Kush e ka fajin?

Nëse vuajtjet nuk i shkakton Perëndia, nga vijnë zia masive e bukës, skamja, luftërat mizore, sëmundjet ligështuese dhe katastrofat natyrore? Fjala e Perëndisë, Bibla, zbulon tri arsye kryesore pse vuajnë njerëzit:

1. Egoizmi, lakmia dhe urrejtja. «Njeriu ka sunduar mbi njeriun në dëm të tij.» (Eklisiastiu 8:9) Shpesh njerëzit vuajnë ngaqë bien pre e njerëzve të papërsosur, egoistë ose mizorë.

2. Rastësia dhe ngjarjet e paparashikuara. Shpesh njerëzit vuajnë «sepse . . . u rastis të kalojnë kohë të vështira dhe të përjetojnë ngjarje të paparashikuara». (Eklisiastiu 9:11) Pra, thjesht njerëzit gjenden në vendin e gabuar në momentin e gabuar, mund të ndodhin aksidente ose ata vetë tregohen të pakujdesshëm a bëjnë gabime.

3. Sundimtari i lig i botës. Bibla e identifikon qartë shkakun kryesor të vuajtjeve. Ajo thotë: «E gjithë bota dergjet nën pushtetin e të ligut.» (1 Gjonit 5:19) Ky ‘i lig’ është Satana Djalli, një krijesë e fuqishme dhe e padukshme, i cili në fillim ishte engjëll i Perëndisë, mirëpo «nuk qëndroi i vendosur në të vërtetën». (Gjoni 8:44) Me Satanain u bashkuan edhe engjëj të tjerë dhe u rebeluan kundër Perëndisë që të kënaqnin dëshirat e tyre egoiste, duke u bërë kështu demonë. (Zanafilla 6:1-5) Që kur u rebeluan, Satanai dhe demonët kanë ushtruar një ndikim të fuqishëm dhe mizor në botë. Kjo është veçanërisht e dukshme në kohën tonë. Tani Djalli turfullon nga zemërimi dhe po «mashtron gjithë tokën e banuar», e kjo ka sjellë ‘mjerim në tokë’. (Zbulesa 12:9, 12) Vërtet, Satanai është një diktator brutal. Ai ndien kënaqësi perverse kur sheh njerëzit tek vuajnë. Shkaktari i vuajtjeve është Satanai dhe jo Perëndia.

NDALU E MENDO: Vetëm një keqbërës i pashpirt e djallëzor do t’u shkaktonte vuajtje njerëzve të pafajshëm. Në kontrast me këtë, Bibla thotë: «Perëndia është dashuri.» (1 Gjonit 4:8) Prandaj, kur mendojmë për personalitetin e tij të dashur, «larg qoftë që Perëndia i vërtetë të veprojë me ligësi, që i Plotfuqishmi të veprojë me padrejtësi»!​—Jobi 34:10.

Gjithsesi, natyrshëm mund të të lindë pyetja: «Edhe për sa kohë do ta lejojë Perëndia i Plotfuqishëm sundimin monstruoz të Satanait?» Siç e kemi parë, Perëndia e urren me gjithë shpirt ligësinë dhe ndien dhembje të thellë kur ne vuajmë. Për më tepër, Fjala e tij na nxit: «Hidhni gjithë ankthin tuaj mbi të, sepse ai interesohet për ju.» (1 Pjetrit 5:7) Perëndia na do dhe ka fuqi t’i zhdukë të gjitha vuajtjet dhe padrejtësitë, siç do të shpjegohet në artikullin tjetër.a