalemi ishte rreth 55 kilometra larg Jopës dhe më në brendësi. Dorka ishte ndër dishepujt e hershëm të Jezuit.

Si mendon, pse e donin kaq shumë Dorkën? . . . Po ja, Bibla thotë se bënte mjaft të mira dhe jepte dhurata me vlerë. Duket se bënte rroba të bukura për vejushat, që janë gra të cilave u kanë vdekur burrat. Gjithashtu ajo u fliste shumë vetave për Perëndinë e vërtetë, Jehovain, siç kishte bërë Jezui.

A e di çfarë e keqe i ndodh Dorkës tani? . . . Sëmuret rëndë dhe vdes. Shoqet e saj janë të gjitha të trishtuara. Prandaj dërgojnë ca njerëz tek apostulli Pjetër, mbi 15 kilometra larg. Këta njerëz i kërkojnë të vijë shpejt. Kur Pjetri mbërrin, ngjitet lart në dhomën ku është Dorka. Të gjitha gratë po qajnë dhe i tregojnë rrobat që Dorka ka bërë për to.

Atëherë Pjetri u thotë të gjithëve të dalin nga dhoma. Pjetri dhe apostuj të tjerë kanë kryer mrekulli edhe më parë, por asnjëherë nuk kanë sjellë në jetë një të vdekur. Çfarë mendon se do të bëjë Pjetri tani? . . .

Pjetri ulet në gjunjë afër trupit të vdekur dhe i lutet Jehovait. Më pas i thotë Dorkës të ngrihet. Dhe Dorka ngrihet! Pjetri i zgjat dorën dhe e ndihmon të çohet. Pastaj thërret vejushat e të tjerët dhe ua tregon. A e merr me mend sa të lumtur janë të gjithë? . . .

Le të shikojmë çfarë mund të mësosh nga historia e ringjalljes së Dorkës. Një mësim është se, kur i ndihmon të tjerët, në këmbim, mjaft prej tyre do të të duan. Por më e rëndësishmja, do të të dojë Perëndia dhe nuk do të të harrojë. Ai asnjëherë nuk do t’i harrojë të mirat që bën për të tjerët. Dhe do të të shpërblejë me jetë të përhershme e të lumtur në botën e tij të re e të drejtë.